Read Samoan Old Version Bible – O LE TUSI PAIA ISAIA, 41 Bible Online

ISAIA, 41 - Samoan Old Version Bible – O LE TUSI PAIA bible

ISAIA, 41

¹Faalologo ia outou o nuu tu matafaga i o‘u luma; o nuu foi, ia toe faafouina lo latou malosi; ia faalatalata mai i latou, ona latou tautala ai lea; ia tatou faalatalata faatasi o le faamasinoga.

²O ai ea na na faaoso mai le ua amiotonu mai sasae? ua valaau atu ia te ia ia mulimuli ia te ia; ua tuuina atu ia te ia nuu ese, ua ia faatoilaloina foi tupu; ua ia tuuina atu i latou e pei o le efu i lana pelu, ua tuuina atu i latou i lana aufana e pei o tagutugutu o saito ua taape.

³Ua ia tuliloaina i latou, ua ia ui atu ma le saogalemu i le ala e lei ui ai ona vae.

⁴O ai ea ua ia saunia ma na faia, o lē valaau i tupulaga talu mai le amataga? O a‘u o Ieova, o lē muamua e faatasi foi ma lē mulimuli, o a‘u lava ia.

⁵Na vaaia e nuu tu matafaga, ona latou fefefe ai lea; ua gatete tuluiga o le lalolagi; ua faalatalata mai ma o mai i latou.

⁶Ua latou fesoasoani le tasi i le tasi; ua fai atu le tasi i le tasi, Faamalosi ia.

⁷Ua faamalosi le tufuga i lē fai mea uamea; o le ua faamolemole i le samala, ua ia faamalosi i le ua tu‘i le mea e tu‘i ai uamea; ua faapea ane, E lelei le pulu; ua ia faamauina foi i fao, e le maluluina.

⁸A o oe Isaraelu e la‘u auauna, o oe Iakopo e, le na ou filifilia, o le fanau a Aperaamo la‘u uo;

⁹o oe le na ou aumaia i tuluiga o le lalolagi, na a‘u valaauina foi oe i ona itu mamao; na ou fai atu foi ia te oe, O oe o la‘u auauna, o le na ou filifilia, ou te lei lafoaiina oe.

¹⁰Aua e te fefe, auā ou te ia te oe; aua le fetepatepai, auā o a‘u o lou Atua; ou te faamalosia oe; e moni, ou te fesoasoani ia te oe; e moni, ou te taofia oe i lo‘u lima taumatau e i ai le amiotonu.

¹¹Faauta, e mamā ma masiasi i latou uma o e ita ia te oe; e avea i latou e peiseai ua leai; e fano foi i latou o e finau atu ia te oe.

¹²E te sailia i latou, a e te le maua i latou o e fai oe mo latou fili; e avea i latou peiseai ua leai, e peiseai ua matuā leai lava e na tau ma oe.

¹³Auā o a‘u o Ieova lou Atua, o le ua taofi lou lima taumatau; o le ua fai atu ia te oe, Aua e te fefe, o a‘u, ou te fesoasoani ia te oe.

¹⁴Aua e te fefe, le anufe Iakopo e, ma tagata o Isaraelu; o a‘u, ou te fesoasoani ia te oe, ua fetalai mai ai Ieova, o le na faatauina oe, le Paia o Isaraelu.

¹⁵Faauta, ou te avea oe ma mea e soli a‘i saito, e maamaai, e fou, e fai nifo; e te solia ai mauga, ma e nutininii ai; e te faia foi mauga iti e pei o aputi o saito.

¹⁶E te faasavili ia te i latou, e lelea foi i latou i le matagi; e faataapeapeina i latou i le afā; a o oe, e te olioli ia Ieova, e te mitamita foi i le Paia o Isaraelu.

¹⁷O e ua tigaina ma ē matitiva o loo latou saili i se vai, a ua leai; ua matutu o latou laulaufaiva i le fia inu; o a‘u o Ieova, ou te tali atu ia te i latou, o a‘u o le Atua o Isaraelu, ou te le tuulafoaiina i latou.

¹⁸Ou te suena vaitafe i luga o mauga tula, ma vaipuna i vanu; ou te faia le vao lafulafua ma vailepa, ou te faia foi le laueleele naumati ma vaipuna.

¹⁹Ou te avatu i le laueleele lafulafua le arasi, ma le setima, ma le atasi, ma le laau e maua ai le suāuu; ou te tuuina atu foi i le toafa o le perosi, o le titara, faatasi ma le tasura;

²⁰ina ia latou vaai, ma latou iloa, ma mafaufau, ma faautauta faatasi, o le aao lava o Ieova na faia ai lea mea, o le Paia o Isaraelu ua na faia lava.

²¹Au mai ia a outou finauga, ua fetalai mai ai Ieova; laulau mai ia a outou upu e finau malosi ai, ua fetalai mai ai le Tupu o Iakopo.

²²Se‘i latou laulau mai, ma latou faaali mai ia i tatou mea e tutupu; ia latou faaali mai mea muamua, po o a ia mea; ona tatou mafaufau ai lea, ma tatou iloa le iuga o na mea; pe faailoa mai e i latou mea e oo mai.

²³Faaali mai ia o mea e tutupu amuli, ina ia matou iloa o atua lava outou; ia outou faia lava se mea lelei, pe fai se mea leaga, ina ia matou fevaavaaiai, ma tatou iloa faatasi.

²⁴Faauta, e sili se mea ua leai ia te outou, e sili foi le mea ua leai i la outou galuega; e inosia le na te filifili ia te outou.

²⁵Ua ou faaosoina le tasi mai le itu i matu, e sau foi o ia; o le mea e alu ae ai le la na te valaau ai i lo‘u igoa; na te sau i alii e pei o le omea, e pei o le fai ipu omea foi ona soli i le omea.

²⁶O ai ea ua na faaali mai talu le amataga, ina ia tatou iloa? mai anamua foi, ina ia tatou faapea ane, Ua tonu. E moni, sa leai se na faaali mai; sa leai lava se na faailoa mai; sa leai lava se na faalogo i a outou upu.

²⁷Na a‘u muai fai atu ia Siona, Faauta, faauta ia te i latou; na a‘u avatua foi ia Ierusalema le na te aumaia le tala lelei.

²⁸Na ou vaai, a e leai se tagata; o i latou nei lava, a e leai se faaali mai; na a‘u fesili atu ia te i latou, a ua latou le mafai ona tali mai.

²⁹Faauta, o mea le aoga i latou uma; o a latou mea e fai ua matuā leai lava ia; o le matagi ma le mea faatauvaa a latou tupua uamea.