Read Samoan Old Version Bible – O LE TUSI PAIA ISAIA, 37 Bible Online

ISAIA, 37 - Samoan Old Version Bible – O LE TUSI PAIA bible

ISAIA, 37

¹Ua faalogo ai le tupu o Esekia, ona saei ai lea o ona ofu, ua lavalava i le ie talatala, ona ulufale ai lea o ia i le fale o Ieova.

²Ua na aauina atu foi o Eliakimo o le pule i le aiga, ma Sevena le tusiupu, atoa ma toeaina o le au faitaulaga, ua lavalava i ie talatala, e o ane ia Isaia le perofeta le atalii o Amota.

³Ua latou fai atu ia te ia, O loo faapea ona fetalai mai o Esekia, O le aso nei, o le aso o le puapuaga, ma le aoaiga, ma le faifai; auā ua oo ina a fanau o tama, a e leai se malosi e fanau mai ai.

⁴Atonu e faafofoga mai Ieova lou Atua i upu a Ravesaki, o le ua auina mai e le tupu o Asuria lona alii e faifai i le Atua soifua, atonu foi na te taui atu i upu ua faafofogaina e Ieova lou Atua; o lea ia e tatalo ai mo e ua totoe.

⁵Ona o atu ai lea o auauna a le tupu o Esekia ia Isaia.

⁶Ona fai mai ai lea o Isaia ia te i latou, Ia outou fai atu faapea i lo outou alii, O loo faapea ona fetalai mai o Ieova, Aua e te mata‘u i upu ua e faalogo ai, ua faifaia mai ai a‘u e auauna a le tupu o Asuria.

⁷Faauta, ou te tuu atu ia te ia le agaga, na te faalogo foi i le tala, ona foi atu ai lea o ia i lona lava nuu; ou te fasioti foi ia te ia i le pelu i lona lava nuu.

⁸Ona foi atu ai lea o Ravesaki, ua na iloa foi le tupu o Asuria ua tau ma Lipena; auā na ia faalogo ua alu ese o ia i Lakisa.

⁹Na ia faalogo foi i le tala ia Tiraka le tupu o Aitiope, ua faapea ane, Ua sau o ia e sii le taua ia te oe; ua ia faalogo ai, ona tuu atu ai lea e ia o le sāvali ia Esekia, ua faapea atu,

¹⁰Ia faapea ona outou fai atu ia Esekia le tupu o Iuta, ia faapea atu, Aua ne‘i pelogia oe e lou Atua ua e faatuatua i ai, o loo faapea ane, E le tuuina Ierusalema i le lima o le tupu o Asuria.

¹¹Faauta mai ea, ua e logona i mea ua faia e tupu o Asuria i nuu uma, ua ia faaumatia lava, a e laveaiina ea oe?

¹²Pe na laveai ea atua o nuu ia te i latou na faaumatia e o‘u tamā, o le nuu o Kosane, ma Karana, ma Resefa, atoa ma fanauga a Etena sa i Tilasa?

¹³O fea o i ai le tupu o Amato, ma le tupu o Arepa, atoa ma le tupu o le aai o Sefavaima, o Ena, ma Iva?

¹⁴Ua talia e Esekia le tusi nai lima o le sāvali, ua faitau ai; ona alu ae ai lea o Esekia i le fale o Ieova, ua fofola atu ai i luma o Ieova.

¹⁵Ona tatalo ai lea o Esekia ia Ieova, ua faapea atu, Ieova e o ‘au,

¹⁶o le Atua o Isaraelu, o lē afio i le va o kerupi, o oe lava, na o oe, o le Atua o malo uma o le lalolagi, na e faia le lagi ma le lalolagi.

¹⁷Ieova e, ia e liliu mai ou fofoga, ma ia faafofoga mai; Ieova e, ia silasila mai ou fofoga, ma ia e silafia, ma ia faafofoga mai i upu uma a Sanerivi, o le ua auina mai le tasi e faifai i le Atua soifua.

¹⁸E moni, Ieova e, ua faatafunaina e tupu o Asuria o nuu uma ma o latou laueleele.

¹⁹Ua latou lafoina atu o latou atua i le afi, auā e le ni atua i latou, a o mea na faia e lima o tagata, o laau ma maa; o le mea lea na latou faaumatia ai i latou.

²⁰O lenei, Ieova e lo matou Atua, ia e faaola mai ia te i matou ai lona lima, ina ia iloa ai e malo uma o le lalolagi, o oe lava o Ieova, na o oe lava.

²¹Ona auina lea e Isaia le atalii o Amota o le tasi ia Esekia, ua faapea atu, O loo faapea ona fetalai mai o Ieova le Atua o Isaraelu, Ua e tatalo ia te au ia Sanerivi le tupu o Asuria,

²²o le afioga lenei ua tŭlei mai ai e Ieova ia te ia, Ua ‘ino‘ino ia te oe le tama fafine taupou a Siona, ua faatauemu o ia ia te oe; ua lialiai e le tama fafine a Ierusalema lona ulu ia te oe.

²³O ai ea ua e upu leaga i ai, ma e faifai i ai? O ai ea ua e fai i ai, upu faasausili, ma e faasiasia i ai? O le Paia lava o Isaraelu.

²⁴O au auauna na e aauina ai ua e upu leaga ai i le Alii, ua e faapea ane, Ua a‘u alu ae ma le tele o o‘u kariota, i tumutumu o mauga i itu o Lepanona; ou te tatuuina foi ona arasi maualuluga, ma ona perosi silisili; ou te alu atu i ona tumutumu lava, o lona vao lafulemu.

²⁵Ua a‘u eli ma a‘u inu i vai; ua a‘u faamateina vaita‘i uma o Aikupito i o‘u alofivae.

²⁶Po ua e le faalogo ea na a‘u faia lea mea anamua, na ou saunia foi i aso muamua? a o ona po nei ua ou faataunuu ai, ina ia fai e oe o aai nofo ‘olo ma faupuega mea ua faatafunaina.

²⁷O le mea lea na lima vaivai ai o e sa nonofo ai, na fefefe i latou ma masiasi, na latou faapei o le mutia o le fanua ma le vao mu‘a lauolaola, pei o le mutia foi i luga o fale, pei o saito foi ua mamae a o lei tupu tele.

²⁸Ua ou iloa foi lou nofo i lalo, ma lou ulufafo, ma lou ulufale, atoa ma lou ita tele ia te au.

²⁹Ua oo mai i o‘u taliga lou ita tele ia te au, ma lou faasiasia; o le mea lea ou te tuu ai la‘u mama i lou isu ma la‘u faagutu i ou laugutu, ou te faafoi atu ai ia te oe i le ala na e sau ai.

³⁰O le faailoga foi lenei ia te oe; o le tausaga nei tou te aai ai i mea ua tutupu fua, tou te aai foi i lona lua o tausaga o mea e tutupu fua ai; a o lona tolu o tausaga, ia outou lulu ai saito, ma ia outou selesele, ia outou totōina tovine, ma ia outou aai i o latou fua.

³¹O e totoe o le aiga o Iuta ua sao, e toe sosolo i lalo o latou aa, ma fua mai ni fua i luga.

³²Auā e o atu e ua totoe nai Ierusalema, o e ua sao foi e o atu nai le mauga o Siona; o le maelega o Ieova o ‘au e fai ai lenei mea.

³³O le mea lava lea o loo faapea ona fetalai mai ai o Ieova i le tupu o Asuria, E le sau lava ia i lenei aai, e le fana mai ai foi se u, e le sau foi i ai ma se talita, e le tanu ai foi se mea mautietie.

³⁴O loo faapea mai Ieova, O le ala na sau ai o ia, o le ala lava lea e toe foi atu ai, a e le sau lava ia i totonu o le aai nei.

³⁵Auā ou te faamamaluina le aai nei ia ola, ona o a‘u nei lava, ona o Tavita foi la‘u auauna.

³⁶Ona alu atu ai lea o le agelu a Ieova, ua fasi i le togālauapi o Asuria o tagata e selau afe ma afe e valu sefulu ma afe e lima. Ua ala o latou na tatoe i le taeao lava, faauta, o tagata oti i latou uma.

³⁷Ona alu ese ai lea o Sanerivi le tupu o Asuria, ua alu ua foi atu i Nineva, ua nofo ai.

³⁸Sa ifo o ia i le fale o Nisero lona atua, ona fasia lea o ia e ona atalii o Atameleko ma Salese i le pelu ona la sosola ai lea i le nuu o Ararata. Ona soloai ane ai lea o Esarata lona ataliii e fai ma tupu.