Read Samoan Old Version Bible – O LE TUSI PAIA LEVITIKO 19 Bible Online

LEVITIKO 19 - Samoan Old Version Bible – O LE TUSI PAIA bible

LEVITIKO 19

¹Ua fetalai mai foi Ieova ia Mose,

²ua faapea mai, Fai atu ia i le faapotopotoga uma o le fanauga a Isaraelu, ia faapea atu ia i latou, Ia paia outou; auā o a‘u o Ieova lo outou Atua e paia lava a‘u.

³Ia taitoatasi outou ma ava i lona tinā ma lona tamā, ma ia outou tausiusi i o‘u sapati; o a‘u o Ieova lo outou Atua.

⁴Aua tou te liliu atu i tupua, aua foi ne‘i faia atua uamea mo outou; o a‘u o Ieova lo outou Atua.

⁵Afai foi tou te faia se taulaga faafetai ia Ieova, ia outou fai taulaga ina ia alofagia outou.

⁶E ‘aina lava ia i lea lava aso ua outou fai taulaga ai, atoa ma a taeao; a e afai ua toe sina mea i le aso tolu, ia susunuina lea i le afi.

⁷Afai foi e ‘aina sina mea i le aso tolu, o le mea e inosia lea; e le talia lava.

⁸O le na te ‘aina e nofo sala o ia, auā ua leaga ia te ia le mea paia a Ieova; e vavaeeseina lava lea tagata i lona nuu.

⁹A outou selesele foi i le seleselegāsaito i o outou fanua, aua e te selesele uma ou pito fanua, aua foi e te ao ni saito ua pauu i lau seleselega.

¹⁰Aua e te foi faalua e tau vine o i lou tovine, aua foi e te faaputu le fua ua totoe i lou tovine; a ia tuu ai mo e matitiva ma tagata ese; o a‘u o Ieova lo outou Atua.

¹¹Aua tou te gaoi, aua foi tou te faa‘ole‘ole, aua foi tou te pelopelo le tasi i le tasi.

¹²Aua tou te tauto i lo‘u igoa ma le pepelo; aua foi e te faaleaga le igoa o lou Atua; o a‘u o Ieova.

¹³Aua e te faasaua i lē lua te tuaoi, pe faoa ana mea; aua ne‘i tuu pea ia te oe seia taeao o le taui o le ua faia lau galuega.

¹⁴Aua e te faifai i lē tutuli, aua foi e te tuu se mea e tausuai ai i luma o le tauaso, a ia e mata‘u i lou Atua; o a‘u o Ieova.

¹⁵Aua tou te faia se mea le tonu i le faamasinoga; aua e te faailogaina le tagata mativa, aua foi le faaaloalo i le tagata mauoa; a ia e faamasino ma le tonu lē lua te tuaoi.

¹⁶Aua e te fealuai i lou nuu ma ē feaveaveai; aua foi e te molimau pepelo i lē lua te tuaoi e oti ai o ia; o a‘u o Ieova.

¹⁷Aua e te ‘ino‘ino i lou uso i lou loto; ia e aoai lava i lē lua te tuaoi, aua foi ne‘i tuu ai pe a le agasala ia te ia.

¹⁸Aua e te taui ma sui, aua foi le faamoemoe lou ita i tagata o lou nuu, a e te alofa atu i lē lua te tuaoi ia pei o oe lava ia te oe; o a‘u o Ieova.

¹⁹Ia outou tausiusi i a‘u tulafono; aua ne‘i felaaia‘i ona ofia o au manu uiga eseese; aua foi e te totō fua uiga eseese i lou fanua; aua foi e te ofu i se ofu i le ie lalaga fefiloi i mea uiga eseese.

²⁰Ai se la te momoe ma le fafine ua nofo pologa, ua fāufautane ua le faatauina lava, pe faasaolotoina; ona sasaina lea, a e le fasiotia i laua, auā na le saoloto o ia.

²¹E aumaia foi e le tane lana taulaga mo le sese ia Ieova i le faitotoa o le fale fetafai o le faapotopotoga, o le mamoe poa e fai ma taulaga mo le sese.

²²Ona fai ai lea e le faitaulaga se togiola mo ia i le mamoe poa o le taulaga mo le sese i luma o Ieova ona o lana agasala ua ia agasala ai; ona faamagaloina ai lea o ia ai le agasala ua ia agasala ai.

²³A outou oo i le nuu, a uma foi ona outou totōina o laau eseese e fai ma mea e ‘ai, ona ta‘uleperitomeina ai lea outou o latou fua; o tau saga e tolu e fai ma mea e lei peritomeina ia te outou; e le ‘aina lava.

²⁴A o lona fa o tausaga e paia uma o latou fua e faafetai ai ia Ieova.

²⁵O lona lima o tausaga tou te aai ai i o latou fua, ina ia fua mai ai ia te outou i o latou fua; o a‘u o Ieova lo outou Atua.

²⁶Aua tou te aai ma le toto; aua foi le fai togafiti faataulāitu, aua foi tou te iite i ao o le lagi.

²⁷Aua tou te sele faataaliolio i o outou lauulu, aua foi e te faasaunoa i ou pito ‘ava.

²⁸Aua tou te saei o outou tino ona o le ua oti, aua foi ne‘i ta tatau ia te outou; o a‘u o Ieova.

²⁹Aua e te faaleaga i lou afafine e fai ma fafine talitane; ina ne‘i masani le nuu ma le faitaaga, ona tumu ai lea o le nuu i le amio leaga.

³⁰Ia outou tausiusi i o‘u sapati, ma ia matatau i lo‘u malumalu; o a‘u o Ieova.

³¹Aua tou te faasaga atu ia i latou o i ai aitu vavalo, aua foi e te saili i taulāitu e leaga ai outou; o a‘u o Ieova lo outou Atua.

³²Ia e tulai atu i luma o le ua ulu sinā, ia e ava foi i luma o le toeaina, ma ia e mata‘u i lou Atua; o a‘u o Ieova.

³³A āumau ia te oe se tagata ese i lo outou nuu, aua tou te faatiga ia te ia.

³⁴O le tagata ese o loo āumau ia te outou, ia tusa lava ia ia te outou ma le tama a le eleele, e te alofa atu ia te ia e pei o oe lava ia te oe; auā sa āumau outou i le nuu o Aikupito; o a‘u o Ieova lo outou Atua.

³⁵Aua tou te faia se mea le tonu i le faamasinoga, i le fua faaloloa, po o le fua faatautau, po o le fua faaofuofu.

³⁶Ia ia te outou le fua faatautau ua tatau, o maa e tatau, o le efa e tatau, ma le sinu e tatau; o a‘u o Ieova lo outou Atua, na ou au mai ia te outou nai le nuu o Aikupito.

³⁷O lenei ia outou tausiusi i a‘u tulafono uma, ma a‘u faamasinoga uma, ma ia outou faia; o a‘u o Ieova.