Read Samoan Old Version Bible – O LE TUSI PAIA ISAIA, 44 Bible Online

ISAIA, 44 - Samoan Old Version Bible – O LE TUSI PAIA bible

ISAIA, 44

¹A o lenei, faalogo mai ia Iakopo e la‘u auauna, o Isaraelu foi na ou filifilia.

²O loo faapea ona fetalai mai o Ieova, o le na faia oe, ma na faatupuina oe i le manava; o lē fesoasoani ia te oe; Aua e te fefe la‘u auauna Iakopo e, o Iesuruna foi na ou filifilia.

³Auā ou te liligi atu le vai i le nuu naumati, ma vaitafe i le eleele matutu; ou te liligi atu lo‘u Agaga i luga o lau fanau, ma la‘u faamanuia i luga o e tutupu mai ia te oe.

⁴E tutupu ae i latou i totonu o le mutia, e pei o garava i auvai o vaitafe.

⁵E fai mai le tasi, O a‘u o le tagata o Ieova; e ta‘u atu le tasi i le igoa o Iakopo; a e tusi le tasi i lona lima, Mo Ieova; e faaigoa foi o ia e ia i le igoa o Isaraelu,

⁶O loo faapea ona fetalai mai o Ieova, o le Tupu o Isaraelu, o le na faatauina foi o ia, o Ieova o ‘au; o a‘u lē muamua, o a‘u foi lē mulimuli; a e leai se atua, ua na o a‘u lava.

⁷O ai ea foi e pei o a‘u ona valaau, ma faaali atu, ma sauni mai mo a‘u, talu ona ou tofia le nuu mai le vavau? ia latou faaali atu ia i latou mea o le a tutupu, ma mea e oo mai.

⁸Aua le fefefe outou; aua foi le matatau; pe na a‘u le faailoa atu ea ia te oe anamua, ma a‘u ta‘uina atu ia te oe? o a‘u molimau lava outou; pe ai ea se atua, ua na o a‘u lava? Ua leai lava se papa, ou te le iloa se tasi.

⁹O e fai tupua ua ta, e faatauvaa i latou uma, ma a latou mea faafiafia, ua le aoga lava ia; o i latou lava e molimau ia i latou; latou te le vaai, latou te le iloa foi, ina ia latou mamā.

¹⁰O ai ea ua na faia se atua, ma na gaosia se tupua uamea, e leai lava sona aoga?

¹¹Faauta e mamā i latou uma o e faatasi ma ia; o tufuga foi, o tagata lava i latou; ia faapotopoto i latou uma; ia latou tutū i luga; e matatau i latou, e mamā faatasi.

¹²O le tufuga fai mea uamea na te faia se to‘i; na te gaosia i le malala; na te faia i samala; na te galue i ai i lona lima malosi; ua fia ‘ai foi o ia, ona leai lea o sona malosi, ua le inu ia i se vai, ona vaivai ai lea o ia.

¹³O le tufuga na te faataotoina le fua, na te tusia i le peni, na te faia i tofi, na te tusia i le fua faataaliolio, na te faia e pei o le tino o le tagata, e tusa ma le matagofie o le tagata, ina ia nofo i le fale.

¹⁴Ua ia tuu i lalo arasi mo ia, ua au mai e ia o le tiresa ma le aluna, na te faamalosia foi mo ia i laau o le vao; ua ia totōina le orene, ona tupu tele ai lea i le uaga;

¹⁵ona faia lea e le tagata ma fafie, ua ia ave foi nisi mea e mumulu a‘i o ia; na te faamuina lava ma tao a‘i areto; na te faia lava se atua, ma ifo atu i ai; na te fai a‘i se tupua ua ta, ma ifo faō i ai.

¹⁶O le tasi ona vaegālaau ua ia susunu ai i le afi; o le tasi ona vaega ua ia ‘ai ai le tufaaga; na te tuuna le mea e tunu, ua ma‘ona foi o ia; ua mumulu ai lava o ia, ona faapea ane lea o ia, Ena! ua ou mafanafana, ua ou iloa le afi.

¹⁷O le mea foi ua totoe na te fai a‘i se atua, o lana tupua ua ta; ua ia ifo faō i ai, ma tapuai atu i ai; ua ia tatalo foi i ai, o loo faapea atu, Ia e laveai mai ia te au, auā o lo‘u atua lava oe.

¹⁸Ua latou le iloa, ua latou le lagona; auā ua ufitia o latou mata ia le vaai, ma o latou loto ina ia le mafaufau.

¹⁹Ua le mafaufau o ia, ua leai se poto, ua leai se faautauta se‘i faapea ane ai o ia, O le tasi ona vaegālaau ua ou susunuina lea i le afi, ua ou taoa foi le areto i ona malala ola; ua ou tunua le tufaaga, ma a‘u ‘aina; ou te faia ea le mea ua totoe ma mea e inosia? ou te ifo faō ea i le ogalaau?

²⁰Ua fai mana mea e ‘ai le lefulefu; o le loto pelogia ua faaliliueseina ai o ia; o lea na te le malaveaiina ai o ia ia te ia, na te le fai ane foi, E le o le pepelo ea ua i lo‘u lima taumatau?

²¹Ia e manatu i nei mea Iakopo e; o Isaraelu foi, auā o la‘u auauna oe; ua ou faia oe, o la‘u auauna oe; Isaraelu e, e le galo oe ia te au.

²²Ua ou sōloia ou solitulafono e pei o se ao uliuli, ma au agasala e pei o se ao; foi mai ia ia te au, auā ua ou faatauina oe.

²³Ia pese oe le lagi e, auā ua faia lea mea e Ieova; ia alalaga outou o mea maulalalo i le lalolagi; ia leo tetele outou mauga e, ma alalaga fiafia; o oe le vao ma laau uma o i ai; auā ua faatauina Iakopo e Ieova, na te faatupuina foi lona lava viiga ia Isaraelu.

²⁴O loo faapea ona fetalai mai o Ieova le na faatau ia te oe, o le na faatupuina foi oe i le manava; o a‘u o Ieova le na faia mea uma; o lē faamafolafola le lagi na o a‘u lava; o a‘u lava o lē fofolaina le lalolagi;

²⁵o le na te faaleaogaina faailoga o e pepelo; na te faavaleleaina o e faataulāitu; o loo faaliliuina i tua o e popoto, na te faaleaogaina o latou poto;

²⁶o loo faamauina le upu a lana auauna, na te faataunuuina foi le pule a ana sāvali; o loo faapea ane i Ierusalema, E āina o ia; o loo faapea foi i aai a Iuta, E faia lava ia; ou te faatuina foi ana mea ua faatafunaina;

²⁷o le fai atu i mea loloto, Ia faapa‘umatuina; ou te faamamate foi i ou vaitafe.

²⁸O lē fai atu ia Kuresa, O lo‘u leoleo mamoe o ia; na te faataunuuina foi o mea uma ou te loto i ai; o loo fai atu foi i Ierusalema, E faia lava oe; o loo fai atu foi i le malumalu, E faavaeina lava oe.