Read Samoan Old Version Bible – O LE TUSI PAIA ISAIA, 26 Bible Online

ISAIA, 26 - Samoan Old Version Bible – O LE TUSI PAIA bible

ISAIA, 26

¹O lea aso e pese ai lenei pese i le laueleele o Iuta, Ua ia te i tatou le aai malosi; o le faaolataga na te faia lea ma pa ma ‘olo.

²Ina to mai ia e outou o puipui, ina ia ulufale mai ai le nuu amiotonu o e tausi le mea moni.

³E te leoleoina ia fifilemu lava le ua mausali lona loto; auā ua ia faatuatua ia te oe.

⁴Ina faatuatua ia outou ia Ieova e faavavau lava; auā o Ioa Ieova, o le papa e faavavau ia.

⁵Auā ua ia lafotuina i lalo e sa nonofo i le mea maualuga; o le aai sa maualuga ua faamaulaloina e ia, ua faamaulaloina ua oo i le eleele, ua faagatasia ma le efuefu.

⁶E solia ia e vae, o vae lava o e tigaina, o vae foi o e matitiva.

⁷Ua laugatasi le ala o le ua amiotonu; o e na lē amiotonu, ua e faalauleleiina le ala o le ua amiotonu.

⁸E moni, Ieova e, ua matou faatalitali ia te oe i le ala o au faamasinoga; o le manao o matou loto o loo i ai lea i lou suafa, ma le faamanatuga ia te oe.

⁹Ua manao lo‘u loto ia te oe i le po; e moni, e ala saili ia te oe lo‘u agaga i totonu ia te au; auā e a‘oa‘oina e o nonofo i le atu laulau, pe a faia au faamasinoga i le lalolagi.

¹⁰E alofagia le ua amio leaga, a e le a‘oa‘o lava o ia i le amiotonu; o le nuu o i ai le amiotonu e agafaapiopio ai o ia, na te le manatua foi le mamalu o Ieova.

¹¹Ieova e, e siitia lou aao, a e latou te le vaavaai; latou te vaavaai lava, e faamāina foi i latou; o le maelega ona o lou nuu, e moni, o le afi ona o e ua ita ia te oe e faaumatia ai i latou.

¹²Ieova e, e te tuuina mai le manuia ia te i matou; auā foi ua e faia mo i matou a matou galuega uma.

¹³Ieova e, lo matou Atua, sa pule ia te i matou nisi alii e le na o oe ua na o oe lava matou te vivii atu ai i lou suafa.

¹⁴Ua oti i latou, latou te le toe ola; o agaga i latou, latou te le toe tutū; auā ua e faasalaina, ma faaumatia i latou, ua e faagaloina lava le manatu uma ia i latou.

¹⁵Ua e faatoateleina le nuu, Ieova e, ua e faatoateleina le nuu; ua viia lava oe; ua e faamamaoina tuaoi uma o le nuu.

¹⁶Ieova e, na latou sailiili ia te oe i lo latou puapuaga, na latou faapaūina atu le tatalo ona o lau aoaiga sa ia te i latou.

¹⁷E pei o le fafine to ua latalata ona fanau, ua tiga ia ma uio i lona faatiga; Ieova e, sa faapea lava i matou i ou luma.

¹⁸Sa totō i matou, sa faatiga, e peiseai na matou fanau ma le savili; e lei faia e i matou se faaolataga i le lalolagi, e lei pauu foi e o nonofo i le atu laulau.

¹⁹E toe ola mai ou tagata oti, o latou tino oti e toe tutū mai. Ina ala mai ia, ma alalaga fiafia outou e o nonofo i le efuefu; auā o lou sau e pei o le sau o le vao iti ia; e lafo atu foi e le eleele e ua oti.

²⁰Ina o mai ia, lo‘u nuu e; ina ulu atu ia i o outou afeafe, ma pupuni o outou faitotoa; ia outou lalafi e pei se emo ona puupuu, seia mavae atu le toasa.

²¹Auā faauta, o loo afio mai Ieova ai le mea o afio ai o ia, ina ia faasalaina e o nonofo i le lalolagi ona o a latou amio leaga; e faaalia foi e le eleele lana toto, na te le toe ufitia foi lana fasi.