Read Samoan Old Version Bible – O LE TUSI PAIA ISAIA, 66 Bible Online

ISAIA, 66 - Samoan Old Version Bible – O LE TUSI PAIA bible

ISAIA, 66

¹O loo faapea ona fetalai mai o Ieova, O le lagi o lo‘u nofoa lea, o le lalolagi o le mea e tu ai ou vae lea; o ifea le fale tou te faia mo a‘u? o ifea foi le mea ou te malolo ai?

²Na faia ia mea uma e o‘u lima; sa i ai lava ia mea uma, ua fetalai mai ai Ieova; a o lenei le tagata ou te vaai i ai, o e ua faamaulalo ma le loto tiga, o le ua gatete foi i la‘u upu.

³O le ua fasi le povi, o le fasi tagata lea; o le ua fai taulaga i le tamai mamoe, o lē vaea le ua o le ulī lea; o le ua faia le taulaga i mea e ‘ai, ua faaitaulaga lea i le toto o le puaa; o le ua fai le faamanatuga i le pulu lipano, o le faamanū lea i le tupua; o i latou nei foi, ua latou filifilia o latou lava ala; ua fiafia foi o latou loto i a latou mea inosia.

⁴O a‘u foi, ou te filifili i mea latou te tiga ai, ou te faaoo foi ia te i latou o mea latou te fefefe ai; auā na ou valaau, a ua leai se na tali mai; na ou fai atu, a ua latou le faalogo mai; ua latou faia le mea leaga i o‘u luma, ua latou filifilia foi le mea ou te le fiafia i ai.

⁵Faalogo mai ia i le upu a Ieova, outou o e gatete i lana upu, O outou uso, o e ‘ino‘ino ia te outou, ma tutuli ia te outou ona o lo‘u igoa, ua latou fai ane, Ia viia Ieova; matou te vaaia foi lo outou olioli, a e mamā lava i latou.

⁶O le leo o le vāvāō mai le aai! o le leo mai le malumalu! o le siufofoga o Ieova, o loo taui atu le taui i e ita ia te ia.

⁷Ua ia fanau mai a o lei faamāsuisui; na ia fanau mai le tama tane a o lei oo ina faatiga.

⁸O ai ea ua faalogo i se mea faapena? O ai ea ua vaai i ni mea faapena? E faatiga ea se nuu i le aso e tasi? E fanaua mai loa ea se nuu? auā na faatiga, ua fanaua mai foi Siona ana tama tane.

⁹Ou te faafaatiga, a ou te le faafanau ea? ua fetalai mai ai Ieova; ou te faafanau, ma a‘u punitia? ua fetalai mai ai lou Atua.

¹⁰Ia fiafia faatasi ma Ierusalema, ma ia oliloli ia te ia outou uma o e alolofa ia te ia; ia matuā olioli faatasi ma ia, outou uma sa faanoanoa ona o ia;

¹¹ina ia outou fesusui, ma ia malilie i le susu o lona faamafanafana mai; ina ia matuā fesusui lava, ma ia outou fiafia i le tele o lona mamalu.

¹²Auā o loo faapea ona fetalai mai o Ieova, Faauta, ou te faatupuina le manuia ia te ia e pei o se vaitafe, ma le mamalu o nuu ese e pei o le alia ua oso i tua; tou te fesusui foi; e afisi outou i lona itu, e faaolioliina foi i ona vae.

¹³E pei o le tagata ua faamaiseina e lona tinā, e faapea ona ou faamaise ia te outou; e faamaiseina lava outou i Ierusalema.

¹⁴Tou te vaaia foi, e olioli ai o outou loto, e tupu olaola foi o outou ivi e pei o le vao mu‘a; e iloa le aao o Ieova e ana auauna; a e matuā toasa o ia i e ita ia te ia.

¹⁵Auā faauta, e afio mai Ieova i le afi, e pei o le asiosio foi ona nofoa faataavalevale, ina ia faafoi atu lona tiga i le toasa, ma lana aoaiga i le mumū o le afi.

¹⁶Auā e faasala Ieova i tagata uma i le afi atoa ma lana pelu; e tele foi le fasi a Ieova.

¹⁷O e latou te faasaina i latou lava, ma latou faamamāina i latou lava i faatoaga, o loo mulimuli i le tasi i totonu, o e aai i tufaaga o puaa, ma le mea e inosia, ma le imoa, e fano faatasi i latou, ua fetalai mai ai Ieova.

¹⁸A o a‘u, ua oo mai i o‘u luma a latou galuega ma o latou manatu, e faapotopotoina ai o nuu ese uma ma gagana; latou te o mai ma latou iloa lo‘u mamalu.

¹⁹Ou te tuuina atu foi ia te i latou le faailoga; a o i latou ua sao, ou te auina atu ni o latou i nuu ese, o Tasesa, ma Pula, ma Luti, o e lolo‘u le aufana, o Tupalu ma Iavana, o nuu tu matafaga e mamao, o e ua le lagona le tala ia te au, ma latou le iloa lo‘u mamalu i nuu ese.

²⁰Latou te aumaia foi o outou uso uma mai nuu uma, o le taulaga ia Ieova, i luga o solofanua, ma nofoa faataavalevale, ma fata, ma falata, ma kamela i lo‘u mauga paia o Ierusalema, ua fetalai mai ai Ieova; e pei ona aumaia e le fanauga a Isaraelu o le taulaga i le ipu mamā i le fale o Ieova.

²¹Ou te aumaia foi ni o latou e fai ma faitaulaga e fai foi ma sa Levī, ua fetalai mai ai Ieova.

²²Auā e pei ona tumau i o‘u luma o le lagi fou ma le lalolagi fou ou te faia, ua fetalai mai ai Ieova, e faapea ona tumau o a outou fanau ma lo outou igoa.

²³O lea masina faatoa vaaia, ma lea masina faatoa vaaia, o lea sapati ma lea sapati e o mai ai tagata uma lava e ifo mai i o‘u luma, ua fetalai mai ai Ieova.

²⁴Latou te o atu foi, ma latou matamata i tino o tagata oti ē sa fouvale ia te au; auā e le mamate o latou ilo, e le tineia foi lo latou afi; e inosia foi i latou e tagata uma lava.