Read Samoan Old Version Bible – O LE TUSI PAIA ISAIA, 34 Bible Online

ISAIA, 34 - Samoan Old Version Bible – O LE TUSI PAIA bible

ISAIA, 34

¹Ina faalatalata mai ia outou nuu ese ina ia faalogologo mai ai; outou nuu foi, uai mai ia o outou taliga; faalogologo mai ia le lalolagi ma mea uma ua tumu ai, o le atu laulau ma mea uma ua tutupu mai ai.

²Auā o loo i nuu ese uma le toatamai o Ieova, o lona toasa foi o loo i a latou ‘au uma lava; ua ia faafanoina i latou, ua ia tuuina atu lava i latou ia fasiotia.

³E lafoaiina lo latou fasi, e alu ae foi le elo i o latou tino oti, e tafeesea mauga i o latou toto.

⁴E mavae foi ‘au uma lava a le lagi, e taataaia le lagi e pei o se tusi; e pauu a latou ‘au uma lava, e pei ona paau o lau o le vine, e pei ona paau o lau o le mati.

⁵Auā e onā la‘u pelu i le lagi; faauta, e alu ifo ia i luga o Etoma, i luga lava o le nuu ua ou faafanoina, ina ia faasalaina.

⁶Ua maona le pelu a Ieova i le toto; ua mălie i le ga‘o; o le toto o tamai mamoe ma ‘oti, o le ga‘o o i ai fatuga‘o o mamoe poa; auā e ia Ieova le taulaga i Posara, ma le fasi tele i le laueleele o Etoma.

⁷E pauu foi rema faatasi ma i latou, ma povi taanoa faatasi ma povi poa; e onā o latou laueleele i le toto, e mălie foi lo latou efuefu i le ga‘o.

⁸Auā e ia Ieova le aso e taui ai ma sui; o le tausaga e taui atu ai i e o finau ma Siona.

⁹E liu pulu safeta ona vaitafe, e liu teio foi ona efuefu, e avea foi lona laueleele ma pulu safeta o mu.

¹⁰E le tineia lava ia i le po, po o le ao; e pusa ae pea lava lona asu; e tuufua ia i lea tupulaga ma lea tupulaga, e le uia e faavavau faavavau lava.

¹¹A e faia mo kati ma kitofa; e nonofo ai foi o inesofe ma oreva; na te faloina foi i ona luga le fua e faagaogaoina ai, ma le fua faatautau e faatuufuaina ai.

¹²E le o i ai foi ni ona alii latou te tofia e pule; o ona alii sili e le toe ai lava so latou.

¹³E tutupu ae laau tuitui i ona maota, o vao ogoogo foi ma laau talatala e tutupu i ona ‘olo; e avea foi ma mea e nonofo ai luko, ma mea e nonofo ai iaena.

¹⁴E fetaiai ai manu feai o le vao ma aie; e fevalaauai foi ‘oti o le vao, e nofo filemu ai le lilita, e maua ai foi e ia se mea e malolo ai.

¹⁵E fai ai e le kifosa lona ofaga, ma tuu ai ona fua, ma togitogi ai, e ufiufi foi i ai i lona tino; e faapotopoto ai taie e tailua.

¹⁶Ina sailiili ia i le tusi a Ieova, ma faitau i ai; e leai so latou e iu vale; e leai se tasi e le iloa lona soa; auā o lona fofoga ua fetalai atu ai, o lona agaga foi, o ia na te faapotopotoina i latou.

¹⁷O ia foi na faia le vili mo i latou, o lona aao na vaevaeina ai mo i latou i le fua faataoto; e faia mo i latou e faavavau, latou te mau ai i lea tupulaga ma lea tupulaga.