Read Samoan Old Version Bible – O LE TUSI PAIA LEVITIKO 3 Bible Online

LEVITIKO 3 - Samoan Old Version Bible – O LE TUSI PAIA bible

LEVITIKO 3

¹A e afai o se taulaga faafetai lana taulaga, afai ua fai taulaga ai o ia ai le lafu povi; po o se poa, po o se manu fafine, ia fai taulaga ai o ia i luma o Ieova i se manu e sao ona lelei.

²Na te faaee foi lona lima i le ulu o lana taulaga, ma fasi ai i le faitotoa o le fale fetafai o le faapotopotoga; ona sausauina atu ai lea o le toto e atalii o Arona o faitaulaga, e soo ai i luga o le fata faitaulaga.

³Ona avatu ai lea e ia se taulaga faafetai, o le taulaga e fai i le afi ia Ieova; o le ga‘o alo ma ga‘o uma lava o i ai,

⁴o fatuga‘o foi e lua ma ga‘o o i ai o loo i luga o lāgotua; a o le ga‘o punipū o i luga o le finagalo, ma fatuga‘o, na te aveeseina ai.

⁵Ona susunuina ai lea e atalii o Arona i le fata faitaulaga i luga o le taulaga mu i luga o fafie ua i luga o le afi; o le taulaga lea e fai i le afi, o le mea manogi lelei ia Ieova.

⁶Afai foi mai le lafu mamoe lana taulaga, e fai ma taulaga faafetai ia Ieova; po o se poa po o se manu fafine, ia avatua se manu e sao ona lelei.

⁷Afai e avatu e ia se tamai mamoe mana taulaga, ia avatua lava i luma o Ieova.

⁸Na te faaee lona lima i le ulu o lana taulaga, ma fasi ai i luma o le fale fetafai o le faapotopotoga; ona sausauina atu ai lea o lona toto e atalii o Arona i luga o le fata faitaulaga e soo ai.

⁹Ona avatu ai lea e ia o le taulaga faafetai, o le taulaga e fai i le afi ia Ieova; o lona ga‘o ma le iu atoatoa, na te vavaeeseina foi lea i le mea aupito ane i le ivitu; o le ga‘o alo,

¹⁰ma ga‘o uma o i ai, o fatuga‘o foi e lua, ma ga‘o o i ai, o loo i luga o lāgotua; a o le ga‘o punipū o i luga o le finagalo, ma fatuga‘o, na te aveeseina ai.

¹¹Ona susunuina ai lea e le faitaulaga i le fata faitaulaga; o le mea e ‘ai lea o le taulaga e fai i le afi ia Ieova.

¹²Afai foi o se ‘oti lana taulaga, ia avatua lava i luma o Ieova.

¹³Na te faaee foi lona lima i lona ulu, ma fasi ai i luma o le fale fetafai o le faapotopotoga; ona sausauina atu ai lea o lona toto e atalii o Arona i luga o le fata faitaulaga e soo ai.

¹⁴Na te avatua ai lana taulaga, o le taulaga e fai i le afi ia Ieova; o le ga‘o alo ma ga‘o uma o i ai,

¹⁵o fatuga‘o foi e lua, ma ga‘o o i ai, o loo i luga o lāgotua; a o le ga‘o punipū o loo i luga o le finagalo, ma fatu ga‘o, na te aveeseina ai.

¹⁶Ona susunuina ai lea e le faitaulaga i le fata faitaulaga; o le mea e ‘ai lea, o le taulaga e fai i le afi, o le mea manogi lelei lea; e ia Ieova ga‘o uma.

¹⁷O le tulafono e faavavau i a outou tupulaga amuli i mea uma tou te nonofo ai, aua tou te aai ni ga‘o po o le toto.