Read Samoan Old Version Bible – O LE TUSI PAIA ISAIA, 56 Bible Online

ISAIA, 56 - Samoan Old Version Bible – O LE TUSI PAIA bible

ISAIA, 56

¹O loo faapea ona fetalai mai o Ieova, Ia outou tausia le faamasinoga, ma outou faia le amiotonu; auā ua latalata ona oo mai o la‘u faaolataga, ma le faaaliga o le amiotonu mai ia te au.

²Amuia le tagata na te faia lenei mea, ma le atalii o le tagata na te taofimauina ai; o loo tausi i le sapati ia le solia, ma taofi i lona lima ia le faia se mea leaga e tasi.

³Aua foi ne‘i fai ane le tagata ese, le ua faatasi mai ia Ieova, e faapea mai, Ua matuā faate‘aeseina a‘u e Ieova i lona nuu; aua le fai ane foi le eunuka, Faauta, o a‘u o le laau popo.

⁴Auā o loo faapea ona fetalai mai o Ieova i eunuka o e tausi i o‘u sapati, ma latou mananao i mea ou te loto i ai, ma latou taofi mau i la‘u feagaiga;

⁵ou te avatu ia te i latou lava i lo‘u fale ma totonu o o‘u pa, o le faailoga ma le igoa e sili ona lelei i atalii ma afafine; ou te avatu ia te ia le igoa e faavavau e le aveeseina lava.

⁶O tagata ese foi o e faatasi mai ia Ieova, ē o auauna ia te ia, ma alolofa i le suafa o Ieova, e fai mana auauna, o i latou uma o e tausi i le sapati a e le soli i ai, ma latou taofi mau i la‘u feagaiga;

⁷ou te aumaia i latou lava i lo‘u mauga paia, ma a‘u faafiafia ia te i latou i lo‘u fale tatalo; o a latou taulaga mu ma a latou taulaga e talia ia i lo‘u fata faitaulaga; auā e ta‘ua lo‘u fale o le fale tatalo mo nuu uma.

⁸Ua fetalai mai le Alii o Ieova, o le na te faapotopotoina e ua tulia o Isaraelu, Ou te toe faapotopotoina mai nisi ia te ia, e faaopoopo i e ua uma ona faapotopotoina ia te ia.

⁹O outou manu uma o le vao e, o mai, ina aai, o outou manu uma o le vao matua.

¹⁰O ona tagata vaai, ua tauaso i latou; o i latou uma latou te le iloa se mea; o ulī gūgū i latou uma, latou te le lavā ou, o e fai miti, o e taooto, o fia momoe i latou.

¹¹O ulī ‘ai tetele i latou, latou te le iloa se ma‘ona; o i latou foi o leoleo mamoe, latou te le iloa faautauta, ua faasaga i latou uma i o latou lava ala, ua taitasi ma faasaga i lana lava oloa, e le faapito lava.

¹²O mai ia, ou te aumaia le uaina, tatou te inu ia onā i le ‘ava; e pei o le aso nei foi a taeao; e silisili ese ona lelei.