Read Samoan Old Version Bible – O LE TUSI PAIA ISAIA, 60 Bible Online

ISAIA, 60 - Samoan Old Version Bible – O LE TUSI PAIA bible

ISAIA, 60

¹Tulai ia, ina malamalama ia, auā ua oo mai lou malamalama; ua alu ae foi le pupula o Ieova i ou luga.

²Auā faauta mai, e ufitia le lalolagi i le pouliuli, e ufitia foi nuu i le pogisa; a e afio ae Ieova i ou luga, ma le pupula o Ieova e aliali mai lea i ou luga.

³E o mai nuu ese i lou malamalama, o tupu foi e o mai i latou i le pupula o lou alu ae.

⁴Ia e fetepai i itu uma, ma e vaai, o loo faapotopoto mai i latou uma; ua latou o mai ia te oe, o au tama tane e o mai i latou i mea mamao, e afisi foi au tama fafine i lou itu.

⁵Ona e vaai ai lea, ma e olioli; e polepole oe, ma fiafia tele lou loto; auā e liua mai ia te oe le oa o le sami; e oo mai ia te oe le oloa o nuu ese.

⁶E ufitia oe i le vao kamela e tele, o kamela taanoa o Mitiana ma Efa; o i latou uma mai Seepa e o mai; latou te aumaia auro ma pulu lipano, latou te tala fiafia i viiga o Ieova.

⁷E faapotopotoina ia te oe lafu mamoe uma o Kitara; e auauna ia te oe mamoe poa o Nepaiota, latou te o ae, e talileleia i lo‘u fata faitaulaga; ou te faamatagofie foi le fale o i ai lo‘u matagofie.

⁸O ai ea i latou na o loo felelei e pei se ao, e pei o lupe foi i o latou faitotoa?

⁹Auā e faatalitali nuu tu matafaga ia te au, e muamua foi vaa o Tasesa, e aumaia lau fanau i mea mamao, o a latou ario ma a latou auro e faatasi ma i latou; ona o le suafa o Ieova lou Atua, ma le Paia o Isaraelu, auā ua ia faamatagofie ia te oe.

¹⁰E atiina ae ou pa e tagata ese; e auauna mai o latou tupu ia te oe; auā o lo‘u ita na a‘u taia ai oe; a o lo‘u alofa ou te alofa ai lava ia te oe.

¹¹E avanoa pea lava ou faitotoa, e le punitia i le ao ma le po; ina ia aumaia ia te oe le oloa o nuu ese, ma ia ta‘ita‘iina ai o latou tupu.

¹²Auā e fano le nuu ma le malo ua le mafai ona auauna ia te oe; e matuā faatafunaina ia nuu.

¹³E o mai ia te oe mea e ta‘ua ai Lepanona o le perosi, ma le titara, ma le tasura e faatasi, e faamatagofie a‘i le mea e i ai lo‘u malumalu; ou te faalaleleia foi le mea e tu ai o‘u vae.

¹⁴O le fanau o e na faasaua ia te oe latou te o mai, ma latou ifo ia te oe; o i latou uma e na ‘ino‘ino ia te oe, latou te ifo atu i ou alofivae; latou te faaigoa ia te oe, O le aai a Ieova, O Siona o le aai a le Paia o Isaraelu.

¹⁵Na fai oe ma nuu lafoaiina ma le inosia, ua leai foi se ui ai, a o lenei e faia oe e a‘u ma nuu matagofie e faavavau, ma nuu e olioli ai i lea tupulaga ma lea tupulaga.

¹⁶E te susu i le suāsusu o nuu ese, e te susu foi i susu o tupu; e te iloa foi o a‘u o Ieova o lou Faaola, ma le na faatauina oe, o le Malosi o Iakopo.

¹⁷Ou te aumaia le auro e sui a‘i le ‘apa memea; ou te aumaia foi le ario e sui a‘i le uamea, ma le ‘apa memea e sui a‘i laau, ma uamea e sui a‘i maa; e avea foi e a‘u ou alii ia filemu, ma ou faipule ia amiotonu.

¹⁸E le toe lagona le sauaga i lou laueleele; o le faatafunaina ma le lepetia o mea e le lagona ia i lou nuu; a e faaigoaina e oe ou pa, O le olataga, ma ou puipui, O le viiga.

¹⁹E le toe faia le la mou malamalama i le ao; e le faamalamalama foi ia te oe le masina i lona susulu mai; a e faia Ieova mou malamalama e faavavau, e fai foi lou Atua mou matagofie.

²⁰E le toe goto lou la, e le toe mavae atu foi lou masina; auā e faia Ieova mou malamalama e faavavau; e uma foi aso o lou faanoanoa.

²¹O lou nuu foi e amiotonu i latou uma lava; e fai mo latou le nuu e faavavau; o le tātupu o la‘u faatoaga, o le galuega a o‘u lima, e fai mo‘u viiga.

²²O le toaitiiti e fai ma toaafe, ma le ua faatauvaa e fai ma nuu malosi; o a‘u o Ieova, ou te faavave ona fai i ona lava aso.