Read Samoan Old Version Bible – O LE TUSI PAIA LEVITIKO 6 Bible Online

LEVITIKO 6 - Samoan Old Version Bible – O LE TUSI PAIA bible

LEVITIKO 6

¹Ua etalai mai foi Ieova ia Mose, ua faapea mai,

²Afai e agasala se tasi, ma soli tulafono a Ieova, ma pelopelo atu i lē la te tuaoi i se mea sa tuuina atu ia te ia e tausi, po o se feagaiga, po o se mea ua faoa, po ua na faasaua i lē la te tuaoi,

³po ua maua se mea sa le iloa, ma faafiti ai, ua tauto pepelo ai; a faia e se tagata se isi mea o ia mea uma, ua agasala ai.

⁴Ua agasala ia ma ua nofo sala ai, o le mea lea na te toe avatu ai le mea na ia faoa, po o le mea na ia maua i le faasaua, po o le mea sa tuuina atu ia te ia e tausi, po o le mea sa le iloa na ia maua,

⁵po o mea uma na ia tauto pepelo ai, na te toe avane le mea atoatoa, ma faaopoopo i ai e tusa ma lona vaega e lima, ma avatu ia te ia e ana le mea, i lea lava aso e nofo sala ai o ia.

⁶Na te au mai ia Ieova lana taulaga mo le sese, o se mamoe poa mai le lafu mamoe e sao ona lelei, e tusa ma lou lava faatatau, e fai ma taulaga mo le sese i le faitaulaga.

⁷E faia foi e le faitaulaga se togiola mo ia i luma o Ieova, ona faamagaloina ai lea o ia i se mea o ia mea uma ua ia faia, sa nofo sala ai o ia.

⁸Ua fetalai mai foi Ieova ia Mose, ua faapea mai,

⁹Ina fai atu ia ia Arona ma ona atalii, ia faapea atu, O le tulafono lenei o le taulaga mu; o le taulaga mu lea e mu i le taigaafi i luga o le fata faitaulaga ia aoina lava, e mu ai foi le afi i le fata faitaulaga.

¹⁰E ofu foi le faitaulaga i lona ofu ie vavae, e ofu foi lona tino i lona ofuvae ie vavae, na te avae le lefulefu o le afi faatasi ma le lefulefu o le taulaga mu i le fata faitaulaga, na te tuuina atu foi i tafatafa o le fata faitaulaga.

¹¹Ona tuueseina ai lea ona ofu, ma ofu o ia i nisi ofu, ma ave i fafo le lefulefu i tua o le toagālauapi i se mea mamā.

¹²O le afi foi i luga o le fata faitaulaga e mu pea lava i ai; aua ne‘i mate lava ia; e faamu ai foi e le faitaulaga o fafie i lea taeao ma lea taeao, na te teu ai le taulaga mu, na te susunuina ai foi ga‘o o le taulaga faafetai.

¹³Ia mu pea lava le afi i luga o le fata faitaulaga; aua ne‘i mate lava ia.

¹⁴O le tulafono foi lenei o le taulaga i mea e ‘ai; e avatu lava, e atalii o Arona i luma o Ieova i luma o le fata faitaulaga.

¹⁵Na te avane ai foi lana luutaga o le falaoa lelei o le taulaga i mea e ‘ai, ma nisi ona suāuu, ma le pulu lipano uma ua i luga o le taulaga i mea e ‘ai, ua te susunuina ai foi i le fata faitaulaga, o le mea manogi lelei lea, o lona faamanatuga ia Ieova.

¹⁶O mea foi o totoe e aai ai Arona ma ona atalii; e aina lava ia ma areto e le faafefeteina i le mea paia; o le lotoā o le fale fetafai o le faapotopotoga latou te aai ai.

¹⁷Aua ne‘i tunu ai ma ni mea e faafefete a‘i. Ua ou avatu ai e fai mā latou i taulaga ia te au e fai i le afi; ua matuā paia lava ia, e pei o le taulaga mo le agasala, e pei o le taulaga foi mo le sese.

¹⁸O tane uma o le fanau a Arona latou te aai ai. O le tulafono lea e faavavau i o outou tupulaga amuli i taulaga ia Ieova e fai i le afi; e paia taitoatasi uma o e papai atu i ai.

¹⁹Ua fetalai mai foi Ieova ia Mose, ua faapea mai,

²⁰O le taulaga lenei a Arona ma ona atalii latou te avatua ia Ieova i le aso e faauuina ai o ia; o lona vaega e sefulu o le efa o le falaoa lelei, e fai ma taulaga i mea e ‘ai i aso faisoo, o lona vaeluaga i le taeao, ma lona vaeluaga i le afiafi.

²¹E te faia ia palua ma le uu i luga o le uamea salafa; e te au mai ai; o fāsi mea tutunu o le taulaga i mea e ‘ai e te avatu ai, o le mea manogi lelei lea ia Ieova.

²²O sona atalii ua faauuina e fai ma faitaulaga e sui a‘i o ia na te faia; o le tulafono lea e faavavau ia Ieova; e te susunuina uma.

²³Auā o taulaga uma i mea e ‘ai a le faitaulaga, e susunuina uma ai; aua ne‘i ‘aina.

²⁴Ua fetalai mai foi Ieova ia Mose, ua faapea mai,

²⁵Ina fai atu ia ia Arona ma ona atalii, ia faapea atu, O le tulafono lenei o le taulaga mo le agasala; o le mea ua fasi ai le taulaga mu e fasi ai foi le taulaga mo le agasala i luma o Ieova; e sili ona paia lea.

²⁶O le faitaulaga na te faia le taulaga mo le agasala, o ia lava na te ‘ai ai; e ‘ai ai i le mea paia i le lotoā o le fale fetafai o le faapotopotoga.

²⁷Ai se mea foi ua papai ane i ona tufaaga e paia lava lea; a sausauina atu ai foi nisi ona toto i se ofu, e te taia le mea sa sausauina ai i le mea paia.

²⁸A o le ipu omea sa tunu ai, ia taei lea; afai foi ua tunu i se ipu ‘apa memea, ia oloina lea, ma fufuluina i le vai.

²⁹O tane uma o le au faitaulaga latou te aai ai; e sili ona paia lea.

³⁰E le ‘aina lava se taulaga mo le agasala ua au mai nisi ona toto i le fale fetafai o le faapotopotoga e fai ma togiola i le mea paia; a e susunuina ia i le afi.