Read Samoan Old Version Bible – O LE TUSI PAIA ISAIA, 1 Bible Online

ISAIA, 1 - Samoan Old Version Bible – O LE TUSI PAIA bible

ISAIA, 1

¹O le faaaliga ia Isaia le atalii o Amota, na ia vaaia ia Iuta ma Ierusalema, i ona po o Usia, o Iotama, o Aasa, ma Esekia, o tupu o Iuta.

²Le lagi e, faalogo mai ia; le lalolagi e, uai mai ia ou taliga; auā ua fetalai mai Ieova, Ua ou tausia ma a‘oa‘oina le fanau, a ua latou foua a‘u.

³Ua iloa e le povi le na te tausia o ia, ua iloa foi e le asini le mea e fagaina ai o ia e le na te tausia o ia; a o Isaraelu, ua le iloa e i latou, ua le mafaufau lava lo‘u nuu.

⁴Oi talofa i le nuu agasala, o le nuu e agasala tele lava, o le tupulaga amio leaga, o le fanau e leaga lava i latou; ua latou lafoaiina Ieova; ua latou ‘ino‘ino i le Paia o Isaraelu, ua tuumuli lava i latou.

⁵Se a le mea e toe sasaina ai outou? Tou te o ese pea ea? O loo ma‘i le ulu uma, o loo vaivai le loto uma.

⁶E afua i le alofivae e oo lava i le ulu, e leai se mea ua sao; a o manua, ma faalavalava, atoa ma le papala ua aati, e lei faasooina, e lei fusia, e lei faamāluina foi i le suāuu.

⁷O lo outou nuu ua faatafunaina, o a outou aai ua susunuina i le afi; o fua o lo outou laueleele ua ‘aina e tagata ese i o outou luma, ua faatafunaina, ua faaumatia lava e tagata ese.

⁸Ua tuua foi le tama fafine a Siona e pei o se fale apitaga i le tovine, e pei o se fale i le mea ua totō ai kukuma, e pei o se aai ua vagaia.

⁹Ana le faatotoeina e Ieova o ‘au ni nai toaitiiti lava ia i tatou, po ua avea i tatou e pei o Sotoma, po ua tusa i tatou ma Komoro.

¹⁰Faipule o Sotoma e, faalogologo mai ia i le afioga a Ieova; le nuu o Komoro e, ina uai mai ia o outou taliga i le tulafono a lo tatou Atua.

¹¹O loo faapea mai Ieova, Se a ea le aoga ia te au o a outou taulaga e tele? Ua ou fiu i taulaga mu e fai i mamoe poa, ma le ga‘o o manu pepeti; ou te le fiafia lava i toto o povi poa taanoa, ma tamai mamoe, atoa ma ‘oti poa.

¹²A outou o mai ia iloa outou i o‘u luma, o ai ea na fai atu lea mea ia te outou e soli ai o‘u lotoā?

¹³Aua ne‘i tou toe au mai taulaga le aoga, o mea manogi e mu, e inosia lea e a‘u; o le masina faatoa vaaia, ma le sapati ma le talaiga o faapotopotoga ou te le mafaia lava, o le agasala lava lea, o le faapotopotoga lava.

¹⁴O outou masina faatoa vaaia ma outou faapotopotoga, e ‘ino‘ino ai lo‘u loto; ua fai lava ma mea mamafa ia te au, a a‘u lailoa i tauave.

¹⁵A outou faaloaloa mai o outou lima, e ‘alo ese o‘u mata ia te outou; e ui lava ina outou faateleina tatalo, ou te le faalogo ai lava; ua tutumu o outou lima i le toto.

¹⁶Ina fafano ia outou, ina faamamā ia outou; faate‘a ese ia a outou galuega leaga i o‘u luma, soia tou te fai mea leaga.

¹⁷Ia outou faamasani i le amio lelei, sailiili ia i le faamasinoga; ia outou faasaoina le ua sauaina, ia outou faamasino i le ua matuaoti, ia outou finau mo le fafine ua oti lana tane.

¹⁸O loo o faapea mai Ieova, O mai ia, ina tatou filifili ia, e ui lava ina pei o ofu mūmū a outou agasala, e sisina ia e pei o le kiona; e ui lava ina mūmū ia e pei o le ie ulaula, e avea e pei o fulufulu mamoe.

¹⁹Afai tou te gauai ma outou faalogo, tou te aai ai mea lelei o le laueleele.

²⁰A e afai tou te le mafafai ma outou fouvale, e faaumatia ai outou i le pelu; auā ua fetalai mai ai le fofoga o Ieova.

²¹Aue! ua avea ma talitane le aai sa faamaoni; sa tumu i le faamasinoga, sa nofo ai le amiotonu; a o ona po nei, o loo o nonofo ai o e fasioti tagata.

²²O lau ario ua avea lea ma otaota; ua sui i le vai lau uaina.

²³O ou alii sili e vaogatata i latou, e fefaauoai ma e gaoi, ua naunau i latou uma i mea alofa, ua tausisi foi i taui; latou te le faamasino i le ua mātuaoti, ua le oo atu foi ia te i latou le finauga a le fafine ua oti lana tane.

²⁴O le mea lea o loo faapea mai ai le Alii, o Ieova o ‘au, o le Malosi o Isaraelu, Aue! ou te taui atu i e ua agaleaga mai ia te au, ou te faasalaina e ua ita mai ia te au.

²⁵Ou te faafoi atu foi lo‘u lima ia te oe, ma ou matuā faate‘a ese lou otaota, ou te aveeseina foi lau ‘apa sinasina uma lava.

²⁶Ou te toe faafoi atu ou faamasino e pei o anamua, ma ou faipule e pei o le amataga; mulimuli ane, ona igoa ai lea o oe, O le aai amiotonu o le aai faamaoni.

²⁷E faaolaina Siona i le faamasinoga; o e liliu mai foi, e faaolaina i latou i le amiotonu.

²⁸A e oo faatasi le malaia o e solitulafono atoa ma e agasala; o e lafoai foi Ieova e faaumatia lava i latou.

²⁹Auā e faamaina i latou ona o tapeneto ua outou mananao ai, e masiasi foi outou ona o ulu laau ua outou loto i ai.

³⁰Auā tou te faapei o se tapeneto e mamae ona lau, e faapei o se ulu laau foi e le o i ai se vai.

³¹E avea ma lino le ua malosi, o lana galuega foi e avea ma aloiafi; e mu faatasi i laua uma, e leai foi se na te tineia.