Read Samoan Old Version Bible – O LE TUSI PAIA LEVITIKO 27 Bible Online

LEVITIKO 27 - Samoan Old Version Bible – O LE TUSI PAIA bible

LEVITIKO 27

¹Ua fetalai mai foi Ieova ia Mose, ua faapea mai,

²Fai atu ia i le fanauga a Isaraelu, ia faapea atu ia i latou, Ai se tagata na te faasaina se tasi i le tauto; ona fai lea o tagata mo Ieova e tusa ma lau faatatau.

³E faia foi lau faatatau i le tane e afua i le luafulu o ona tausaga, e oo lava i ona tausaga e onogafulu, e te faatatau i sekeli ario e limagafulu, e tusa ma le sekeli o le malumalu.

⁴A e afai o se fafine, ona e faatatau ai lea i sekeli e tolugafulu.

⁵A e afai o se tagata e amata i le lima ona tausaga e oo lava i ona tausaga e luafulu, ona e faatatau ai lea i le tama tane o sekeli e luafulu, o le tama fafine o sekeli e tasi le sefulu.

⁶Afai e amata i lona masina e tasi e oo i ona tausaga e lima, ona faatatau ai lea i le tama o sekeli ario e lima ia e faatatau i le teine o sekeli ario e tolu.

⁷Afai foi o se tagata e onogafulu ona tausaga, atoa ma e ua matutua ai; afai o se tane, ona e faatatau ai lea o sekeli e tasi le sefulu ma le lima, a o le fafine e tasi le sefulu o sekeli.

⁸A e afai e le o ia te ia mea na e faatatau i ai, ona alu ane ai lea o ia i luma o le faitaulaga, e faatatauina foi e le faitaulaga i le na tauto e tusa ma mea na te maua, e faapea lava ona faatatau e le faitaulaga ia te ia.

⁹A e afai o se manu latou te fai a‘i taulaga ia Ieova, o mea faapea uma e foaiina atu ai ia Ieova, e paia lava ia.

¹⁰Aua na te avatua se tasi e sui a‘i, o le lelei e sui a‘i le leaga, po o le leaga e sui a‘i le lelei; afai foi na te suia lava le manu i se tasi manu, ona paia ai lea atoa ma lona sui.

¹¹Afai foi o se manu leaga latou te le fai a‘i taulaga ia Ieova; ona tuuina atu ai lea e ia o le manu i luma o le faitaulaga.

¹²Ona faatatauina lea e le faitaulaga pe lelei pe leaga; e tusa ma lau faatatau, o oe na le faitaulaga, e faapea lava ia.

¹³A e afai ua fia toe faatau mai ai e ia, ona faaopoopoina ai lea e ia o lona vaega e lima i lau faatatau.

¹⁴Afai foi ua faasaina e se tagata lona fale ina ia paia ia Ieova, ona faatatau ai lea e le faitaulaga, pe lelei pe leaga; e tusa mona faatatauina e le faitaulaga, e faapea lava ia.

¹⁵A e afai ua fia toe faatau mai lona fale e le na faasaina ai, ona faaopoopoina ai lea e ia o le vaega e lima o tupe i lau faatatau, ona fai ai lea mona.

¹⁶Afai foi e faasaina ia Ieova e se tagata se fasi fanua o lona lava fanua, ona e faatatau ai lea e tusa ma ona fua e luluina ai; o le faatatau o le fanua e luluina ai o le somera o karite, o sekeli ario e limagafulu ia.

¹⁷Afai foi na te faasaina lona fanua e afua i le tausaga o le iupeli, e tusa ma lau faatatau, e faapea lava ia.

¹⁸A e afai na te faasaina lona fanua a ua mavae le iupeli, ona faitau ai lea e le faitaulaga o tupe e tusa ma tausaga o totoe, ina seia oo lava i le tausaga o le iupeli, e vavae ese ia ai lau faatatau.

¹⁹A fia toe faatau mai le fanua e le tagata na na faasaina ai, ona faaopoopoina ai lea e ia o le vaega e lima o tupe o lau faatatau, ona faamauina ai lea ia te ia.

²⁰Afai foi ua le fia toe faatau mai le fanua, po ua faatauina le fanua i se tasi tagata, ona le toe faatauina mai ai lava lea.

²¹A e peitai a oo ina tuuina atu le fanua i le iupeli, ona paia lea ia Ieova, e tusa ma se fanua ua faatoina; e fai lava lea mo le faitaulaga.

²²Afai foi e faasaina ia Ieova e se tasi se fanua ua na faatauina, a e le o lona lava fanua;

²³ona faitau atu ai lea e le faitaulaga ia te ia le faatusa o lau faatatau, e oo lava i le tausaga o le iupeli; na te avatua foi o lau faatatau i lea lava aso, o le mea paia lava lea ia Ieova.

²⁴A oo i le tausaga o le iupeli, ona toe iu atu ai lea o le fanua ia te ia na faatau mai ai, o ia lava lea na fai ai le fanua mona.

²⁵O au faatatau uma foi ia tusa ia ma le sekeli o le malumalu; e luafulu o kire o le sekeli lea.

²⁶A o ulumatua a manu e a Ieova a latou ulumatua, e le faasaina ai lea e se tasi; po o se povi, po o se mamoe; o mea lava ia a Ieova.

²⁷A e afai o se manu leaga, ona toe faatau mai ai lea e ia e tusa ma lau faatatau, ma ia faaopoopo i ai lona vaega e lima; a e afai ua le toe faatauina mai e ia, ona faatauina atu ai lea e tusa ma lau faatatau.

²⁸Peitai ane o mea uma e faatoina, ua faatoina e se tasi ia Ieova, o se mea foi o ana mea uma, o se tagata, po o se manu, po o lona lava fanua, e le faatauina atu ai, pe toe faatauina mai; o mea ua faatoina uma e matuā paia lava ia ia Ieova.

²⁹E leai lava se mea ua faatoina, e faatoina e tagata e toe faatauina mai; a e fasia lava.

³⁰O mea uma foi e sefulu a‘i mea i le fanua, o saito e luluina i le fanua, po o fua o laau, o mea ia a Ieova; ua paia lava ia Ieova.

³¹A fia toe faatau mai e se tagata mea e sefulu a‘i ana mea, na te faaopoopo i ai lona vaega e lima;

³²i le ma le sefulu o manu uma, o povi, atoa ma mamoe, o mea uma lava e ui ane i lalo o le tootoo, e paia Ieova lona sefulu.

³³Aua ne‘i suesue e ia, po ua lelei, po ua leaga, aua foi ne‘i fesuiaiina; afai foi ua suia lava e ia i se tasi manu, ona paia ai lea o lena, atoa ma lona sui; e le toe faatauina mai.

³⁴O poloaiga ia na fetalai mai ai Ieova ia Mose mo le fanauga a Isaraelu i le mauga o Sinai.