Read Samoan Old Version Bible – O LE TUSI PAIA ISAIA, 49 Bible Online

ISAIA, 49 - Samoan Old Version Bible – O LE TUSI PAIA bible

ISAIA, 49

¹Faalogo mai ia ia te au, outou nuu tu matafaga e; uai mai ia o outou taliga outou nuu mamao e; ua valaauina a‘u e Ieova talu mai le manava; ua na ta‘ua lo‘u igoa talu mai le manava o lo‘u tinā.

²Ua na faia lo‘u gutu e pei o le pelu maai; ua ia natia a‘u i le paolo o lona aao; ua na faia a‘u ma u fanafana ua faapupulaina, ma na faalilo ia te au i lana utu.

³Na ia fetalai mai ia te au, O la‘u auauna lava oe Isaraelu e, e viia lava a‘u ona o oe.

⁴Ona ou fai atu ai lea, Ua ou tigaina fua; ua ou faaumaina lo‘u malosi, ua iu vale, ua le aoga; a e ui lava i lea, o loo ia Ieova lo‘u faamasinoga, ma lo‘u taui o loo i lo‘u Atua lea.

⁵A o lenei, o loo fetalai mai Ieova, o le na faia a‘u talu mai le manava e fai ma auauna ia te ia, e toe faafoisia Iakopo ia te ia; e ui lava ina le faapotopotoina o Isaraelu, a e viia a‘u i luma o Ieova; e fai foi lo‘u Atua mo‘u malosi.

⁶Ua fetalai mai foi o ia, O le mea māmā ina ia fai oe ma auauna ia te au, ina ia faaea mai itu aiga o Iakopo, ma faafoisia mai e ua faasaoina i Isaraelu; ua ou avatua foi oe e fai ma malamalama o nuu ese, e fai ma‘u faaolataga ia oo i tuluiga o le lalolagi.

⁷O loo faapea ona fetalai mai o Ieova, o le Faaola o Isaraelu, o lona Alii Paia, i le ua faaleaogaina e tagata, ma inosia e le nuu, o le auauna a ē pule; e iloa mai tupu, ma latou tulai; o alii foi, ma latou ifo; auā o Ieova, o le ua faamaoni, o le Paia o Isaraelu, le ua filifilia oe.

⁸O loo faapea ona fetalai mai o Ieova, O ona po o le alofa ua ou tali atu ai ia te oa; o le aso e faaolaina ai ua ou fesoasoani ai ia te oe; ou te leoleo foi ia te oe, ma a‘u avatua oe e fai ma feagaiga a le nuu; ina ia faaeaina le lalolagi, ia faia nuu ua faatafunaina mo latou tofi;

⁹e fai atu i e o fusifusia, O mai ia i fafo; e fai atu foi i e o i le pouliuli, Faaali mai ia outou; latou te aai lava i ala; o mauga tula uma o latou taaga ia.

¹⁰Latou te le fia aai, latou te le fia inu foi; e le ogotia i latou i le vevela po o le la; auā o le ua alofa ia i latou, na te ave ia te i latou, na te ta‘ita‘iina foi i latou i vaipuna.

¹¹Ou te faia foi ma ala o‘u mauga uma, e maualuga foi o‘u ala tele.

¹²Faauta, e o mai i latou nei mai le mea mamao; faauta foi, o i latou nei mai le itu i matu ma sisifo, ma i latou mai le nuu o Sainima.

¹³Ia alaga oe le lagi e, ia olioli oe le lalolagi e, ia leo tetele outou mauga, ma ia alalaga fiafia; auā ua faamafanafanaina e Ieova lona nuu, ua ia alofa foi i ona tagata ua tigaina.

¹⁴A ua fai mai Siona, Ua lafoaiina a‘u e Ieova; ua galo mai a‘u i le Alii.

¹⁵E galo ea i le fafine lana tama ua susu, na te le alofa i le tama a lona lava manava? ai lava e galo ia te i latou, a e le galo lava oe ia te au.

¹⁶Faauta, ua ou taia lou faatusa i o‘u alofilima; e tumau ou pa i o‘u luma.

¹⁷E faataalise mai lau fanau; o e na lepetia oe, ma e na faatafunaina oe, latou te o ese ia te oe.

¹⁸Fetepatepai ia oe i itu uma, ma e vaavaai o loo faapotopoto mai i latou uma, ua latou o mai ia te oe. Ua fetalai mai Ieova, O loo ola a‘u, e te ofu oe ia i latou uma e pei o mea e faamatagofie a‘i, ma ē fusi a‘i e pei o le a nofo tane.

¹⁹Auā o au mea faatafunaina, ma au mea tuufua, ma lou fanua ua oloina, e lauitiiti ia i ia ona aso i e nonofo ai; e mamao foi e na faaumatia oe.

²⁰O au tama sa aveeseina ia te oe, latou te toe fai ane i ou taliga, Ua lauitiiti lenei mea ia te au; tuutuu atu ia, ou te nofo ai.

²¹E te fai ifo foi i lou loto. O ai ea na na fanaua mai i latou nei mo a‘u? auā o a‘u sa āufanaua ma ua pa, sa tāfea ma tulia a‘u; o ai foi na na tausia i latou nei? Faauta, o a‘u sa tuua e toatasi lava a‘u, o i latou nei sa ifea i latou?

²²O loo faapea ona fetalai ma o le Alii o Ieova, Faauta, ou te sii atu lo‘u lima i nuu ese, ma ou faatu i luga lo‘u tagavai i nuu; latou te aumaia au tama tane i o latou fatafata, a e aumaia au tama teine i o latou tau‘au.

²³E fai foi tupu mau tausi tama, ma o latou masiofo e fai mau failele; latou te ifo toele ia te oe; latou te etoeto i le eleele o ou vae; e te iloa foi, o a‘u lava o Ieova, e le faamaina i latou o e faatalitali ia te au.

²⁴E faoa ea le vete ai le ua malosi? pe laveaiina ea le tafeaga a le ua amiotonu?

²⁵Aua o loo faapea ona fetalai mai o Ieova, E faoa lava le tafeaga a le ua malosi, e laveaiina foi le vete a lē matautia; ou te finau atu foi a‘u i e ua finau atu ia te oe, ou te faaolaina foi au tama.

²⁶Ou te fagaina foi e ua saua ia te oe i o latou lava tino; e onā foi i latou i o latou toto e pei se suavine; e iloa ai tagata uma lava, o a‘u lava o Ieova, o lou Faaola, ma le na faatauina oe, o le Malosi o Iakopo.