Read Samoan Old Version Bible – O LE TUSI PAIA ISAIA, 38 Bible Online

ISAIA, 38 - Samoan Old Version Bible – O LE TUSI PAIA bible

ISAIA, 38

¹O ona po ia na ma‘i ai Esekia, ua tāli oti. Ona sau ai lea ia te ia o le perofeta o Isaia le atalii o Amota, ua fai mai ia te ia, O loo faapea ona fetalai mai o Ieova, Sauni ia sau mavaega i lou aiga, auā o le a e maliu, e te le soifua.

²Ona liliu atu ai lea e Esekia ona fofoga i le pa o le fale, ua tatalo atu o ia ia Ieova,

³ua faapea atu, Ieova e, ou te aioi atu, ia e manatu mai i lo‘u savali i ou luma ma le faamaoni, ma le loto atoa, ua ou faia foi mea ua e finagalo i ai. Ona tagi lotulotu ai lea o Esekia.

⁴Ona oo mai ai lea o le afioga a Ieova ia Isaia, ua faapea mai,

⁵Alu ia, ina e fai atu ia Esekia, O loo faapea ona fai mai o Ieova le Atua o Tavita lou tamā, Ua ou faalogo i lau tatalo, ua ou iloa ou loimata; faauta foi, ou te faaopoopo i aso o lou ola o tausaga e sefulu ma le lima;

⁶Ou te laveai foi ia te oe ma le aai nei ai le lima o le tupu o Asuria; ou te faamamaluina foi lenei aai.

⁷O lenei foi le faailoga mai ia Ieova ia te oe e te iloa ai, e faia e Ieova lenei lava mea ua na fetalaia mai.

⁸Faauta, ou te faafoi atu le ata i vaega na uma ona alu ifo i le mea a Aasa e vaevae ai itu la, ia foi atu i vaega e sefulu. Ona foi atu ai lea o le la i vaega e sefulu, o vaega lava ia ua uma ona alu ifo ai.

⁹O le tusi a Esekia le tupu o Iuta, ina ua malolo o ia sa ma‘i.

¹⁰Na a‘u faapea ane, O le tautuluaga o lo‘u ola ou te ulu atu ai i faitotoa o le tuugamau, e aveesea o‘u tausaga ua totoe.

¹¹Na a‘u faapea ane, Ou te le toe iloa Ioa, o Ioa lava, i le nuu o tagata ola; ou te le toe vaavaai i tagata, faatasi ma e o nonofo i le lalolagi.

¹²Ua liaiina lo‘u fale, ua aveeseina ia te au e pei o le fale ie o le leoleo mamoe; ua ou taataaia lo‘u ola e pei o lē laga ie; ua na vavaeeseina a‘u i pito manoa; o le aso e tasi e te faaumatia ai a‘u.

¹³Na a‘u fifilemu seia ao, ona ia momomo ai lea o o‘u ivi uma e pei o se leona; o le aso e tasi e te faaumatia ai a‘u.

¹⁴E pei o le pe‘ape‘a, po o le akuru, e faapea lava ona ou iī; ou te tagi e pei o le lupe; ua tiga o‘u mata i lo‘u vaavaai ae; Ieova e, ua puapuagatia a‘u, ia fai oe mo‘u fesoasoani.

¹⁵Pe se a se mea ou te fai atu ai? na fetalai mai lava o ia ia te au, o ia foi na ia faia; ou te savali ma le faamaulalo i o‘u tausaga uma, ona o le tiga o lo‘u loto.

¹⁶Le Alii e, o mea i e ola ai tagata; o mea uma ia e ola ai lou agaga; e te faamalolo ia te au, e te faaola foi ia te au.

¹⁷Faauta, ua suia lo‘u tiga tele i le filemu; na e finagalo e laveaiina a‘u i le lua e faaumatia ai; auā ua e lafoaiina a‘u agasala uma i ou tua.

¹⁸Auā e le vivii atu le tuugamau ia te oe; e le faaneenee le oti ia te oe; o e o ifo i le lua latou te le faamoemoe i lou faamaoni.

¹⁹O le ua ola, o le ua ola, o ia lava e vivii atu ia te oe, e pei o a‘u lava i le aso nei; e faailoa lou faamaoni e le tamā i lana fanau.

²⁰Ua faaolaina a‘u e Ieova; matou te taia a‘u nekina i le fale o Ieova i aso uma o lo matou ola.

²¹Auā sa fai atu Isaia, Ia latou ave se potopotogāmati, ma tuu ai o tu‘ivaivai i le mea na fulaga‘i, ona malolo ai lea o ia.

²²Sa fai atu foi Esekia, Se a se mea ou te iloa ai, ou te alu ae i le fale o Ieova?