Read Samoan Old Version Bible – O LE TUSI PAIA ISAIA, 14 Bible Online

ISAIA, 14 - Samoan Old Version Bible – O LE TUSI PAIA bible

ISAIA, 14

¹Aua e alofa Ieova ia Iakopo, na te toe filifilia foi Isaraelu, ma faanofofilemuina i latou i lo latou laueleele; e faaopoopo mai foi tagata ese ia te i latou, latou te faatasi mai lava i le aiga o Iakopo.

²E ave foi i latou e nuu ma latou faaoo ia te i latou i lo latou nuu; e fai foi ia nuu e le aiga o Isaraelu mo latou i le laueleele o Ieova, e fai ma auauna tane ma auauna fafine; latou te fai foi ma tagata o taua o i latou sa faia i latou ma tagata o taua, latou te pule foi i e sa faasaua ia te i latou.

³O le aso foi e faafilemuina ai oe e Ieova i lou tiga, ma lou atuatuvale, ma lau galuega mamafa sa e faia,

⁴e te sauni ai lenei faataoto i le tupu o Papelonia, ma e faapea atu, Aue! ua mavae atu o le na faasaua, ua mavae atu le na fao auro.

⁵Ua gauia e Ieova le sasa a e amio leaga, o le tootoo o e na pule.

⁶O le na taia nuu i le ita tele, o le ta e le aunoa, o le na pule i nuu ese i le ita ma le saua na le vaoia.

⁷Ua mapu le lalolagi uma, ua filemu lava; ua latou alalaga ma le fiafia.

⁸O perosi foi ua olioli ona o oe, atoa ma arasi o Lepanona, o loo faapea, Talu ona e taoto ua le alu ae ia te i matou sē ta laau.

⁹O seoli i lalō ua faagaeetia ona o oe, e faafetaiai ia te oe i lou alu atu; ua lagaina ona o oe agaga o e ua oti, o alii sili uma o le lalolagi; e faatulaiina tupu uma o nuu ese i o latou nofoālii.

¹⁰O i latou uma latou te tautala atu, ma faapea atu ia te oe, O oe foi ua e vaivai ea e pei o i matou? ua avea ea oe e tutusa ma i matou?

¹¹Ua faaoo ifo i seoli lou faalialia ma le leo o au napeli; ua folasia ilo i lalo ia te oe, ua fai foi anufe mou ie afu.

¹²Oi! ua faapea ona paū mai le lagi o oe le ua pupula, le atalii o le taeao; ua taia oe i lalo i le eleele, o oe sa faatoilaloina nuu ese.

¹³O oe foi sa e faapea ifo i lou loto, Ou te alu ae i le lagi, ou te siitia i luga lo‘u nofoālii ia sili i fetu a le Atua, ou te nofo foi i le mauga o le faapotopotoga i le itu i matu;

¹⁴ou te alu ae i luga o mea maualuluga i luga ae o ao; ma te tutusa ma lē Silisili ese.

¹⁵A ua aveina ifo oe i seoli i itu o le lua.

¹⁶O i latou o e vāai ia te oe latou te pulatoa ia te oe, latou te mafaufau ia te oe, ma faapea ane, O le tagata ea lenei sa faagateteina le lalolagi, sa na luluina malo?

¹⁷o le na faia ma vao le atu laulau, ma na faatafunaina aai sa i ai; sa na le tuuina atu ona tagata o taua e ō i o latou aiga?

¹⁸O tupu uma o nuu, o i latou uma lava, latou te taooto ma le mamalu, taitasi i lona fale lauasi;

¹⁹a o oe, ua lafoaiina oe, ua leai sou tuugamau, e pei o se tatupu ua inosia; ua ufitia i e ua fasia, ua tutu‘i i latou i le pelu, o e ua o ifo i maa o le lua, e pei o se tino oti ua solia.

²⁰E le faatasia oe ma i latou i le tuugamau, auā ua e faaumatia lou laueleele, ua e fasiotia lou nuu; e le ta‘ua lava e faavavau le fanau a e amio leaga.

²¹Ia outou sauni le fasiga o lana fanau ona o le agasala a o latou mātua; ina ne‘i latou tutū i luga ma fai mo latou le nuu, ma latou faatumuina le foga eleele uma i aai.

²²O loo faapea mai Ieova o ‘au, Ou te tu i luga e tau ma i latou; ou te tineia foi i Papelonia o le igoa, ma e o totoe, o le atalii atoa ma le atalii o lona atalii, o loo fetalai mai ai Ieova.

²³Ou te faia foi ia ma mea e nofo ai le kifota, ma vailepa; ou te matuā tafitafi foi i le tafi e faaumatia a‘i, o loo fetalai mai ai Ieova o ‘au.

²⁴Ua tauto Ieova o ‘au, o loo faapea mai, E moni, e pei ona ou manatu e faapea lava ona taunuu, e pei ona a‘u pule e faapea lava ona faatumauina;

²⁵ina ia tu‘imomomoina Asuria i lo‘u laueleele, ma ou soli ia te i latou i luga i o‘u mauga; ona mavae atu ai lea o a latou amo ia te i latou, ma a latou avega foi e mavae atu ia i o latou fuataua.

²⁶O le pule lenei ua pule ai o ia i le lalolagi uma, o le lima foi lenei ua faaloaloaina atu i nuu ese uma.

²⁷Auā o Ieova o ‘au ua pule o ia, o ai ea se na te faaleaogaina? o lona aao ua faaloaloaina atu, o ai ea se na te faafoisia?

²⁸O le tausaga na maliu ai le tupu o Aasa, na oo mai ai lenei avega.

²⁹Filisitia atoa e, aua e te olioli oe ina ua gauia le tootoo sa taia a‘i oe; auā o le tino o le gata e tupu mai ai le gata uogo, o lana tama foi, o le gata lele lea.

³⁰E aai foi ulumatua a e ua matitiva, o e le tagolima foi latou te taooto ma le filemu; ou te faamateina foi lou pogai i le oge, o e ua totoe ia te oe e fasia i latou e ia.

³¹Le faitotoa e, ina uio ia; le aai e, ina alaga ia; Filisitia atoa e, ua matuā faavaivaia oe; auā ua sau le asu mai le itu i matu, e leai foi se te‘a ese i lana itu taua.

³²Se a foi se tali i sāvali a nuu ese? Ua faavaeina Siona e Ieova, e sulusulufa‘i foi i ai e ua tigaina i lona nuu.