Read Samoan Old Version Bible – O LE TUSI PAIA ISAIA, 52 Bible Online

ISAIA, 52 - Samoan Old Version Bible – O LE TUSI PAIA bible

ISAIA, 52

¹Ala mai ia, ina ala mai; ia e ofu i lou malosi, o oe Siona e! ia e ofu i ou ofu matagofie, o oe Ierusalema e, le aai ua faasaina; auā e le toe alu atu ia te oe le ua le peritomeina, ma le ua leaga.

²Ia e lulu oe ia te oe ai le efuefu; tulai ia, ina e tietie i lou nofoa o oe Ierusalema; tatala mai ia noanoaga o lou ua, o oe sa tāfea, le tama fafine a Siona.

³Auā o loo faapea ona fetalai mai o Ieova, Na faatauina atu outou, ua le tauia mai; e faatauina mai foi outou, a e le avatu ai ni ario.

⁴Auā o loo faapea ona fetalai mai o le Alii o Ieova, Na alu ifo lo‘u nuu anamua i Aikupito e āumau ai; ua faasaua fua foi Asuria ia i latou.

⁵A o lenei, se a ea sa‘u mea iinei? ua fetalai mai ai Ieova; auā ua avea fua lo‘u nuu; o e pule ia i latou, ua latou uio, ua fetalai mai ai Ieova; ma ua inosia pea lava lo‘u igoa i aso uma.

⁶O le mea lea e iloa ai lo‘u igoa e lo‘u nuu; o le mea lea e iloa ai i lea lava aso, o a‘u lava le na fai atu, Faauta mai ia te au!

⁷E matuā matagofie i luga o mauga o vae o le ua fai mai le tala lelei, o lē logologo mai le manuia, ua tala mai le tala lelei; ua faailoa mai le olataga; ua fai mai ia Siona, O loo pule lou Atua.

⁸O le leo o ou tagata vaai, ua latou leo tetele, ua latou alalaga faatasi; auā latou te iloa e faafesagai lava, pe a faafoisia Siona e Ieova.

⁹Ia alalaga fiafia faatasi outou o mea faatafunaina i Ierusalema; auā ua faamafanafanaina lona nuu e Ieova, ua na faatauina Ierusalema.

¹⁰Ua to ese e Ieova le ofu i lona aao paia i luma o nuu uma; ua iloa foi e tuluiga uma o le lalolagi le olataga mai lo tatou Atua.

¹¹O ese ia, ina o ese outou, ia outou o atu nai lea mea; aua ne‘i pa‘i atu i se mea leaga; o atu ia outou nai totonu ia te ia; ia mamā outou o e tauave ipu a Ieova.

¹²Auā tou te le o atu ma le faataalise, tou te le o atu foi faasosola; auā e afio Ieova i o outou luma; e muli‘au foi ia te outou le Atua o Isaraelu.

¹³Faauta, e manuia la‘u Auauna, e faasilisiliina o ia, ma viia, ma matuā faaneeneeina.

¹⁴E pei ona ofo o tagata e toatele ia te oe, ua faaleaga faapea ona fofoga e sili i mata o tagata, ma lona tino e sili i tino o tagata;

¹⁵e faapea ona sausauina e ia o nuu e tele; ona o ia e punitia ai e tupu o latou lava fofoga; auā latou te vaaia le mea na le talatalaina ia i latou, latou te iloa foi le mea na latou le faalogo i ai.