Read Samoan Old Version Bible – O LE TUSI PAIA ISAIA, 57 Bible Online

ISAIA, 57 - Samoan Old Version Bible – O LE TUSI PAIA bible

ISAIA, 57

¹Ua fano le ua amiotonu, a e leai sē mafafau i ai; ua aveeseina foi tagata alolofa, a ua leai sē manatunatu ua aveeseina le ua amiotonu ai le leaga.

²E ulu atu o ia i le manuia, latou te malolo i o latou moega, o i latou ia o e savavali ma le tonu.

³A o outou, ina faalatalata mai ia iinei, o outou tama a le fafine iite i ao, o le fanau a le mulilua ma le fafine talitane.

⁴Tou te faatauemu ea ia te ai? E faamaga o outou gutu ia te ai? tou te faaeto mai o outou laulaufaiva ia te ai? E le o le fanau fouvale ea outou? o le fanau e pepelo?

⁵O loo faatupu le manao i atua i lalo o laau uma e tauluulu ola; o loo fasioti le fanau i alia i lalo o maluapapa.

⁶O maa lamolemole o le alia o lou vaega lea, o ia lava e fai mou tofi; ua e liligi atu ai lava le taulaga i mea e inu, ua e avatu foi le taulaga i mea e ‘ai. Ou te loto mălie ea ona o ia mea?

⁷Ua e tuuina lou moega i le mauga maualuga ma le tele; ua e alu ae foi i ai e fai taulaga.

⁸Ua e tuuina lau faamanatuga i tua o le puipui ma le pou o le faitotoa; auā ua e faaali oe i le tasi a e le o a‘u; ua e alu ae; ua e faalauteleina lou moega; ua e faia se feagaiga ma i latou; ua e manao i lo latou moega, ua e filifilia le mea e tuu ai.

⁹Ua e alu atu i le tupu ma le uu, ua e faateleina ou uu manogi, ua e tuuina atu ou sāvali i mea mamao, ma ua e faaleaga oe ia te oe e oo ifo i seoli.

¹⁰Ua lailoa oe i le mamao o lou ala; ua e le fai ane, E le aoga; ua e maua le malosi o lou lima, o le mea lea ua e le faavaivai ai.

¹¹Na e atuatuvale ia te ai, ma e mata‘u, ina ua e pepelo, ma ē le manatua a‘u, ma ē le mafaufau? na a‘u le faalologo ea mai anamuā lava? a ua e le mata‘u ia te au.

¹²Ou te faaali atu lau amiotonu ma au galuega; e le aoga foi ia mea ia te oe.

¹³A ē alaga, ia laveai āu aofaga ia te oe; e siitia i latou uma e le matagi, e avea i le mānava; a o le ua faatuatua ia te au e maua e ia le nuu e fai mona tofi lo‘u mauga paia.

¹⁴E fai ane foi se tasi, Faalaulelei, ina faalaulelei ia, teu ia le ala, ia outou aveeseina mea e tausuai ai i le ala o lo‘u nuu.

¹⁵Auā o loo faapea ona fetalai mai o le ua Maualuga ma ua Silisili, o lē afio e faavavau, e paia lona suafa, Ou te nofo i le mea maualuga ma le paia, ma te nonofo foi ma le ua momomo ma ua maulalo lona loto, e faamafanafana i e ua loto maulalo, ma faamafanafanaina loto o e ua loto momomo.

¹⁶Auā ou te le finau e faavavau, ou te le ita pea lava pea; auā e faavaivai le loto i o‘u luma, o agaga foi na a‘u faia.

¹⁷O le agasala o lona matapeapea na ou ita ai, na ou taia foi o ia; na ou lafi, ma ou ita; auā na savali o ia ma le finau vale i le ala o lona lava loto.

¹⁸Ua ou iloa ona ala, ou te faamalolo foi ia te ia; ou te ta‘ita‘iina o ia, ou te toe avatu foi faamafanafanaga ia te ia, ma e ua faanoanoa faatasi ma ia.

¹⁹O loo ou te faia le fua o laugutu, O le filemu, o le filemu i le ua mamao, atoa ma le ua lata mai, ua fetalai mai ai Ieova; ou te faamaloloina foi o ia.

²⁰A o e amio leaga e tusa i latou ma le sami ua sousou, e le mafai ona to‘a filemu; a e lafoia ae e le suāsami le eleele ma le palapala.

²¹Ua fetalai mai lo‘u Atua, E leai se filemu i e amio leaga.