Read Samoan Old Version Bible – O LE TUSI PAIA LEVITIKO 26 Bible Online

LEVITIKO 26 - Samoan Old Version Bible – O LE TUSI PAIA bible

LEVITIKO 26

¹Aua tou te faia ni tupua mo outou, aua foi tou te faatuina se tupua ua ta, po o se tupua maa, aua foi tou te tuu se faatagata maa i lo outou nuu, e ifo atu i ai; auā o a‘u o Ieova lo outou Atua.

²Ia outou tausiusi i o‘u sapati, ma outou matatau i lo‘u malumalu; o a‘u o Ieova.

³Afai tou te savavali i a‘u tulafono, ma tausi i a‘u poloaiga, ma fai ai;

⁴ona ou avatu ai lea le ua ia te outou i ona po e tatau ai, e fua mai foi le laueleele i ona lava fua, o laau foi o i le fanua e fua mai ai i o latou fua.

⁵E aulia le taugāvine e le soligāsaito; e aulia foi le tau e lulu ai saito e le taugavine, tou te aai foi i a outou mea e ‘ai, ma maoona ai; tou te nonofo foi i lo outou nuu ma le filemu.

⁶Ou te avatu le filemu i le nuu, tou te taooto foi, e leai se tasi e faamatau ia te outou; ou te faaumatia foi manu feai ai le nuu, e le oo foi le pelu i lo outou nuu.

⁷Tou te tulituliloa foi i e o fai outou mo latou fili, latou te oti ai i o outou luma i le pelu.

⁸E tulia le toaselau e le toalima o outou, e tulia foi le sefulu o afe e le toaselau o outou; o e fai outou mo latou fili e oti i latou i o outou luma i le pelu.

⁹Auā ou te manatu alofa ia te outou, ou te faauluolaina outou, ma faatoateleina, ou te faatumauina foi la‘u feagaiga ia te outou.

¹⁰Tou te aai i mea tuai, ma outou ave i fafo mea tuai ona o mea fou.

¹¹Ou te tuu foi lo‘u malumalu i totonu ia te outou; e le ‘ino‘ino foi a‘u ia te outou.

¹²Ou te fealuai foi i totonu ia te outou, e fai foi a‘u mo outou Atua, e fai foi outou mo‘u nuu.

¹³O a‘u o Ieova lo outou Atua, o lo na au mai ia te outou nai le nuu o Aikupito, ina ia le fai outou mo latou pologa; na ou gauia o a outou amo, ma ua faasavavali sasa‘o ai outou.

¹⁴A e afai tou te le faalogo mai ia te au, ma outou le faia ia poloaiga uma;

¹⁵afai foi tou te lafoai i a‘u tulafono, ma outou ‘ino‘ino i a‘u faamasinoga, a outou le faia foi a‘u poloaiga uma, a e tuumavaega outou i la‘u feagaiga;

¹⁶ona ou faia lea e a‘u o nei mea ia te outou; ou te tuuina atu ia te outou le fefe, o le ma‘i faaiiva, ma le ma‘i vevela e fole ai mata, ma faavaivai ai loto; tou te lulufuaina a outou saito, auā e ‘aina e i latou o e fai outou mo latou fili.

¹⁷Ou te faia outou mo‘u fili, e fasia foi outou i luma o e ita ia te outou; e pule foi ia te outou e o ‘ino‘ino ia te outou; e sosola foi outou a o le tuliloaina e se tasi.

¹⁸Afai foi tou te le āu faalogo mai ia te au ona o ia mea, ona ou faaopoopo faafitu ai lea ona aoai atu ia te outou ona o a outou agasala.

¹⁹Ou te nutipalaina lo outou malosi ua outou mitamita ai; ou te liliu ai lo outou lagi e pei o le uamea, ma lo outou laueleele e pei o le ‘apa memea.

²⁰E faamaumau fua foi lo outou malosi; auā e le fua mai ni ona fua i lo outou laueleele, o laau foi i lo outou fanua e le fua mai ai ni o latou fua.

²¹Afai foi tou te tetee mai ia te au, ma outou le faalogo mai lava ia te au, ona ou faaopoopo faafitu ai lea o mala ia te outou e tusa ma a outou agasala.

²²Ou te aauina atu foi o manu feai ia te outou, e āufanaua ai outou, ma faaumatia a outou manu, ma faatoaitiiti ia te outou; e gaogao foi o outou ala.

²³Afai foi e le mafai ona aoaiina outou e a‘u i mea ia, a e tetee mai outou ia te au;

²⁴ona ou tetee atu ai lea ia te outou, ma ou aoai faafituina atu ia te outou ona o a outou agasala.

²⁵Ou te faaoo foi le pelu ia te outou, e taui atu ai lo outou tuumavaega i le feagaiga; a faapotopotoina outou i a outou aai, ou te au atu ai le faama‘i ia te outou e tutuina atu foi outou i lima o e fai outou mo latou fili.

²⁶A uma ona ou gauia le tootoo o a outou mea e ‘ai, ona tao ai lea e fafine e toasefulu a outou mea e ‘ai i le ogaumu e tasi, latou te toe avatu foi a outou mea e ‘ai ua uma ona fuatia, tou te aai foi, a e le maoona ai.

²⁷A e afai tou te le faalogo mai lava ia te au ona ia mea, a e tetee mai pea ia te au;

²⁸ona ou tetee atu ai lea ia te outou ma le ita; o a‘u lava ou te aoai faafitu ia te outou ona o a outou agasala.

²⁹Tou te aai foi i tino o outou atalii, ma tino o outou afafine tou te aai ai.

³⁰Ou te faaumatia a outou mea maualuluga, ma vavae i lalo a outou tupua o le la, ma au lafo o outou tino ua oti i luga o tino o a outou tupua, e inosia foi outou e a‘u.

³¹Ou te faatafunaina foi a outou aai, ma faatafunaina o outou malumalu, e le oo mai foi ia te au le manogi o a outou mea manogi lelei.

³²Ou te faatafunaina le nuu; e taufaiofo o e nonofo ai e o fai outou mo latou fili.

³³Ou te faataapeape foi ia te outou i nuu ese, ou te to ae le pelu e mulimuli atu ia te outou; e faagaogao lo outou fanua, e faatafunaina foi a outou aai.

³⁴Ona faaatoatoaina lea o sapati o le laueleele i aso uma e gaogao ai, a o i ai outou i le nuu o e fai outou mo latou fili; o ona po ia e mapu ai le laueleele, ma faaatoatoa ai ona sapati.

³⁵O aso uma e gaogao ai e mapu ai ia; auā na le mapu i o outou sapati ina ua outou nonofo ai.

³⁶O e ua totoe foi ou te faaoo ai le vaivai i o latou loto i nuu o e fai i latou mo latou fili; e tulia i latou i le gasē o le lau mea e lelea; latou te sosola ai e pei ona sosola tagata ai le pelu; latou te pauu foi a o lei tuliloaina e se tasi.

³⁷E pauu foi i latou le tasi i luga o le tasi, e peiseai o i luma o le pelu a o lei tuliloaina e se tasi; e leai foi so outou malosi e tetee atu ai i e o fai outou mo latou fili.

³⁸E fano foi outou i nuu ese, e ‘aina foi outou e le laueleele o e fai outou mo latou fili.

³⁹O e totoe ia te outou e faaumatia ai i latou ona o a latou amio leaga i nuu o e fai outou mo latou fili; ona o le amio leaga foi a o latou tamā e faaumatia ai i latou.

⁴⁰Afai latou te faaali ai i a latou amio leaga, ma amio leaga a o latou tamā atoa ma lo latou solitulafono ua latou soli ai la‘u tulafono, ma latou tetee mai ia te au;

⁴¹ma ou tetee atu ia i latou, ua avea foi i latou e a‘u i le nuu o e fai i latou mo latou fili, pe afai e iu ina faamaulalo ai o latou loto e le peritomeina, ma ua latou faaatoatoaina le totogi o a latou amio leaga;

⁴²ona ou manatua ai lea o la‘u feagaiga ma Iakopo, ma la‘u feagaiga ma Isaako, atoa foi ma la‘u feagaiga ma Aperaamo ou te manatua ai, ou te manatua ai foi le nuu.

⁴³E tuua le laueleele e i latou, e faaatoatoa ai foi ona sapati, ina o tuufua e le o i ai i latou; ma ua latou faaatoatoaina le totogi o a latou amio leaga; ona o lenei lava mea ina ua latou lafoai a‘u faamasinoga, auā foi na latou ‘ino‘ino i a‘u tulafono.

⁴⁴A e ui lava i nei mea, a o i ai i latou i le nuu o e fai i latou mo latou fili, ou te le lafoai ia i latou, ou te le ‘ino‘ino foi ia i latou, ia matuā faaumatia, ma tatalaina ai la‘u feagaiga ma i latou; auā o a‘u o Ieova lo latou Atua.

⁴⁵A e peitai ona o i latou ou te manatua ai le feagaiga ma o latou tamā, na ou aumaia nai le nuu o Aikupito i luma o nuu ese ina ia fai a‘u mo latou Atua; o a‘u o Ieova.

⁴⁶O sauniga ma faamasinoga ma tulafono ia, na tuuina ai e Ieova i lo latou va ma le fanauga a Isaraelu i le mauga o Sinai i le lima o Mose.