Read Samoan Old Version Bible – O LE TUSI PAIA ISAIA, 59 Bible Online

ISAIA, 59 - Samoan Old Version Bible – O LE TUSI PAIA bible

ISAIA, 59

¹Faauta, e lei faapuupuuina le aao o Ieova, ia le mafaaola; e le tutuli foi ona taliga, ia le mafaafofoga.

²A e peitai o a outou amio leaga ua fai ia ma pupuni i le va o outou ma lo outou Atua, o a outou agasala foi ua ‘alo ai ona fofoga ia te outou ua ia le faafofoga mai ai.

³Auā ua leaga o outou lima i le toto, ma outou tamatamai lima ua leaga ia i le amio leaga; ua tala pepelo o outou laugutu, ua tautala o outou laulaufaiva i le mea faapiopio.

⁴Ua leai se valaau i le amiotonu, ua leai se finau ma le faamaoni; ua latou faatuatua i le mea faatauvaa; ua tala pepelo, ua to i latou i le agasala, ma ua fanau mai le amio leaga.

⁵Ua latou togitogi i fua o le gata uogo, ua outou lalaga le apogaleveleve; o le na te ‘aina ni o latou fua e oti o ia; o le fua ua solia e oso mai ai le gata.

⁶E le avea o latou apogaleveleve ma ofu; latou te le oofu foi i mea ua latou faia; o a latou galuega, o galuega ia a le amio leaga; o le amio faasaua ua i o latou lima.

⁷Ua taufetuli o latou vae i le mea leaga; ua latou faataalise e sasaa ai le toto o e ua le sala o latou manatu o manatu leaga ia; o le faatafunaina ma le lepetia o mea ua i o latou ala ia.

⁸Ua latou le iloa le ala e manuia ai, ua leai se tonu i mea latou te faia; ua latou faapiopioina o latou lava magāala; o i latou uma o e savavali ai, latou te le iloa se manuia.

⁹O le mea lea ua mamao ai ma i matou le faamasinoga, ua le maua mai foi i matou e le amiotonu; ua matou faatalitali i le malamalama, faauta foi, o le pouliuli; ua faatalitali i le pupula mai, a ua matou savavali i le pogisa.

¹⁰Ua matou tautāgotago atu i le pa e pei o e tauaso; ua matou tautāgotago atu lava e pei o e ua leai ni mata; ua matou tausuai i le oauli e pei o le segisegi; ua matou i mea o i ai le manuia, e pei o e ua oti.

¹¹Ua gu i matou uma lava e pei o urosa; ua matuā tagi foi i matou e pei o lupe; ua matou faatalitali i le faamasinoga, a e leai; ua faamoemoe i le faaolataga, a e mamao ma i matou.

¹²Auā ua faateleina a matou solitulafono i ou luma; ua molia foi i matou e a matou agasala; auā o loo ia te i matou a matou solitulafono; ua matou iloa foi a matou amio leaga;

¹³o le solitulafono ma le pepelo ia Ieova; o le ō ese i lo matou Atua; o le tautala faasaua ma le upu faafouvale; o le manatunatu ma le tautala mai i upu pepelo mai le loto.

¹⁴Ua faafoisia i tua le faamasinoga, ua tu mamao atu le amiotonu; auā ua paū le faamaoni i le malae, e le mafai ona ulu mai le amio sa‘o.

¹⁵Ua le iloa lava le faamaoni; o le ua ‘alo i le leaga ua vetea ana mea. Ona silafia lea e Ieova, ua leaga foi ia te ia ina ua leai se faamasinoga.

¹⁶Na ia silafia ua leai se tagata; ua ofo lava ina ua leai se fautua; o le mea lea na fai ai le olataga e lona lava aao; o lana amiotonu foi na lāgomia ai o ia.

¹⁷Na ia ofu i le amiotonu e pei se ufifatafata, sa i lona ao le puloutau o le olataga; na ia ofu i ofu o le taui ma sui e fai ma ofu; na ia ofu foi i le maelega e pei se ofu talaloa.

¹⁸E pei o a latou amio e faapea ona taui mai e ia, o le toasa i e ua fai o ia mo latou fili, o le taui i e ita ia te ia; na te taui atu lava i nuu tu matafaga.

¹⁹E pau mai i sisifo, latou te matatau i le suafa o Ieova; e pau mai foi i le mea e alu ae ai le la, e matatau i latou i lona mamalu; a oo mai e pei se vaitafe le ua ita mai, ona faatuina lea o se tagavai e tetee atu ia te ia e le Agaga o Ieova.

²⁰E afio mai foi le Faaola i Siona, e afio mai foi i e liliu mai nai le solitulafono o loo ia Iakopo, ua fetalai mai ai Ieova.

²¹A o a‘u, o la‘u feagaiga lenei e faia ma i latou, ua fetalai mai ai Ieova, O lo‘u Agaga o loo i luga ia te oe, ma a‘u upu ua ou tuuina atu ai i lou gutu, e le te‘a ese ia i lou gutu ma gutu o lau fanau, ma gutu o le fanau a lau fanau, e afua mai i na ona aso, a e oo i le faavavau, ua fetalai mai ai Ieova.