Read Samoan Old Version Bible – O LE TUSI PAIA ISAIA, 53 Bible Online

ISAIA, 53 - Samoan Old Version Bible – O LE TUSI PAIA bible

ISAIA, 53

¹O ai ea ua talitonu i la matou upu e taulogologo atu; ua faaalia ia te ai le aao o Ieova?

²Na tupu ae o ia e pei o se tātupu i ona luma, e pei o le pogai i le nuu naumati; e le aulelei pe lalelei o ia; a tatou vaavaai ia te ia e leai sona matagofie, ina ia tatou mananao ai ia te ia.

³Ua inosia ma tuulafoaiina o ia e tagata; o le tagata faanoanoa, ua masani foi ma le tiga; e peiseai ua ‘alo ese mata ia te ia; ua inosia o ia, ma ua tatou le manatua lava o ia.

⁴E moni, ua na tauave o tatou tiga, ma na tauave o tatou faanoanoa; a ua tatou manatu o ia ua taia, ua fasia e le Atua, ma ua faatigaina.

⁵A ua manua o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou.

⁶O i tatou uma ua sē i tatou e pei o mamoe, ua taitasi ma faasaga i lona lava ala; a ua faaoo ia te ia e Ieova le amio leaga o i tatou uma.

⁷Na faasauaina o ia, sa tigaina foi o ia, a e le tautala mai o ia; e pei o le tamai mamoe ua ta‘ita‘iina ia fasia, e pei o le mamoe foi i luma o e sele lona fulufulu, ua faalologo ia, o ia foi ua le tautala mai.

⁸O le faasaua ma le faamasinoga na aveeseina ai o ia; o ai foi na te talatalaina lana tupulaga? auā ua vavaeeseina o ia i le nuu o tagata ola; na taia o ia ona o le solitulafono a lo‘u nuu.

⁹Na tofia o ia ia fai lona tuugamau faatasi ma ē pagotata, a e peitai sa i le mauoa ina ua maliu; auā na le faia e ia se faasauaga, ua leai foi se pepelo i lona fofoga.

¹⁰A ua finagalo Ieova e tu‘imomomo ia te ia, ua ia faatigaina o ia; pe afai na te faia se taulaga mo agasala, ona iloa lea e ia o lana fanau, e faalevalevaina ona aso, o le finagalo foi o Ieova e manuia lea ia te ia.

¹¹Ona o le tiga o lona agaga na te iloa ai lana fanau, e malie ai o ia; o le malamalama mai ia te ia e ta‘uamiotonuina ai tagata e toatele e la‘u auauna ua amiotonu; auā e tauave e ia a latou amio leaga.

¹²O le mea lea ou te vaevaea ai se vaega mo ia faatasi ma e ua sili, e vaea foi le vete faatasi ma e fitafita, ona ua ia sasaa atu o lona ola ia oti; na faitauina foi o ia faatasi ma e pagotata; na ia aveina foi le agasala a tagata e toatele, ua fautua foi o ia mo e solitulafono.