Read Samoan Old Version Bible – O LE TUSI PAIA LEVITIKO 18 Bible Online

LEVITIKO 18 - Samoan Old Version Bible – O LE TUSI PAIA bible

LEVITIKO 18

¹Ua fetalai mai foi Ieova ia Mose, ua faapea mai,

²Ina fai atu ia i le fanauga a Isaraelu, ia faapea atu ia i latou O a‘u o Ieova lo outou Atua.

³O mea ua faia i le nuu o Aikupito, na outou mau ai, aua tou te faia faapea; o mea foi ua faia i le nuu o Kanana ou te faaoo atu ai outou, aua tou te faia faapea; aua ne‘i usiusitai foi outou i a latou tu.

⁴Ia outou faia a‘u faamasinoga, ia outou tausiusi foi i a‘u tulafono, ina ia savavali i ai; o a‘u o Ieova, o lo outou Atua.

⁵Ia outou tausiusi i a‘u tulafono ma a‘u faamasinoga; o mea ia, a faia ele tagata, e ola ai lava ia; o a‘u Ieova.

⁶Aua ne‘i faalatalata atu so outou i se tasi o lona lava aiga, e faatelenoa i lona tino; o a‘u o Ieova.

⁷Aua e te faatelenoa i lou tamā po o lou tinā, o lou tinā lava ia, aua e te faatelenoa ia te ia.

⁸Aua e te faatelenoa i le avā a lou tamā, o le telenoa lea o lou tamā.

⁹O lou tuafafine, o le afafine o lou tamā, po o le tama a lou tinā, sa fanau mai i le aiga, pe fanau mai i se tasi aiga, aua e te faatelenoa ia te ia.

¹⁰O le afafine o lou atalii, po o le tama a lou afafine, aua e te faatelenoa ia te i laua; auā o lo la telenoa, o lou lava lea.

¹¹O le tama teine a le avā a lou tamā, o lou tamā na fanau ai, o lou tuafafine lea, aua e te faatelenoa ia te ia.

¹²Aua e te faatelenoa i le tuafafine o lou tamā; o le aiga lava ia o lou tamā.

¹³Aua e te faatelenoa i le uso o lou tinā; o le aiga lava ia o lou tinā.

¹⁴Aua e te faatelenoa i le uso o lou tamā, aua e te faalatalata atu i lana avā; o le avā ia a le uso o lou tamā.

¹⁵Aua e te faatelenoa i le avā a lou atalii; o le avā ia a lou atalii, aua e te faatelenoa ia te ia.

¹⁶Aua e te faatelenoa i le avā a lou uso; o le telenoa lea o lou uso.

¹⁷Aua e te faatelenoa i se fafine atoa ma lana tama teine; aua e te tago foi i le afafine o lana tama tane, po o le tama teine a lana tama teine e faatelenoa ia te ia; auā o fafine o lona lava aiga i latou; o le mea leaga lava lea,

¹⁸Aua foi e te fai avā i le uso o lau avā e faatiga ia te ia, e faatelenoa ia te ia atoa ma le tasi a o ola mai o ia.

¹⁹Aua foi e te faalatalata atu i se fafine e faatelenoa ia te ia, ina o nofo ese o ia ona o lona leaga.

²⁰Aua foi ne‘i momoe oulua ma le avā a le tasi, e leaga ai oe ia te ia.

²¹Aua foi e te tuuina atu o so lau fanau e ui ane i le afi ia Moloka. Aua foi e te faaleagaina le igoa o lou Atua; o a‘u o Ieova.

²²Aua lua te momoe ma se tane, e pei ona momoe ma se fafine; o le mea e inosia lava lea.

²³Aua foi lua te momoe ma se manu, e leaga ai oe ia te ia; aua ne‘i tu atu foi se fafine i luma o se manu la te momoe ma ia; o le mea matuā leaga lava lea.

²⁴Aua lava ne‘i leaga outou ia te outou i se tasi mea o ia mea; auā o mea uma lava ia ua leaga ai nuu ou te tulia i o outou luma.

²⁵Ua leaga ai foi le laueleele; ou te taui atu ai le agasala ua i ai, e luai mai lava e le laueleele i e o nonofo ai.

²⁶O lenei, ia outou tausiusi i a‘u tulafono ma a‘u faamasinoga; aua ne‘i outou faia se mea e tasi o ia mea e inosia; o se tama a le eleele, po o se tagata ese e āumau ia te outou.

²⁷Auā o mea e inosia uma ia ua faia e tagata o le nuu ua muai i ai ia te outou, ua leaga ai foi le laueleele;

²⁸ina ne‘i luai mai e le laueleele ia te outou foi, pe a leaga ia te outou, e pei ona luai mai ai i nuu ua muai i ai ia te outou.

²⁹Auā ai se na te faia se mea e tasi o ia mea e inosia, o tagata lava o e faia e vavaeeseina i latou i lo latou nuu.

³⁰O lenei, ia outou tausiusi i a‘u sauniga, ina ne‘i faia e outou se mea e tasi o ia tu e inosia ua faia a o outou le i ai, ina ne‘i leaga ai outou ia te outou; o a‘u o Ieova lo outou Atua.