Read Samoan Old Version Bible – O LE TUSI PAIA ISAIA, 29 Bible Online

ISAIA, 29 - Samoan Old Version Bible – O LE TUSI PAIA bible

ISAIA, 29

¹Oi talofa i Arielu, o Arielu, o le aai sa nofo ai Tavita. Ina faaopoopo ia o lea tausaga ma lea tausaga; ia latou fai pea foi o tausamiga.

²A e peitai ou te faatigaina Arielu; e i ai le faanoanoa ma le faavauvau; e ia te au foi o ia e pei o Arielu.

³Ou te to lauapi e vagavagai ia te oe; ou te siosio ia te oe i ‘au; ou te faatuina atu foi ‘olo e tau ai ma oe.

⁴E tuuina oe i lalo, e tautala mai oe mai le eleele, e leo itiiti mai au upu mai le efuefu; o lou leo foi e oo mai mai le eleele e pei o le ua i ai le aitu vavalo; e te leo iī foi mai le efuefu.

⁵E pei o le efuefu ninii le toatele foi o e ua ita ia te oe; o le toatele foi o e ua matautia e pei o aputi e lelea i latou; e faafuasei ua se emo lava ona oo mai.

⁶E asiasia oe e Ieova o ‘au i le faititili, ma le mafuie, ma le taalili tele; o le asiosio, ma le afā, ma le mumū o le afi e faaumatia ai.

⁷E pei o le miti, o le mea e vaaia i le po, e faapea foi le vao tagata o nuu uma o e tau ma Arielu, o i latou uma o e tau ma ia ma ona ‘olo, atoa ma i latou o e faatiga ia te ia.

⁸E pei o le ua fia ‘ai o loo fai lana miti, faauta, ua ‘ai lava ia; a ua ala mai, ua laina lava ia; e pei o le ua fia inu foi o loo fai lana miti, faauta, ua inu ia; a ua ala mai, faauta, ua mole, ua fia inu lava ia; e faapea lava le vao tagata o nuu uma o e tau i le mauga o Siona.

⁹Ia outou faatuatuai, ma ia outou ofo; ia outou olioli, a e tauaso outou; ua latou onā, a e le o le uaina; ua latou tautevateva, a e le o le ‘ava.

¹⁰Auā ua liligi atu e Ieova le agaga e moe gase ai i luga ia te outou, ua fusifusia foi e ia o outou mata; ua ia ufitia foi mata o perofeta atoa ma outou alii, o tagata vaai ia.

¹¹Ua avea foi le faaaliga o mea uma ia te outou e pei o upu a le tasi ua faamaufaailogaina; ua avatua i le ua iloa faitau, ua faapea atu, Se‘i faitau mai ia lenei tusi; a ua fai mai o ia, Ou te le mafai, auā ua faamaufaailogaina.

¹²Ona avatua lea o le tusi i le ua le iloa faitau, ua faapea atu, Se‘i faitau mai ia lenei tusi; a ua fai mai o ia, Ou te le iloa faitau.

¹³O le mea lea ua fetalai mai ai le Alii, Ua faalatalata mai lenei nuu ia te au i o latou gutu, ma latou vivii mai ia te au i o latou laugutu, a ua mamao lava o latou loto ia te au, o lo latou mata‘u foi ia te au ua a‘oa‘oina lea i upu a tagata;

¹⁴o le mea lava lea, faauta mai, o le a a‘u faia ai le vavega i lenei nuu, o le vavega lava, o le mea foi e ofo ai; e fano lava le poto o latou tagata popoto, e mavae foi le mafaufau o latou tagata mafaufau.

¹⁵Oi talofa i e o fai togafiti faaloloto ina ia lilo ai la latou filifiliga ia Ieova; ua fai i le pouliuli a latou mea, ma ua faapea ane i latou, O ai ea se vaai mai ia te i tatou? o ai foi se iloa mai i tatou?

¹⁶E! lo outou faatuiese e. Pe faatusaina ea le omea i le tufuga? pe fai atu ea le mea na faia i le na na faia, E lei faia lava a‘u e ia? pe fai atu ea le mea na gaosia i le na na gaosia o ia, E leai sona mafaufau?

¹⁷E le toe itiiti lava ea, ona liua lea o Lepanona ma fanua lafulemu, e ta‘ua foi le fanua lafulemu, o le vao matua?

¹⁸O le aso lava lea e lagona ai e o tutuli i upu a le tusi, e faapupulaina foi mata o e ua tauaso ina ua te‘a le pouliuli ma le pogisa.

¹⁹O e tigaina e faatuputeleina lo latou fiafia ia Ieova; o tagata matitiva foi e olioli i latou i le Paia o Isaraelu.

²⁰Auā ua mavae atu le na faasaua, ua faaumatia le na tauemu, e fasiotia foi i latou uma o e na mataala e fai mea leaga;

²¹o e na faasalaina le tagata i lana upu, ma latou taumailei i le ua fai finauga i le faitotoa, ma faaliliueseina fua lava le ua amiotonu.

²²O lenei, o loo faapea ona fetalai mai o Ieova, o le na laveaiina Aperaamo, ua faapea mai i le aiga o Iakopo, E le toe faamāina lava Iakopo, e le toe sesega foi ona mata.

²³Auā a vaai atu o ia i lana fanau, o le galuega a o‘u lima, i totonu ia te ia, latou te ta‘upaiaina lo‘u igoa, ma ta‘upaiaina le Paia o Iakopo, latou te matatau foi i le Atua o Isaraelu.

²⁴O e na sese i o latou loto, latou te iloa mafaufau; o e na muimui foi latou te a‘oa‘o ia popoto.