Read Samoan Old Version Bible – O LE TUSI PAIA ISAIA, 18 Bible Online

ISAIA, 18 - Samoan Old Version Bible – O LE TUSI PAIA bible

ISAIA, 18

¹E! le nuu e ua palalu ona apaau, o le ua i ona tala atu o vaitafe o Aitiope.

²O le ua tuu sāvali e ui i le sami, i vaa kome foi i fogātai; ina o ia outou savali tele vavave i le nuu malosi ma le totoa, o le nuu matautia talu lona amataga; o le nuu matuā malosi lava ma le manumalo; ua soosoo vaitafe lo latou laueleele.

³O outou uma o e nonofo i le atu laulau, o outou foi o e mau i le lalolagi, a faatuina le tagavai i mauga ia outou vāai atu i ai; a ilia foi le pu ia outou faalogo i ai.

⁴Aua ua faapea ona fetalai mai o Ieova ia te au, Ou te nofo filemu, ma ou vaai atu i le mea ou te nofo ai, e pei o le vevela tele i laau iti, e pei o le sau ua totō i le vevela i ona po e selesele ai.

⁵Auā a o lei oo i ona po e selesele ai, a mavae le fuga, a liu vine moto foi le fuga, e sala e ia ona la i polo teu vine, na te aveeseina moemoe ina ua vavaeeseina.

⁶E tuua i latou faatasi mo manu felelei e feai o i mauga, ma manu foi e tataa i le laueleele; e atoa le tau vevela e nonofo ai manu felelei, e atoa foi le tau maalili e nonofo ai manu uma e tataa i le laueleele.

⁷O ona po ia e au mai ai mea alofa ia Ieova o ‘au, e le nuu malosi ma le totoa, o le nuu foi e matautia talu lona amataga, o le nuu matuā malosi lava ma le manumalo, ua soosoo vaitafe lo latou laueleele, e aumaia i le mea o i ai le suafa o Ieova o ‘au, o le mauga o Siona.