Read Samoan Old Version Bible – O LE TUSI PAIA ISAIA, 50 Bible Online

ISAIA, 50 - Samoan Old Version Bible – O LE TUSI PAIA bible

ISAIA, 50

¹O loo faapea ona fetalai mai o Ieova, O fea le tusi alei a lo outou tinā na a‘u aleia ai o ia? po o ai le tagata ua ou aitalafu i ai, na a‘u faatauina atu ai outou ia te ia? Faauta mai, ona o a outou amio leaga ua faatauina atu ai outou; ona o a outou solitulafono ua aleia ai lo outou tinā.

²Na a‘u sau, o le a lava le mea na leai ai se tasi? Na a‘u valaau, se a le mea ua leai ai se na tali mai? Ua faapuupuuina ea lo‘u lima, ou te le mafaaola ai? pe leai ea se malosi ia te au e laveai ai? Faauta, o la‘u aoai atu e pa‘umatuina ai le sami, e fai foi e a‘u o vaitafe ma nuu naumati; e elo i‘a ua i ai ona ua leai se suāvai, e mamate foi i le fia inu.

³Ou te faaofuina le lagi i le faauliuli; ou te faia foi le ie talatala ma mea e ufiufi a‘i.

⁴Ua foai mai ia te au e le Alii o Ieova le laulaufaiva o e ua a‘oa‘oina, ina ia ou iloa ona faamafanafana i se upu le ua tigaina; na te fagua a‘u i lea taeao ma lea taeao; na te fagua o‘u taliga, ina ia ou faalogologo e pei o e ua a‘oa‘oina.

⁵Ua toina le puipui o o‘u taliga e le Alii o Ieova, a ou te lei finau vale; ou te le foi atu lava.

⁶Na a‘u tuuina atu lo‘u tua i e sasa mai, ma o‘u alafau i e futi le ‘ava; ou te lei ufiufi foi o‘u mata i le mā ma le feanu.

⁷A o le Alii o Ieova e fesoasoani mai o ia ia te au; o le mea lea ou te le mā ai; o le mea lea ua ou faia o‘u mata ia pei o le papa alā; ua ou iloa foi e le faamaina a‘u.

⁸O loo ua latalata mai le na te ta‘uamiotonuina a‘u, o ai ea se finau ma a‘u? Se‘i ma tutū faatasi; o ai se finau mai? ia faalatalata mai o ia ia te au.

⁹Faauta, o le Alii o Ieova, na te fesoasoani mai ia te au; o ai ea se na te faasalaina mai? Faauta, e pala i latou uma e pei o le ofu; e ‘aina e le mogamoga.

¹⁰O ai ea so outou ua mata‘u ia Ieova, o loo faalogo i le upu a lana auauna, e lē savali i le pouliuli, a e leai sona malamalama? ia faatuatua o ia i le suafa o Ieova, ma faalagolago i lona Atua.

¹¹Faauta mai outou uma o e si‘a se afi; ua siomia outou e outou i aloiafi; savavali ia i le malamalama o lo outou afi, ma aloiafi o lo outou afi; e oo ia te outou lenei mea ai lo‘u lima, tou te taooto i le tiga.