Read Samoan Old Version Bible – O LE TUSI PAIA LEVITIKO 1 Bible Online

LEVITIKO 1 - Samoan Old Version Bible – O LE TUSI PAIA bible

LEVITIKO 1

¹Ua valaau mai Ieova ia Mose, ua fetalai mai ia te ia ai le fale fetafai o le faapotopotoga, ua faapea mai,

²Ina fai atu ia i le fanauga a Isaraelu, ia faapea atu ia i latou, Ai so outou na te au mai se taulaga ia Ieova, ia outou aumaia la outou taulaga i manu vaefa, o povi, po o mamoe.

³Afai o se taulaga mu ai le lafu povi lana taulaga, ina fai taulaga ia i se manu poa e sao ona lelei; na te aumaia i le faitotoa o le fale fetafai o le faapotopotoga ina ia talia o ia i luma o Ieova.

⁴Na te faaee lona lima i le ulu o le taulaga mu, ona talia lea mo ia, e fai ma togiola mona.

⁵Na te fasia foi le tamai povi poa i luma o Ieova; o faitaulaga, o atalii o Arona, latou te au mai le toto, ma sausau le toto ia soo ai i luga o le fata faitaulaga o loo i le faitotoa o le fale fetafai o le faapotopotoga.

⁶Na te saeeseina foi le pa‘u o le taulaga mu, ma pena i ona tufaaga.

⁷Ona tuuina atu ai lea o le afi i luga o le fata faitaulaga e atalii o Arona le faitaulaga, e faaafu ai foi fafie i le afi.

⁸O faitaulaga foi o atalii o Arona, latou te teua tufaaga, o le ulu, atoa foi ma le ga‘o i luga o fafie, ua i luga o le afi ua i luga o le fata faitaulaga;

⁹a o ona tōtōga ma ona alaga na te mulumuluina i le vai; ona susunuina ai lea atoa uma e le faitaulaga i luga o le fata faitaulaga, o le taulaga mu lea, o le taulaga e fai i le afi, o le mea manogi lelei ia Ieova.

¹⁰A e afai na te faia sana taulaga ai le lafu, po o se mamoe, po o se ‘oti, e fai ma taulaga mu, na te au mai ai se poa e sao ona lelei.

¹¹Na te fasi ai foi i le itu i matu o le fata faitaulaga i luma o Ieova; o faitaulaga foi, o atalii o Arona, latou te sausau ai lona toto ia soo ai i luga o le fata faitaulaga.

¹²Na te penaina ona tufaaga, atoa ma lona ulu, ma ona ga‘o, e teuteu e le faitaulaga i luga o fafie ua i luga o le afi, ua i luga o le fata faitaulaga.

¹³A o tōtōga ma ālaga na te mulumuluina i le vai; e au mai mea uma e le faitaulaga, ona susunuina ai lea e le faitaulaga i luga o le fata faitaulaga, o le taulaga mu lea, o le taulaga e fai i le afi, o le mea manogi lelei ia Ieova.

¹⁴A e afai na te faia se taulaga mu ia Ieova i se manu lele, ona au mai ai lea e ia o lana taulaga i manutagi, po o tamai lupe.

¹⁵Ona au mai lea e le faitaulaga i le fata faitaulaga, ma gagau ese lona ulu, ma susunu ai i luga o le fata faitaulaga; ona tatauina ai lea o lona toto i le itu o le fata faitaulaga.

¹⁶Na te toeseina foi lona tagā‘ai ma mea o i ai, ma lafo ai i tafatafa o le fata faitaulaga i le itu i sasae, i le mea o i ai lefulefu.

¹⁷Na te vaeluaina le manu ma ona apaau, a e le motu ese; ona susunu ai lea e le faitaulaga i luga o le fata faitaulaga i luga o fafie ua i luga o le afi, o le taulaga mu lea, o le taulaga e fai i le afi, o le mea manogi lelei ia Ieova.