Read Samoan Old Version Bible – O LE TUSI PAIA ISAIA, 22 Bible Online

ISAIA, 22 - Samoan Old Version Bible – O LE TUSI PAIA bible

ISAIA, 22

¹O le avega a le vanu o le faaaliga. Pe faapefea lava oe ina ua o ae ou tagata uma i luga o fale?

²Sa tumu oe i vāvāō, o le aai e pisapisao, o le aai e olioli lava; o ou tagata fasia e lei fasia i latou i le pelu, e lei oti foi i le taua.

³Ua sosola faatasi ou alii uma, ona o aufana ua fusifusia lava i latou; ua fusifusia faatasi i latou uma o e na maua ua ia te oe, o e na sosola mai i le mea mamao.

⁴O le mea lea na ou fai atu ai, Ia outou liliu ese ia te au; ou te tagi lotulotu lava, aua tou te finau e faamafanafana mai ia te au, ona o le faatafunaina o le tama fafine a lo‘u nuu.

⁵Auā o le aso o le pisapisao, ma le soliga, ma le fememeai mai le Alii o Ieova o ‘au i le vanu o le faaaliga, o le aso e lepetia ai pa, ma alalaga atu ai i mauga.

⁶Ua tauave e Elama le utu, faatasi ma kariota ua i ai tagata ma e tietie i solofanua; ua to ese foi e Kira le ufiufi o le talita.

⁷Ua tutumu ou vanu e sili ona lelei i kariota, ua pae tau mai foi ‘au e tietie i solofanua i le faitotoa.

⁸Ua to ese le ufiufi o Iuta, o lea aso foi e te faasaga ai i auupega o i le fale i le vao.

⁹Ua outou vaavaai i mea ua lepetia i le aai o Tavita ina ua tele, ma outou faapotopotoina le vai o le lepa aupito i lalo.

¹⁰Ua outou faitauina foi fale o Ierusalema, ma outou lepetia fale e teu a‘i le ‘olo.

¹¹Ua outou elia se mea i le va o pa e lua e tali ai le vai o le lepa tuai; a ua outou le faasaga atu i le ua tupu ai ia mea, ua outou le vaai atu foi i le na saunia ai anamua.

¹²O lea aso foi ua valaau mai ai le Alii o Ieova o ‘au ia fetagisi, ma ia taufaitagitu‘i, ma ia sele mamā lauulu, ma ia lavalava i ie talatala.

¹³Faauta foi, o le fiafia ma le olioli, o le fasiga o povi ma le fasiga o mamoe, o loo aai tufaaga ma inu uaina, Ina tatou aai ia, ma inu; auā a taeao tatou te oti ai.

¹⁴A ua faaalia mai i o‘u taliga e Ieova o ‘au e matuā le faamagaloina lena agasala ia te outou e oo i lo outou oti, o loo faapea mai ai le Alii o Ieova o ‘au.

¹⁵Ua faapea ona fetalai mai o le Alii o Ieova o ‘au, Sau ia, ina alu i lena auauna ua pule, o Sevena foi, o le ua pule i le aiga, ia faapea atu i ai,

¹⁶Se a ea se mea ua ia te oe iina? o ai ea foi o ia te oe i le mea nei? ina ua e elia mo oe se tuugamau i le mea nei, ua eli e ia lona tuugamau i le mea maualuga, ua foa i le papa se fale mo ia.

¹⁷Faauta, o Ieova na te matuā lafotuina oe ma le malosi tele, na te ufitia lava oe.

¹⁸Na te matuā lialiai oe, e lialiai e pei o se mea lapotopoto e sasau atu i le nuu lautele; e te oti ai, e i ai foi ou nofoa faataavalevale matagofie, o le gao o le aiga o lou alii.

¹⁹Ou te tulia oe i lou tofi, ou te lafotuina foi oe i le mea ua ē tu ai.

²⁰O lea aso foi ou te valaauina ai la‘u auauna o Eliakimo le atalii o Hilikia;

²¹ou te faaofuina foi o ia i lou ofu; ma ou faamalosi ia te ia i lou fusi; ou te tuuina atu ia te ia lau pule, e avea foi o ia ma tamā o e nonofo i Ierusalema atoa ma le aiga o Iuta.

²²Ou te faaee foi le ki a le aiga o Tavita i lona ua; na te tatalaina, a e leai se na te puipuia; na te puipuia foi, a e leai se na te tatalaina.

²³Ou te faamauina o ia e pei o le fao i le mea e mausali ai, e fai foi o ia ma nofoālii mamalu i le fale o lona tamā;

²⁴latou te tāutau ia te ia o le tele o mea uma o i le fale o lona tamā; o e tutupu ai, ma e ua fanau mai ai, o ipu iti uma lava, o ipu faaofuofu, atoa ma fagu uma.

²⁵O loo fetalai mai Ieova o ‘au, O lea aso e aveeseina ai le fao sa faamauina i le mea sa mausali ai, e vaevaea foi, ma paū; e salaeseina foi le mea o tautau ai; auā ua fetalai mai ai Ieova.