Read Samoan Old Version Bible – O LE TUSI PAIA ISAIA, 20 Bible Online

ISAIA, 20 - Samoan Old Version Bible – O LE TUSI PAIA bible

ISAIA, 20

¹O le tausaga na sau ai Taretana i Asetota, ina ua auina o ia e Sarekona le tupu o Asuria, na ia tau foi ma Asetota, ua aea ai;

²o ona po ia ua fetalai mai ai Ieova ia Isaia le atalii o Amota, ua faapea mai, Alu ia, ina e tatala ese le ie talatala i lou sulugatiti, ma ia e to ese ou see i ou vae; ona faia lava lea e ia, ua savali e le ofu, ma ona vae ua le faaseeina.

³Ona fetalai mai lea o Ieova, E faapei ona savali o la‘u auauna o Isaia e le ofu, e le faaseeina, i tausaga e tolu o le faailoga ma le faatusa ia Aikupito ma Aitiope;

⁴e faapea lava ona ta‘ita‘iina atu e le tupu o Asuria e ua faatagataotauaina o Aikupito ma le tafeaga o Aitiope, o taulelea atoa ma toeaina, e le o ofu, ma o latou vae e le faaseeina, ma o latou nofoaga ua le ufitia, o le mea e masiasi ai Aikupito.

⁵Ona latou fefefe ai lea, ma latou masiasi lava ona o Aitiope sa latou faamoemoe i ai, ona o Aikupito foi sa latou mitamita ai.

⁶Ona fai ane ai lea i lea aso o le ua mau i lenei nuu e tuaoi ma le sami, Faauta, e faapea lava le sa tatou faamoemoe i ai, sa tatou sosola i ai e maua ai se fesoasoani, ina ia laveaiina i tatou ai le tupu o Asuria; pe faapefea foi ona sao o i tatou?