Read Samoan Old Version Bible – O LE TUSI PAIA LEVITIKO 22 Bible Online

LEVITIKO 22 - Samoan Old Version Bible – O LE TUSI PAIA bible

LEVITIKO 22

¹Ua fetalai mai foi Ieova ia Mose, ua faapea mai,

²Fai atu ia ia Arona ma ona atalii, ia latou faamamao i mea paia a le fanauga a Isaraelu, ina ne‘i faaleagaina lo‘u igoa paia e i latou i mea ua latou faasaina mo a‘u; o a‘u o Ieova.

³Fai atu ia ia i latou, Ai se tagata o lo outou aiga uma i o outou tupulaga amuli, e alu ane o ia i mea paia ua faasaina e le fanauga a Isaraelu ia Ieova, a o loo ia te ia se mea e leaga ai o ia, e vavaeeseina lava lea tagata i o‘u luma; o a‘u o Ieova.

⁴Ai se tagata o le fanau a Arona ua lepela, po o ua ia te ia se gau, e le ‘ai lava o ia i mea paia, ina seia mamā o ia; ai se pai atu foi i se mea ua leaga ona o le tagata ua oti, po o se tagata ua alu le sua o lona tino;

⁵ai se tagata foi na te pai atu i se mea totolo e leaga ai o ia, po o se tagata e leaga ai o ia i se mea leaga o ia te ia;

⁶o le tagata lava na te pai atu i ai, e leaga o ia seia oo i le afiafi, e le ‘ai foi o ia i mea paia seia taelea lava lona tino i le vai.

⁷A goto le la, ona mamā ai lea o ia; e mulimuli ane ona ‘ai lava lea o ia i mea paia, auā o ana lava mea e ‘ai ia.

⁸Ai se mea ua mate fua, po o ua saeia, aua le ‘aina lava e ia ne‘i leaga ai o ia ia te ia i lea mea; o a‘u o Ieova.

⁹Ia latou tausiusi i a‘u sauniga, ina ne‘i nofo sala ai i latou, ma oti ai, pe afai latou te soli ai; o a‘u o Ieova o lē faapaiaina i latou.

¹⁰E le ‘ai lava se tasi tagata ese i le mea paia; o le tagata ese ua la mafuta ma le faitaulaga, po o sē ua galue i le totogi, e le ‘ai lava o ia i le mea paia.

¹¹A e afai e faatauina e le faitaulaga se tagata i ana tupe, e ‘ai ai lava o ia, atoa ma le ua fanau mai i lona aiga; latou te aai i ana lava mea e ‘ai.

¹²Afai foi ua nofo tane le afafine o le faitaulaga i le tagata ese, aua ne‘i ‘ai o ia i se taulaga i mea paia.

¹³A e afai ua oti le tane a le afafine o le faitaulaga, po ua aleia o ia, ua leai foi sana tama, a ua foi mai o ia i le aiga o lona tamā, e pei ona i ai ina o teine o ia, e ‘ai lava o ia i le mea e ‘ai a lona tamā; a e leai se tagata ese na te ‘ai ai.

¹⁴Afai foi e ‘aina e se tagata le mea paia, ma le le iloa, ona faaopoopo atu ai lea e ia lona vaega e lima o mea, ma avatu ai i le faitaulaga, atoa ma le mea paia.

¹⁵Aua foi ne‘i leaga ia te i latou o mea paia a le fanauga a Isaraelu, ua latou fai taulaga ai ia Ieova;

¹⁶ma latou faanofo sala ia i latou ona o le sese, ina ua latou aai i a latou mea paia; auā o a‘u o Ieova o lē faapaiaina i latou.

¹⁷Ua fetalai mai foi Ieova ia Mose, ua faapea mai,

¹⁸Ina fai atu ia Arona, ma ona atalii, atoa ma le fanauga uma a Isaraelu, ia faapea atu ia i latou, Ai se tagata o le aiga o Isaraelu, po o se tagata ese e i Isaraelu ua fia avatu sana taulaga i mea uma na ia tauto ai, ma mea uma e fai fua i le loto i mea latou te fai taulaga ai ia Ieova e fai ma taulaga mu;

¹⁹tou te faia ma le loto i ai o se manu poa e sao ona lelei, o se povi, po o se mamoe, po o se ‘oti.

²⁰Ai se manu ua i ai se mea leaga, aua tou te avatu ai; auā e le talia lea mo outou.

²¹Ai se avatu se taulaga faafetai ia Ieova, e faataunuu ai le mea na ia tauto ai, po o le taulaga na te faia fua i lona loto, po o se povi, po o se mamoe, ia sao ona lelei, ina ia talia; aua ne‘i i ai mea e tasi e pona ai.

²²O se mea ua tauaso, po ua gau se vae, po ua mutu, po ua i ai se papala, po o se ma‘i pa‘upa‘ua, po o se ma‘i mageso ua poupoua, aua tou te avatu mea ia ia Ieova, aua foi tou te fai a‘i taulaga e fai i le afi i luga o le fata faitaulaga ia Ieova.

²³O se povi, po o se tamai mamoe ua i ai se mea faalegatusa, po ua avilu, faitalia lava oe ona fai taulaga ai e fai ma taulaga ua e loto lava ona fai, a e le talia lava lea i le mea na e tauto ai.

²⁴Aua tou te avatu ia Ieova se manu ua tu‘itu‘ia, po ua momomo, po ua omia, po ua seleseleina ona fua manava; tou te le faia foi lea i lo outou nuu.

²⁵Aua foi ne‘i avatua mai le lima o le tagata ese le mea e ‘ai a lo outou Atua i se tasi o ia mea; auā o i ai lo latou leaga, e i ai mea e pona ai i latou; e le talia ia mo outou.

²⁶Ua fetalai mai foi Ieova ia Mose, ua faapea mai,

²⁷A fanaua mai se povi poa, po o se mamoe, po o se ‘oti, ona i ai lea o ia i lona tinā i aso e fitu; a e amata i le aso valu ma aso ua lumanai ona talia ma taulaga e fai i le afi ia Ieova.

²⁸Aua tou te fasia se povi, po o se mamoe, atoa ma lana tama i le aso e tasi.

²⁹Afai foi tou te loto e fai se taulaga faaneenee ia Ieova, ina fai taulaga lava ia ma le loto.

³⁰E ‘aina lava ia i lea lava aso; aua ne‘i totoe sina mea ia te outou seia taeao; o a‘u o Ieova.

³¹Ia outou tausiusi i a‘u poloaiga, ma ia outou faia; o a‘u o Ieova.

³²Aua foi tou te faaleagaina lo‘u igoa paia; a ia faapaiaina lava a‘u i le fanauga a Isaraelu; o a‘u o Ieova o lē faapaiaina outou;

³³o le au mai ia te outou nai le nuu o Aikupito, e fai mo outou Atua; o a‘u o Ieova.