Read Samoan Old Version Bible – O LE TUSI PAIA LEVITIKO 2 Bible Online

LEVITIKO 2 - Samoan Old Version Bible – O LE TUSI PAIA bible

LEVITIKO 2

¹A au mai foi e se tasi se taulaga i mea e ‘ai ia Ieova, na te faia lana taulaga i le falaoa lelei, ma liligi i ai le suāuu, ma tuu i ai le pulu lipano.

²Na te au mai ai i atalii o Arona o faitaulaga, na te luluu mai ai se luutaga a le falaoa atoa ma le suāuu, ma le pulu lipano uma lava, ona susunu ai lea e le faitaulaga lona faamanatuga i le fata faitaulaga, o le taulaga lea e fai i le afi, o le mea manogi lelei ia Ieova.

³O mea foi e totoe o le taulaga i mea e ‘ai, e ia Arona ma ona atalii ia; o le mea e sili ona paia i taulaga e fai i le afi ia Ieova.

⁴Pe a e avatu foi se taulaga i mea e ‘ai ua tao i le umu, ia fai ni potoi areto lelei e le faafefeteina, ua palua foi ma le uu, po o faapāpā e le faafefeteina, ua nini i le uu.

⁵A e afai o lau taulaga o le taulaga lea i mea e ‘ai i se uamea salafa, e te faia i le falaoa lelei e le faafefeteina, ua palua foi ma le uu.

⁶E te tofitofi foi i ana tofitofigā-areto, ma liligi i ai le uu; o le taulaga i mea e ‘ai lea.

⁷A e afai o lau taulaga o le taulaga lea i mea e ‘ai ua tunua i le ulo, ia faia i le falaoa lelei ma le uu.

⁸E te au mai ai foi ia Ieova le taulaga i mea e ‘ai ua faia i ia mea; a tuuina atu ai foi i le faitaulaga, ona au mai ai lea e ia i le fata faitaulaga.

⁹Ona aveeseina ai lea e le faitaulaga sona faamanatuga ai le taulaga i mea e ‘ai, ma susunu ai i luga o le fata faitaulaga; o le taulaga lea e fai i le afi, o le taulaga lea e fai i le afi, o le mea manogi lelei ia Ieova.

¹⁰O mea foi o totoe o le taulaga i mea e ‘ai, Arona ma ona atalii ia; o le mea e sili ona paia i taulaga e fai i le afi ia Ieova.

¹¹O taulaga uma i mea e ‘ai tou te aumaia ia Ieova, aua ne‘i faafefeteina ia; auā tou te le susunu ni mea e faafefete a‘i, po o se meli, i se taulaga ia Ieova ua fai i le afi.

¹²O le taulaga i mea faapolopoloina, tou te au mai ai ia Ieova; a e le susunuina ia i luga o le fata faitaulaga e fai ma mea manogi lelei.

¹³O taulaga uma foi i au taulaga i mea e ‘ai, e te faamasimaina i le masima; aua le aunoa lau taulaga i mea e ‘ai ma le masima o le feagaiga a lou Atua; o au taulaga uma e te avatu ma le masima.

¹⁴A e afai e te avatua ia Ieova se taulaga i mea e ‘ai i mea faapolopoloina, ia e avatu o ‘au saito ua tunua i le afi, o saito matua ua sasaina, o le taulaga i mea e ‘ai lea o au mea ua faapolopoloina.

¹⁵E te liligi i ona luga le uu, e te faaee foi i ona luga o le pulu lipano; o le taulaga i mea e ‘ai lea.

¹⁶Ona susunuina ai lea e le faitaulaga o lona faamanatuga, o le saito ua sasaina, ma ona uu, ma ona pulu lipano uma lava; o le taulaga lea e fai i le afi ia Ieova.