Read Samoan Old Version Bible – O LE TUSI PAIA LEVITIKO 20 Bible Online

LEVITIKO 20 - Samoan Old Version Bible – O LE TUSI PAIA bible

LEVITIKO 20

¹Ua fetalai mai foi Ieova ia Mose, ua faapea mai,

²Ia e fai atu i le fanauga a Isaraelu, Ai se tagata o le fanauga a Isaraelu, po o se tagata ese e āumau ia Isaraelu, na te avatua so ana fanau ia Moloka; e fasiotia lava o ia; e fetogi lava e tagata o le nuu ia te ia i maa.

³Ou te faia foi lea tagata mo‘u fili, ma ou vavaeeseina o ia i lona nuu; auā ua ia avatu lana fanau ia Moloka, e faaleaga ai lo‘u malumalu, ma faaleaga ai lo‘u igoa paia.

⁴Afai foi e ufiufi lava e tagata o le nuu o latou mata i lea tagata i lona avatu o lana fanau ia Moloka, ma latou le fasioti ia te ia;

⁵ona ou faia lea mo‘u fili o lea tagata atoa ma lona aiga, ou te vavaeeseina i lo latou nuu o ia, atoa ma i latou uma o e mulimuli atu ia te ia e mulilulua ai ma Moloka.

⁶O le tagata foi e liliu ane i e o i ai aitu vavalo, ma e taulāitu, e mulimuli atu i ai e mulilulua ai, ou te faia mo‘u fili lea tagata, ou te vavaeeseina foi o ia i lona nuu.

⁷O lea ia faapaiaina ai outou e outou, ma ia paia lava outou; auā o a‘u o Ieova lo outou Atua.

⁸Ma ia outou tausiusi i a‘u tulafono, ma ia outou faia; o a‘u o Ieova o lē faapaiaina outou.

⁹Ai se tasi na te fetuu i lona tamā po o lona tinā e fasiotia lava o ia; ua ia fetuu i lona tamā po o lona tinā; e ia te ia lava lona toto.

¹⁰O le tagata foi ua la mulilua ma le avā a le tasi tagata, o le ua mulilua ma le avā a lē la te tuaoi, o le tane mulilua ma le fafine mulilua, e fasiotia lava i laua.

¹¹O le tagata foi la te momoe ma le avā a lona tamā, ua faatelenoa e ia i lona tamā; e fasiotia lava i laua; e ia te i laua o la toto.

¹²Afai foi e momoe se tagata ma le avā a lona atalii, e fasiotia lava i laua; ua la faia le mea matuā leaga lava; e ia te i laua o la toto.

¹³Afai foi e momoe se tane ma le tasi tane, e pei ona momoe o le tane ma le fafine, ua la faia le mea leaga lava; e fasiotia lava i laua; e ia te i laua o la toto.

¹⁴Afai foi e fai avā se tagata i le fafine atoa ma le tinā o le fafine, o le mea leaga lava lea; e susunuina i latou i le afi, o ia atoa ma i laua; ina ne‘i i ai le amio leaga ia te outou.

¹⁵Afai foi e momoe se tane ma se manu, e fasiotia lava o ia; tou te fasimate foi i le manu.

¹⁶Afai foi e faalatalata atu se fafine i se manu la te momoe, e te fasioti i le fafine atoa ma le manu; e fasiotia lava i laua; e ia te i laua o la toto.

¹⁷Afai foi e tago e le tagata lona tuafafine, o le afafine o lona tamā, po o le tama a lona tinā, ma iloa lona telenoa, ua iloa foi e le fafine lona telenoa; o le mea leaga lava lea; ia vavaeeseina i laua i luma o tagata o lo la nuu; ua ia faatelenoa i lona tuafafine; e nofo sala lava o ia.

¹⁸Ai se tane ua la momoe ma le fafine o loo na o faia le ma‘i, ua ia faatelenoa foi ia te ia; ua na su‘ena lona puna, o le fafine foi ua faaaliali e ia le puna o lona toto; e vavaeeseina lava i laua i lo la nuu.

¹⁹Aua foi e te faatelenoa i le uso o lou tinā, po o le tuafafine o lou tamā; auā o le faatelenoa lea e le tagata i lona lava aiga; e nofo sala lava i laua.

²⁰Ai se tagata la te momoe ma le avā a le uso o lona tamā, ua faatelenoa e ia i le uso o lona tamā; e nofo sala i laua; e leai ni a la fanau, e oo lava i le oti.

²¹Afai foi e fai avā se tagata i le avā a lona uso, o le mea leaga lea; ua faatelenoa e ia i lona uso; e leai ni a la fanau.

²²O lenei, ia outou tausiusi i a‘u tulafono uma, ma a‘u faamasinoga uma, ma outou faia; ina ne‘i luai mai ia te outou e le laueleele ou te faaoo atu ai outou e nonofo ai.

²³Aua lava tou te usiusitai i tu a nuu ou te tulia i o outou luma; auā ua latou faia ia mea uma, o le mea lea ua inosia ai lava i latou e a‘u.

²⁴A ua uma ona ou fai atu ia te outou, E fai mo outou lo latou laueleele, ou te foai atu ai lava ia te outou e fai mo outou tofi, o le nuu o loo tafe ai le suāsusu, ma le meli; o a‘u o Ieova lo outou Atua, ua ou vavaeeseina outou i nuu uma.

²⁵Ia outou faailogaina foi manu vaefa mamā, ma ē leaga, o manu felelei foi e leaga, ma ē mamā; aua lava ne‘i leaga outou ia te outou i se manu vaefa, po o se manu lele, po o se isi mea lava e totolo i le eleele, ua ou faailogaina ia te outou e fai ma mea leaga.

²⁶A ia paia lava outou mo a‘u; auā o a‘u o Ieova, o loo paia lava a‘u, ua ou vavaeeseina foi outou i nuu uma, ina ia fai lava outou mo a‘u.

²⁷O se tane foi po o se fafine o i ai se aitu vavalo, po o ua fai ma taulāitu, ia fasiotia lava ia; latou te fetogi ia i latou i maa; e ia te i latou o latou toto.