Read Samoan Old Version Bible – O LE TUSI PAIA ISAIA, 24 Bible Online

ISAIA, 24 - Samoan Old Version Bible – O LE TUSI PAIA bible

ISAIA, 24

¹Faauta, o loo sasaaina e Ieova le nuu ia uma, na te faafaōina, na te faataapeapeina foi e o nonofo ai.

²E iu ina tutusa o le nuu ma le ositaulaga; e tutusa le auauna ma lona alii; e tutusa le auauna fafine ma lona matai fafine; e tutusa le ua faatau atu ma le ua faatau mai; e tutusa le ua avatu mea ma le ua aitalafu; e tutusa le ua talia le totogi faasili ma le ua avatu le totogi faasili.

³E matuā sasaaina le nuu, e matuā vetea lava; auā ua fetalai mai Ieova lenei fetalaiga.

⁴Ua faanoanoa le lalolagi, ua mamae; ua faavaivai le atu laulau, ua mamae; ua faavaivai alii sili o le nuu.

⁵Ua leaga le nuu i e o nonofo ai; auā ua latou solia tulafono; ua latou liliu ese le sauniga; ua latou solia le feagaiga e faavavau.

⁶O le mea lea e faaumatia ai le nuu i le faafano, ua faasalaina foi e o nonofo ai; o le mea lea ua susunuina ai e o nonofo i le nuu; e toaitiiti foi tagata ua totoe.

⁷Ua faanoanoa le sua vine, ua faavaivai le vine; ua mapuitiga i latou uma e sa olioli o latou loto.

⁸Ua mavae le fiafia o topa; ua uma le pisa o e na olioli; ua mavae le fiafia o le kitara.

⁹Ua latou le toe inu uaina ma pepese; e oona le ‘ava ia te i latou o e feinu ai.

¹⁰Ua lepetia le aai gaogao; ua punitia fale uma, e le uia.

¹¹O i ala le alaga i le uaina; ua mavae atu le olioli uma; ua alu ese le fiafia o le nuu.

¹²Ua toe i le aai na o le faatafunaina, ua tu‘ipalaina le puipui.

¹³Auā e faapea ona fai i le laueleele i totonu o le nuu, e pei ona sasaina ifo o le olive, e pei o nai toe fuifui vine pe a uma le tauga vine.

¹⁴Latou te leo tetele, latou te alalaga fiafia, ona o le mamalu o Ieova, latou te alalaga mai le sami.

¹⁵O le mea lea ia outou vivii atu ai ia Ieova i le afi, i nuu tuloto i le sami, o le suafa lava o Ieova o le Atua o Isaraelu.

¹⁶Ua tatou faalogo i pese mai le tuluiga o le lalolagi; o le viiga i le ua amiotonu; a ua ou fai atu, Ua malaia a‘u nei! ua malaia a‘u nei! Aue a‘u nei! O e faasaua ua latou faasaua, o le saua lava ua faasaua mai ai e ua faasaua.

¹⁷Ua ia te oe le nofo i le nuu le mata‘u, ma le lua, ma le mailei faasaua.

¹⁸O le ua sola i le leo o le mea e faamata‘u a‘i, e paū o ia i le lua; o le ua alu ae foi i le lua e lavea o ia i le mailei; auā ua faaavanoa pupuni i lugā, e luluina foi faavae o le lalolagi.

¹⁹Ua matuā gaugauina le nuu, ua matuā nutililii le nuu, ua matuā luluina le nuu.

²⁰Ua tautevateva le nuu e pei o le tagata onā, ua feluea‘iina e pei o le moega tautau; ua mamafa lona fouvale i luga ia te ia; e paū ai o ia, e le toe tu lava.

²¹O lea aso foi e faasala ai Ieova i ‘au i lugā i le mea maualuga, atoa ma tupu o le lalolagi i le lalolagi.

²²E faapotopotoina i latou pei ona faapotopotoina e ua fusifusia i le lua; e puipuia foi i latou i le fale puipui; a mavae foi aso e tele, ona asiasia ai lea o i latou.

²³E faamaina le masina, e masiasi foi le la, auā e fai ma tupu Ieova o ‘au i le mauga o Siona ma Ierusalema, i luma foi o ona toeaina ma le mamalu.