Read Samoan Old Version Bible – O LE TUSI PAIA ISAIA, 32 Bible Online

ISAIA, 32 - Samoan Old Version Bible – O LE TUSI PAIA bible

ISAIA, 32

¹Faauta, e pule le tupu ma le amiotonu, e pule foi alii ma le tonu.

²E fai foi le tagata e pei o se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foi o le papa tele i le nuu ua le o i ai se vai.

³E le faapouliuligia mata o e vaai; e uai mai foi taliga o e faalogo mai.

⁴O loto foi o e oso popole e mafaufau e iloa ai; o laulaufaiva foi o e nanu e vave ona matala a latou upu.

⁵E le toe ta‘uagaleleia le ua agaleaga, e le toe ta‘ua foi le ua mataoge, o le matamau.

⁶Auā e tautala le agaleaga i mea leaga, e sauni le agasala i lona loto, e fai amio faalematau, e tautala foi i mea sese ia Ieova, ina ia faamatelaina le tagata ua fia ‘ai, ua aveesea foi le mea e inu i le ua fia inu.

⁷O togafiti a le mataoge e leaga ia; ua taupulepule ia i togafiti e faaumatia ai i upu pepelo e ua tigaina; e faaumatia foi e ua matitiva a o tautala i latou i upu tonu.

⁸A o le ua matamau ua sauni e ia mea e matamau ai; o le matamau foi e faatumauina ai o ia.

⁹Ina tulai ia outou fafine o nonofo faafifilemu, ina faalogologo mai ia i lo‘u leo; o outou tama fafine faatalanoa, uai mai ia o outou taliga i a‘u upu.

¹⁰A mavae le tausaga ma ni aso e tupu a‘i, ona gatete ai lea outou fafine faatalanoa; auā e iu vale le fuata vine, e le oo ina faaputuina ona fua.

¹¹Ina gatete ia outou fafine o nonofo faafifilemu; ina tetemu ia outou fafine faatalanoa; to ese ia o outou ofu, ina faasau ia, ma ia lavalava outou i ie talatala.

¹²Latou te tu‘i i o latou susu, ona o le fanua matagofie, ona o vine fua tele.

¹³E tutupu mai i le laueleele o lo‘u nuu o laau talatala ma laau tuitui, e tutupu lava i luga o fale ua outou fiafia i ai i le aai e olioli.

¹⁴Auā e tuufua maota, e lafoaiina le aai sa taalili ai tagata; o Ofele ma le ‘olo e fai ma ana e faavavau; o le mea e fiafia i ai asini o le vao, o le mea e tataa ai le lafu;

¹⁵seia liligi ifo i luga ia te i tatou le Agaga mai lugā, ma ia avea ma fanua lafulemu le vao lafua, e ta‘ua foi le fanua lafulemu, o le vao matua.

¹⁶Ona mau ai lea o le faamasinoga i le vao lafulafua, e nofo foi le amiotonu i le fanua lafulemu.

¹⁷O le mea e tupu i le amiotonu o le manuia lea; e tupu mai foi i le amiotonu le filemu ma le saogalemu e faavavau.

¹⁸E nonofo foi lo‘u nuu i le mea e manuia ai, ma fale e saogalemu ai, ma mapusaga e filemu ai.

¹⁹A e totō ifo le uato‘a i le faapaūina o le vao; e lafoina foi i lalo le aai i le mea maulalo.

²⁰Amuia outou o e luluina saito i tafatafa o vai uma, o e tuuina atu i ai vae o povi ma asini.