Read Samoan Old Version Bible – O LE TUSI PAIA ISAIA, 15 Bible Online

ISAIA, 15 - Samoan Old Version Bible – O LE TUSI PAIA bible

ISAIA, 15

¹O le avega a Moapi. O le po ua faatafunaina ai Aro o Moapi, ua faaumatia lava; o le po ua faatafunaina ai Kira o Moapi, ua faaumatia lava.

²Ua latou o ae i le fale atoa ma Tipona, o mea maualuluga e fetagisi ai; ua uio Moapi i Nepo ma Metepa; ua sele mamā o latou ulu uma, ua sala ‘ava uma.

³Ua latou lavalava i ie talatala i o latou ala, ua latou uio uma lava i luga o latou fale atoa ma o latou malae; ua latou o ifo o fetagisi lava.

⁴Ua alalaga Hesepona ma Eleale; ua lagona o latou leo mai Iaesa; o le mea lea ua uio ai ‘au a Moapi; ua tiga tele lava o latou loto.

⁵O loo alaga lo‘u loto ona o Moapi; ua oo lo latou tuli i Soara, o le povi fafine e tolu ona tausaga; ua latou o ae lava i le aega i Luita o fetagisi; ua latou alalaga i le ala i Horonaima ona o lo latou malaia.

⁶Ua avea le vai o Nimara ma mea naumati; auā ua magumagu le mutia, ua faaumatia le vao mu‘a, ua le toe ai lava laau iti;

⁷o le mea lea ua avea ai mea na latou maua, atoa ma o latou oloa na teu, i tala atu o le vaitafe o garava.

⁸Auā ua faataamilomilo le alaga i tuaoi o Moapi; ua oo lo latou uio i Ekilaima, ua oo foi lo latou uio i Pere-alima.

⁹Auā ua tutumu vai o Timone i le toto; auā foi ou te faaoo atili ni malaia i Timone; ou te auina leona i e ua sao o Moapi ma e ua totoe i le laueleele.