Read Samoan Old Version Bible – O LE TUSI PAIA ISAIA, 6 Bible Online

ISAIA, 6 - Samoan Old Version Bible – O LE TUSI PAIA bible

ISAIA, 6

¹O le tausaga na oti ai le tupu o Usia, na a‘u iloa ai le Alii o afio i le nofoālii silisili ma le maualuga, o ona pito ofu foi na tumu ai le malumalu.

²Sa tutū serafi e latalata ane, sa tofu i latou ma apaau e ono, o apaau e lua na ia ufitia ai ona mata, o le lua na ia ufitia ai ona vae, o le lua foi na ia lele a‘i.

³Sa valaau foi le tasi i le tasi, ua faapea ane, E paia, e paia, e paia Ieova o ‘au; ua tumu le lalolagi uma i lona mamalu.

⁴Sa luluina foi faavae o faitotoa i le leo o le na valaau, sa tumu foi le fale i le asu.

⁵Ona ou faapea atu ai lea, Aue a‘u nei! auā ai a‘u a fano; auā o a‘u o le tagata laugutu leaga, o a‘u foi matou te mau faatasi ma le nuu laugutu leaga; auā lava ua iloa i o‘u mata le Tupu o Ieova o a‘u.

⁶Ona lele mai ai lea ia te au o le tasi serafi, sa i lona lima foi le malala ola, na ia au mai i le iofi ai luga o le fata faitaulaga.

⁷Na ia faapai mai ai i lo‘u gutu, ma faapea mai, Faauta, ua papai atu lenei mea i ou laugutu, ua aveeseina ai lau amio leaga, ua faamagaloina foi lau agasala.

⁸Ona ou faalogo atu ai lea i le siufofoga o le Alii, ua faapea mai, O ai ea ou te auina atu? o ai foi e alu atu mo i matou? Ona ou faapea atu ai lea, O a‘u lenei, ina auina atu a‘u.

⁹Ona faapea mai ai lea o ia, Ina alu ia, ma ia e faapea atu i lena nuu, Ia outou matuā faalogo lava, a e tou te le lagona; ia outou matuā vaai foi, a e tou te le iloa.

¹⁰Ia faamafiafiaina loto o lena nuu, ia faatutuli o latou taliga, ma ia faatauaso o latou mata; ina ne‘i vaai o latou mata, ma faalogo o latou taliga, ma lagona o latou loto, ma latou liliu mai, ma faamaloloina i latou.

¹¹Ona ou faapea atu ai lea, Le Alii e, seia afea ea? Ona faapea mai ai lea o ia, Seia faagaogaoina aai ia leai se nofo ai, seia leai foi se tagata i fale, e matuā faatafunaina foi le laueleele,

¹²seia avemamaoina foi tagata e Ieova, seia matuā tuulafoaiina le laueleele.

¹³E ui i lea, e i ai pea lona sefulu, a e toe susunuina lava lea; a e pei o le tapeneto ma le aluna ina ua tutuuina, e i ai pea le pogai; e fai le fanau paia mona pogai.