Read Samoan Old Version Bible – O LE TUSI PAIA ISAIA, 13 Bible Online

ISAIA, 13 - Samoan Old Version Bible – O LE TUSI PAIA bible

ISAIA, 13

¹O le avega a Papelonia na vaaia e Isaia le atalii o Amota.

²Faatu ia le tagavai i le mauga tula, ina leo tele ia ia te i latou, ina lui tau atu ia le lima, ia latou ulu atu ai i faitotoa o alii sili.

³O a‘u lava, ua ou fai atu i o‘u tagata ua tofia, ua ou valaau lava i o‘u tagata totoa, ia oo ai lo‘u ita, o o‘u tagata mitamita ma le faamaualuluga.

⁴O le taalili o le vao tagata i mauga, peiseai o se nuu e toatele lava, o le taalili o le faanunununu o malo o nuu ese ua faapotopoto mai; o Ieova o ‘au o loo aofai e ia o ‘au e tau ai le taua.

⁵Ua latou o mai i le nuu mamao, mai le tuluiga o le lagi, o Ieova ma auupega o lona toasa, ina ia faaumatia le nuu uma lava.

⁶Ina uio ia, auā ua latalata le aso o Ieova, e oo mai pei o se malaia mai Le e ona le malosi uma lava.

⁷O le mea lea e vaivai ai lima uma, e faavaivai ai foi loto o tagata uma;

⁸ona latou atuatuvale ai lea; e maua i latou i le puapuaga ma le faatiga; latou te oono faapei o le fafine a fanau; latou te fevāaiai le tasi i le tasi ma le fememeai; o latou mata o mata afi mumū ia.

⁹Faauta, o loo sau le aso o Ieova, e ogogo i le toatamai ma le toasa tele; e fai ai le nuu ma faatafunaga; na te faaumatia foi tagata agasala o i ai.

¹⁰Auā o fetu o le lagi ma ona faaputuputugāfetu, e le fepulafi mai i latou; e faapouliuligia le la i lona alu ae, o le masina foi e le susulu mai lona malamalama.

¹¹Ou te faasalaina le lalolagi ona o a latou amio leaga, o tagata ulavavale foi ona o a latou agasala; ou te faaumatia foi le faasausili o e faamaualuluga, ou te lafotuina i lalo le faasiasia o e faasaua.

¹²Ou te faatoaitiitia tagata e sili i le auro lelei, o tagata lava e sili ona toaitiiti i le auro o Ofeira.

¹³O le mea lea ou te faagateteina ai le lagi, e lulueseina foi le lalolagi i le mea o i ai, i le toatamai o Ieova o ‘au, ma le aso o lona toasa tele.

¹⁴E pei o le sevi ua tulia, e pei o le lafu mamoe foi e leai se na te faapotopotoina, latou te taitasi ma liliu atu i lona lava nuu, latou te taitasi foi ma sola i lona lava laueleele.

¹⁵O i latou uma e maua e tutu‘i ia te i latou, atoa ma i latou uma e puea, e oti i latou i le pelu.

¹⁶E palasi a latou tama meamea i o latou luma; e vetea o latou fale, e fetosoina foi a latou ava.

¹⁷Faauta, ou te faaoso atu Metai e tau ma i latou, latou te le manatu i ario, e le mananao foi i latou i auro.

¹⁸O a latou aufana e nutimomomoina ai taulelea, latou te le alolofa foi i fanau, latou te le faasaoina tama.

¹⁹O Papelonia foi, o le ua sili ona matagofie i malo, o le aai matagofie e mitamita ai Kaletaia, e avea lava lea e pei o le faaumatia o Sotoma ma Komoro e le Atua.

²⁰E le toe āina e faavavau, e le mau ai lava se tasi i lea tupulaga ma lea tupulaga; e le to lauapi ai foi le Arapi, o leoleo mamoe foi latou te le ave ai o latou lafu e taooto ai.

²¹A e taooto ai manu feai o le vao, e tutumu foi o latou fale i lulu, e mau ai foi iaena, e taaalo ai foi ‘oti o le vao.

²²E tagi foi aie i o latou maota, atoa ma luko i maota sa fiafia ai. E lata mai ona po, e le faalevalevaina foi ona aso.