Read Samoan Old Version Bible – O LE TUSI PAIA LEVITIKO 11 Bible Online

LEVITIKO 11 - Samoan Old Version Bible – O LE TUSI PAIA bible

LEVITIKO 11

¹Ua fetalai mai foi Ieova ia Mose ma Arona, ua faapea mai ia te i laua,

²Ina fai ane ia i le fanauga a Isaraelu, ia faapea ane, O manu ia tou te aai i manu vaefa uma o i le laueleele;

³o manu uma ua magalua le atigivae, ma tosiluaina ona atigivae, ua toe ‘ai foi lana mama; tou te ‘aina ia.

⁴A e peitai o mea ia tou te le aai ai i manu ua toe aai a latou mama, po o manu ua magalua le atigivae; o le kamela, auā e toe ‘ai o ia lana mama, a e le magalua lona atigivae, e leaga ia ia te outou.

⁵O le sefanai foi, auā e toe ‘ai o ia lana mama, a e le magalua le atigivae; e leaga ia ia te outou.

⁶O le anapata foi, auā e toe ‘ai o ia lana mama, a ua le magalua le atigivae; e leaga ia ia te outou.

⁷O le puaa foi, auā e magalua ona atigivae, ua tosiluaina lava, a e le toe ‘ai o ia lana mama; e leaga ia ia te outou.

⁸O latou aano aua tou te aai ai; o latou tino ua mate aua tou te pa‘i i ai; e leaga ia ia te outou.

⁹O mea foi ia tou te aai ai i mea uma o i le vai; o mea uma e fai ‘apa‘apa ma una o i le vai, ma le sami, ma vaitafe, e ‘aina ia e outou.

¹⁰A o mea uma o i le sami ma vaitafe ua leai ni ‘apa‘apa ma una, o mea uma e tataa i le vai, ma mea ola uma o i le vai, e fai ma mea e inosia ia mea ia te outou;

¹¹e fai ma mea e inosia ia mea ia te outou, aua ne‘i ‘aina e outou o latou aano; ia avea foi o latou tino ua mate ma mea e inosia ia te outou.

¹²O mea uma o i le vai e leai ni ‘apa‘apa ma una, o mea e inosia ia ia te outou.

¹³O manu foi ia i manu felelei e inosia ia te outou; e le ‘aina lava ia e outou, o mea e inosia ia; o le aeto,

¹⁴ma le perese, ma le oseni, ma le etai, ma le aia, ma manu e uiga faatasi i ai.

¹⁵O oreva uma ma manu e uiga faatasi i ai.

¹⁶O le iaena, ma le teemesa, ma le saape, ma le nesa, ma manu e uiga faatasi i ai.

¹⁷O le kusa, ma le saleka, ma le inesope,

¹⁸ma le tanisamiti, ma le kati, ma le raama,

¹⁹ma le kasita, ma le matuu, ma manu e uiga faatasi i ai; o le tukapiti ma le pe‘a.

²⁰O mea uma felelei e fetolofi, o loo fetolofi i vae e taifa, e avea ia ma mea e inosia ia te outou.

²¹Na o mea ia tou te aai ai i mea fetolofi uma ua felelei, o mea uma e fetolofi i vae taifa, ua faasilisili nisi vae,

²²e oso ai i le eleele; o mea nei o ia mea tou te aai ai; o le sē akerise, ma mea e uiga faatasi i ai; ma le sē solome, ma mea e uiga faatasi i ai; ma le sē ‘akoli, ma mea e uiga faatasi i ai; ma le sē ‘akava, ma mea e uiga faatasi i ai.

²³A o mea uma e felelei fetolofi i vae taifa, e avea ia ma mea e inosia ia te outou.

²⁴O mea ia e leaga ai outou, ai se pa‘i atu i se mea mate o ia mea, e leaga o ia seia oo i le afiafi.

²⁵Ai se ave foi se mea mate o ia mea, e ta e ia ona ofu, e leaga foi o ia seia oo i le afiafi.

²⁶O manu vaefa uma ua magalua le atigivae, a e le tosiluaina, e le toe ‘ai foi lana mama, e leaga ia ia te outou; ai se pa‘i atu i ai pe a mate e leaga lava o ia.

²⁷O manu uma foi ua savavali i o latou alofivae, o manu uma e savavali i vae taifa, e leaga ia ia te outou o se pa‘i atu i se tino o ia manu ua mate, e leaga ia seia oo i le afiafi.

²⁸Ai se ave foi se tino o ia manu ua mate, e ta e ia ona ofu, e leaga foi o ia seia oo i le afiafi; e leaga ia mea ia te outou.

²⁹O mea nei e leaga ia te outou, o mea fetolofi e fetolofi i le eleele, o le kalati, ma le imoa, ma le moo, ma mea e uiga faatasi i ai.

³⁰O le anaka, ma le pili kua, ma le pili leta, ma le pili hometa, ma le pili nasama.

³¹O mea ia e leaga ia te outou i mea uma e fetolofi; ai se pa‘i atu i ai pe a mamate, e leaga o ia seia oo i le afiafi.

³²O mea uma e paū i ai le tino o so latou ua mate, e leaga lea ia te outou; po o se ipu laau, po o se ofu, po o se pa‘u, po o se taga, o mea uma e fai a‘i galuega e tuuina ia i le vai, e leaga ai seia oo i le afiafi, ona mamā ai lea.

³³O ipu omea uma foi, e paū i ai se mea o ia mea, o mea uma foi o i totonu o ipu, e leaga ia ia te outou, tou te taei ia.

³⁴O mea e ‘ai uma e le sa ona ‘ai ai, a ua oo i ai ni vai, ona leaga lea ia te outou; o mea uma foi e inu e le sa ona inu ai, o loo i ai i ia ipu uma e leaga ia ia te outou.

³⁵O se mea foi ua paū i ai se mea mate o ia mea, e leaga ia, po o se ogaumu, po o lagolago o le ogaumu, ia saeni lava; ua leaga ia mea, e avea ai ma mea leaga ia te outou.

³⁶Na o le vaipuna po o se vaieli, e tele vai o i ai, e mamā lea; a o le e papai i ai so latou tino ua mate, e leaga ia.

³⁷Ai se saito e luluina, o le a luluina ai, ua paū foi i ai se mea mate o ia mea, e mamā lea.

³⁸A e afai ua avane ni suāvai i le saito, ua paū foi i ai se mea mate o ia mea, ona leaga lea ia te outou.

³⁹Afai foi o se manu vaefa e ‘aina e outou a ua mate ia; o se papai atu i lona tino ua mate e leaga o ia seia oo i le afiafi.

⁴⁰O se ‘ai i lona tino ua mate na te taia ona ofu, e leaga foi o ia seia oo i le afiafi; o se ave foi lona tino ua mate na te taia ona ofu, e leaga foi o ia seia oo i le afiafi.

⁴¹O mea fetolofi uma e fetolofi i luga o le eleele e inosia ia, e le ‘aina.

⁴²O mea uma e sosolo i le manava, o mea uma foi e savavali i vae e fa, o mea uma foi le tele o latou vae i mea fetolofi uma e fetolofi i luga o le eleele, aua tou te aai ai, auā o mea ia e inosia.

⁴³Aua ne‘i faainosia outou ia te outou i ni mea fetolofi e fetolofi, aua foi ne‘i leaga outou ia te outou i ia mea, e leaga ai outou;

⁴⁴auā o a‘u o Ieova lo outou Atua; ia faapaiaina outou e outou, ma ia paia outou; auā e paia lava a‘u; aua lava ne‘i leaga outou i ni mea fetolofi e fetolofi i luga o le eleele.

⁴⁵Auā o a‘u o Ieova, o le aveina ae outou ai le nuu o Aikupito, e fai mo outou Atua; ia paia outou, auā e paia lava a‘u.

⁴⁶O le tulafono lenei i manu e tataa, ma manu felelei, ma mea ola uma e fetolofi i vai, atoa ma mea ola uma e fetolofi i luga o le eleele;

⁴⁷ina ia faailogaina mea mamā ma mea e leaga, o manu foi e ‘aina ma manu e le ‘aina.