Read Samoan Old Version Bible – O LE TUSI PAIA LEVITIKO 16 Bible Online

LEVITIKO 16 - Samoan Old Version Bible – O LE TUSI PAIA bible

LEVITIKO 16

¹Ua fetalai mai foi Ieova ia Mose, ina ua uma ona oti o atalii e toalua o Arona, na la faitaulaga i luma o Ieova, ma oti ai i laua.

²Ua fetalai mai Ieova ia Mose, Ina fai ane ia ia Arona lou uso, aua ne‘i ulufale o ia i aso faisoo i le mea paia i tala atu o le ie puipui, i luma o le nofoa o le alofa ua i luga o le atolaau; ina ne‘i oti ai o ia, auā e faaali a‘u i le ao i luga ae o le nofoa o le alofa.

³E faapea ona ulufale o Arona i le mea paia, na te avatua se povi poa taanoa e fai ma taulaga mo le agasala, ma se mamoe poa e fai ma taulaga mu.

⁴E ofu o ia i le ofu tino o le ie vavae e paia, e ofu foi lona tino i le ofuvae o le ie vavae, e fusia foi lona sulugātiti i le fusi o le ie vavae, ma le pulou o le ie vavae e pulou ai o ia; o ofu paia ia, o le mea lea na te taele ai lona tino i le vai, i le ofu ai o ia.

⁵Na te talia foi ai le faapotopotoga o le fanauga a Isaraelu ‘oti poa e lua e fai ma taulaga mo le agasala, ma se mamoe poa e tasi e fai ma taulaga mu.

⁶E avatua foi e Arona lana povi poa taanoa e fai ma taulaga mo le agasala mo ia lava; ona fai ai lea o le togiola mo ia lava, atoa ma lona lava aiga.

⁷E ave foi e ia o ‘oti e lua, ma tuu atu ai i luma o Ieova i le faitotoa o le fale fetafai o le faapotopotoga.

⁸Ona faia lea e Arona o vili i ‘oti ia e lua; o le tasi vili mā Ieova, o le tasi foi vili mā le ‘oti o le a tuu atu e alu.

⁹E avatua foi e Arona le ‘oti na faasaga i ai le vili a Ieova, ma fai a‘i le taulaga mo le agasala.

¹⁰A o le ‘oti na faasaga i ai le vili o le ‘oti o le a tuu atu e alu, e tuuina atu ola lea i luma o Ieova, e fai a‘i le togiola, e tuu atu ai e fai ma ‘oti e alu i le vao.

¹¹E avatua foi e Arona le povi poa taanoa o le taulaga mo le agasala mo ia lava, ona fai ai lea o le togiola mo ia lava, atoa ma lona lava aiga; na te fasi foi le povi poa taanoa o le taulaga mo le agasala mo ia lava.

¹²E ave foi e ia le ipu e mu ai mea manogi, ua tumu i malala aasa o le afi mai le fata faitaulaga i luma o Ieova, ma ona lima ua tumu i mea manogi ua tu‘ininiia, e ave foi e ia i tala atu o le ie puipui.

¹³Na te tuuina atu foi le mea manogi i luga o le afi i luma o Ieova, ina ia ufitia le nofoa o le alofa o i luga o le atolaau o le tulafono i le asu o le mea manogi, ne‘i oti lava ia.

¹⁴E ave foi e ia nisi toto o le povi poa taanoa, ma sausau ai i lona tamatamai lima i le nofoa o le alofa i lona itu i sasae; na te sausau faafitu foi nisi toto i lona tamatamai lima i luma o le nofoa o le alofa.

¹⁵Ona fasi ai lea e ia o le ‘oti o le taulaga mo le agasala, mo le nuu lea, ma ave lona toto i tala atu o le ie puipui, e fai foi i lea toto e pei ona ia faia i le toto o le povi poa taanoa, e sausau ai foi i luga o le nofoa o le alofa, ma luma o le nofoa o le alofa.

¹⁶Na te faia foi se togiola mo le mea paia, ona o le leaga o le fanauga a Isaraelu, ona o latou solitulafono foi i a latou agasala uma; e faapea foi ona faia e ia mo le fale fetafai o le faapotopotoga, o loo tumau ia te i latou i o latou leaga.

¹⁷Aua ne‘i i ai se tagata i le fale fetafai o le faapotopotoga pe a ulufale o ia i le mea paia e fai ai le togiola, ina seia ulufafo ia, seia uma foi ona faia e ia le togiola mo ia, atoa ma lona aiga, atoa foi ma le faapotopotoga uma o Isaraelu.

¹⁸E alu foi o ia i fafo i le fata faitaulaga o i luma o Ieova e fai ai le togiola mo le fata; na te ave foi nisi toto o le povi poa taanoa, atoa ma nisi toto o le ‘oti, ma tuu ai i nifo o le fata faitaulaga ia soo ai.

¹⁹Na te sausau faafitu i ona luga nisi toto i lona tamatamai lima e faamamāina ai, ma faapaiaina ai, ai le leaga o le fanauga a Isaraelu.

²⁰A uma foi ona faia e ia o le togiola mo le mea paia, ma le fale fetafai o le faapotopotoga, ma le fata faitaulaga, ona au mai ai lea o le ‘oti ola;

²¹e faaee foi e Arona ona lima e lua i le ulu o le ‘oti ola, ma faaali i ona luga o amio leaga uma a le fanauga a Isaraelu, ma o latou solitulafono uma i a latou agasala uma, o loo faaee ai i le ulu o le ‘oti, ona tuu atu ai lea o le ‘oti i le lima o le tagata ua saunia e ave i le vao.

²²E ave foi e le ‘oti i ona luga a latou amio leaga uma i le nuu e le āina, na te tuua foi le ‘oti e alu i le vao.

²³Ona ulufale atu ai lea o Arona i le fale fetafai o le faapotopotoga, ma tuu ese ai ofu o le ie vavae na ia ofu ai ina ua ulufale o ia i le mea paia, a e tuu ai lava.

²⁴Na te taelea foi lona tino i le vai i le mea paia, ma ofu i ona lava ofu, ona ulufafo lea, ma fai lana taulaga mu, ma le taulaga mu a le nuu, ona fai ai lea o le togiola mo ia lava atoa ma le nuu.

²⁵O ga‘o foi o le taulaga mo le agasala na te susunuina ia i le fata faitaulaga.

²⁶O le na tuu atu le ‘oti na fai ma ‘oti e tuu atu e alu, na te taia ona ofu, ma taele lona tino i le vai, e mulimuli ane ona alu ane ai lea o ia i le toagālauapi.

²⁷O le povi poa taanoa o le taulaga mo le agasala, ma le ‘oti o le taulaga mo le agasala, na avea o la toto i le mea paia e fai ai le togiola, e ave i tua o le toagālauapi; ma latou susunu i le afi o la pa‘u, ma o la tino, ma o la otaota.

²⁸O le na te susunuina ai e ta e ia ona ofu, ma taele lona tino i le vai, e mulimuli ane ona alu ane ai lea o ia i le toagālauapi.

²⁹O le tulafono lea ia te outou e faavavau, a oo i le fitu o masina, o le aso sefulu o lea masina, ia puapuagatia ai outou e outou, aua tou te faia sina galuega, e se tama a le eleele, po o se tagata ese a āumau ia te outou;

³⁰auā o le aso lea e fai ai le togiola mo outou e faamamāina ai outou, ina ia mamā outou, i luma o Ieova i a outou agasala uma.

³¹O le sapati lea tou te malolo ai, ia puapuagatia ai outou e outou, o le tulafono lea e faavavau.

³²O le faitaulaga foi e faauuina e ia, e tofia foi e ia ina ia faia le faiva o le faitaulaga e sui a‘i lona tamā, o ia lea na te faia le togiola, na te ofu foi i ofu o le ie vavae, o ofu paia lava ia.

³³Na te faia foi le togiola mo le malumalu paia, na te faia foi le togiola mo le fale fetafai o le faapotopotoga, ma le fata faitaulaga, na te faia foi le togiola mo le au faitaulaga, atoa ma tagata uma o le faapotopotoga.

³⁴O le tulafono lenei ia te outou e faavavau, e fai le togiola mo le fanauga a Isaraelu ona o a latou agasala uma, e ta‘i fai faatasi i tausaga. Ua ia faia foi e pei ona fetalai mai ai o Ieova ia Mose.