Read Samoan Old Version Bible – O LE TUSI PAIA ISAIA, 35 Bible Online

ISAIA, 35 - Samoan Old Version Bible – O LE TUSI PAIA bible

ISAIA, 35

¹E Olioli ona o i latou le vao lafulafua, ma le nuu naumati; e fiafia le toafa, ma fua mai e pei o le aute.

²E fua tele mai lava ia, e fiafia foi ma le fiafia tele, ma le alaga; e avatu i ai le lalelei o Lepanona, ma le matagofie o Karamelu ma Sarona, latou te vaavaai i le pupula o Ieova, o le matagofie o lo tatou Atua.

³Ia outou faamalosi i lima ua gagase, ia outou faamalosi foi i tulivae ua vaivai.

⁴Fai atu ia i e ua loto vaivai, Ia outou faamalolosi, aua tou te fefefe; faauta, o lo outou Atua; o le a oo mai le taui ma sui, o le taui lava mai le Atua; e afio mai lava o ia ma faaola ia te outou.

⁵Ona faapupulaina ai lea mata o e tauaso, e faalogoa foi taliga o e tutuli;

⁶ona osooso ai lea o le pipili e pei o le aila, e pese foi le laulaufaiva o le gūgū; auā e oso mai le vai i le vao lafulafua, ma vaitafe i le toafa;

⁷e avea foi le serapi ma vailepa, e avea foi le nuu naumati ma vaipuna; o le mea e nonofo ai luko, e taooto ai i latou, e fai lea ma mea e tutupu ai u ma kome.

⁸E i ai foi le ala tanu, ma le ala, e ta‘ua foi o le ala sa; e le ui atu ai se ua leaga, a e faia mo i latou lava; e ui ina valea se malaga e le sese ai lava.

⁹E le i ai se leona, e le alu ae ai foi se manu feai; e le i ai lava, a e savavali ai e ua togiolaina.

¹⁰E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia, a e sosola ese le faanoanoa ma le mapuitiga.