Read Samoan Old Version Bible – O LE TUSI PAIA ISAIA, 62 Bible Online

ISAIA, 62 - Samoan Old Version Bible – O LE TUSI PAIA bible

ISAIA, 62

¹Ou te le faalologo auā o Siona, ou te le mapu foi auā o Ierusalema, seia alu atu lana amiotonu e pei o se mea pupula, ma lona olataga e pei o le sulu ua mumū.

²E vāai nuu ese i lau amiotonu, ma tupu uma latou te vāai i lou mamalu; e igoa foi oe i le igoa fou, e ta‘ua mai e le fofoga o Ieova.

³E fai oe ma pale matagofie i le aao o Ieova, ma pulou o le tupu i le alofilima o lou Atua, E le toe ta‘ua oe, Ua lafoaiina;

⁴e le toe ta‘ua foi lou laueleele, Ua tuufua; a e peitai e igoa oe, Ua ia te ia lo‘u fiafia; e igoa foi lou laueleele, O le nofo tane; auā e fiafia Ieova ia te oe, e nofo tane foi lou laueleele.

⁵Auā e pei o le taulealea ua fai avā i le taupou, e faapea au tama tane ona fai avā ia te oe; e pei ona fiafia foi o le faatoafaiavā i lana avā, e faapea ona fiafia o lou Atua ia te oe.

⁶Ierusalema e, ua ou tofia ē leoleo i luga o ou pa, latou te le faalologo e atoa le ao e atoa foi le po, a e faapea lava pea; o outou o e ta‘uta‘uina Ieova, aua ne‘i filemu outou;

⁷aua foi ne‘i tuu atu ia te ia ia filemu, seia faamauina e ia, ma seia faia Ierusalema ma viiga i le lalolagi.

⁸Ua tauto Ieova i lona aao taumatau ma lona aao malosi, Ou te le toe avatu lava lau saito e ‘ai mā e ita ia te oe; e le inumia foi e le fanau a le tagata ese lau uaina sa tigaina ai oe.

⁹A e peitai o e faaputuina latou te aai ai, ma latou vivii ia Ieova; o e taulia mai latou te feinu ai i o‘u lotoā paia.

¹⁰Ui atu, ina ui atu ia i faitotoa, teu le ala o le nuu; faalaulelei, ina faalaulelei ia le ala tele, ia au ese ai maa; ia faatu i luga se tagavai mo le nuu.

¹¹Faauta, ua faailoa e Ieova e oo i le tuluiga o le lalolagi, Fai atu i le tama fafine a Siona, Faauta, ua oo mai lou Faaola; faauta, o loo ia te ia lana taui, ua i ona luma foi le totogi o lana galuega.

¹²E igoa foi i latou, O le nuu paia; O e ua faatauina e Ieova; e igoa foi oe, O le aai e uia, O le aai e le lafoaiina.