Read Samoan Old Version Bible – O LE TUSI PAIA LE PESE A SOLOMONA, 5 Bible Online

LE PESE A SOLOMONA, 5 - Samoan Old Version Bible – O LE TUSI PAIA bible

LE PESE A SOLOMONA, 5

¹Lo‘u tuafafine e, la‘u avā e, ua ou sau i la‘u faatoaga; ua ou tau lo‘u muro atoa ma la‘u mea manogi; ua ou ‘aina la‘u meli ua sisina ifo ma la‘u meli; ua ou inu la‘u uaina ma la‘u suāsusu. A‘u uo e, ina taumamafa ia; a‘u uo pele e, ina feinu ia outou, feinu ia, ia malilie.

²Ua ou moe a‘u, a e ala lo‘u loto. O le leo o lo‘u manamea! O loo tu‘itu‘i mai o ia, ua faapea mai, Lo‘u tuafafine e, la‘u uo e, la‘u lupe e, le ua sao ona lelei, tatala mai ia le puipui ia te au, auā ua sūsū lo‘u ulu i le sau, o‘u lauulu foi i le ma‘ulu o le sau i le po.

³Ua ou to ese lo‘u ofu, pe faapefea ona ou toe ofu ai? Ua ou mulumulu i o‘u vae, pe faapefea ona ou toe faaeleelea ai?

⁴Na tuuina mai e lo‘u manamea lona lima i le pu o le puipui, ona mutimuti vale lea o lo‘u loto ia te ia.

⁵Na ou tulai e tatala le puipui i lo‘u manamea, na sisina ifo foi le muro ai o‘u lima, ma le muro sisina nai o‘u tamatamai lima i le ‘au o le faamau.

⁶Ua ou talā le puipui i lo‘u manamea, a ua liliu lo‘u manamea, ua alu ese; na segia lo‘u mauli ina o tautala mai o ia. Ua ou saili ia te ia, a e lei maua; na ou valaau atu ia te ia, a e lei tali mai o ia ia te au.

⁷Na maua a‘u e leoleo e na feoai i le aai, na latou fasi ia te au, ua ou manua ia te i latou. Na faoa e leoleo pa lo‘u ie e ufita‘i lo‘u tino.

⁸Tama fafine a Ierusalema e, ou te fai atu ia te outou ia tauto mai, afai tou te iloa lo‘u manamea tou te ta‘u atu ia te ia, ua ou vaivai au i lo‘u alofa atu.

⁹O oe na, lē sili ona lalelei i fafine, se a se mea e sili ai lou manamea i se isi manamea? se a se mea e sili ai lou manamea i se isi manamea, ina ua e fai mai matou te tauto?

¹⁰O lo‘u manamea, e sinasina ma le mūmū, e silisili ese i le mano.

¹¹O lona ulu ua pei o le auro ua faamamāina; o ona lauulu ua faapuloulou, ua uliuli e pei o se oreva.

¹²O ona mata e pei ni mata o se lupe e latalata ane i vaitafe, o loo taeele i le suāsusu ma nonofo i le mau.

¹³O ona alafau ua pei o se topasama, ma mea maupuepue o i ai laau manogi; o ona laugutu o susana ia, ua sisina ifo ai le muro sisina.

¹⁴O ona lima ua pei o mama auro ua tuuina i ai tasesa; o lona manava ua pei o nifo o elefane ua faapupulaina, ma ua ufitia i safaira.

¹⁵O ona vae o pou sesa ia, ua faatuina i luga o lago auro lelei; ua foliga o ia i Lepanona, ua sili ona lelei e pei o arasi.

¹⁶O lona fofoga ua matuā leo malie. Ua atoatoa ona lelei o ia. Tama fafine a Ierusalema e, o lo‘u manamea lava lea, o la‘u uo foi lea.