Read Samoan Old Version Bible – O LE TUSI PAIA LEVITIKO 8 Bible Online

LEVITIKO 8 - Samoan Old Version Bible – O LE TUSI PAIA bible

LEVITIKO 8

¹Ua fetalai mai foi Ieova ia Mose, ua faapea mai,

²Ina au mai ia o Arona ma ona atalii faatasi ma ia, o ofu foi, ma le uu e faauuina ai, ma se povi poa taanoa e fai ma taulaga mo le agasala, ma mamoe poa e lua ma se ato o areto e le faafefeteina.

³Ma ia e faapotopoto le faapotopotoga uma i le faitotoa o le fale fetafai o le faapotopotoga.

⁴Ua faia foi e Mose, e pei ona fetalai mai ai Ieova ia te ia, sa faapotopotoina le faapotopotoga i le faitotoa o le fale fetafai o le faapotopotoga.

⁵Ona fai atu ai lea o Mose i le faapotopotoga, O le mea lenei ua poloai mai ai Ieova ia faia.

⁶Ona au mai ai lea e Mose o Arona ma ona atalii, ma na faataele ia i latou i le vai.

⁷Ua na faaofu foi ia te ia i le ofu tino, ma fusi ia te ia i le fusi, ma faaofu ia te ia i le ofu talaloa, ma faaofu ia te ia i le efota, ma fusi ia te ia i le fusi faalanu eseese o le efota, ma na fusi ai ia te ia.

⁸Ua ia avane ai foi le ufifatafata, ma tuu i le ufifatafata le Urima ma le Tumema.

⁹Ua ia faaee ai foi le pulou i lona ulu; ua ia tuu ai le mea pupula ua faia i le auro i luga o le pulou ie i lona muaulu, o le pale paia lea; e pei ona poloai mai ai o Ieova ia Mose.

¹⁰Ona ave ai lea e Mose le uu e faauuina ai; ua na faauuina foi le malumalu ma mea uma ua i ai, ma na faapaiaina ai.

¹¹Ua ia sausau faafitu ai i luga o le fata faitaulaga, ma faauu ai le fata faitaulaga ma ana mea uma, o le tanoa e mulumulu ai foi ma lona tulaga e faapaiaina ai.

¹²Ua ia liligi foi le uu e uu a‘i i le ulu o Arona, ma faauuina o ia, e faapaiaina ai o ia.

¹³Ua au mai foi e Mose o atalii o Arona, ma faaofu ia i latou i ofu tino, ma na fusi ia i latou i fusi, ma na faamau i o latou pulou; e pei ona poloai mai ai o Ieova ia Mose.

¹⁴Ua ia au mai foi le povi poa taanoa e fai ma taulaga mo le agasala; ua faaee foi e Arona ma ona atalii o latou lima i le ulu o le povi poa taanoa e fai ma taulaga mo le agasala.

¹⁵Ua ia fasi ai, ona ave ai lea e Mose o le toto, ma na tuu ai i nifo o le fata faitaulaga ua soo ai i lona tamatamai lima, ma faamamaina ai le fata faitaulaga, ma na sasaa ifo le toto i lalo o le fata faitaulaga, ua ia faapaiaina ai foi, ina ia faia le togiola i ona luga.

¹⁶Ua ia avatu ai foi ga‘o alo uma, ma le ga‘o punipū i luga o le finagalo, ma fatuga‘o e lua, ma ga‘o o i ai, ona susunuina ai lea e Mose i le fata faitaulaga.

¹⁷A o le povi poa taanoa, ma lona pa‘u, ma lona tino, ma lona otaota, ua ia susunu ai i le afi i tua o le toagālauapi; e pei ona poloai mai ai o Ieova ia Mose.

¹⁸Ua ia au mai foi le mamoe poa e fai ma taulaga mu, ua faaee ai foi e Arona ma ona atalii o latou lima i luga o le ulu o le mamoe poa.

¹⁹Ua ia fasia foi, ona sausau lea e Mose le toto i luga o le fata faitaulaga ua soo ai.

²⁰Ua ia pena le mamoe poa i ona tufaaga; ua susunu foi e Mose le ulu, ma tufaaga, ma ga‘o.

²¹Ua ia mulumulu foi tōtōga ma vae i le vai; ua susunuina foi e Mose o le mamoe poa uma lava i le fata faitaulaga, o le taulaga mu lea, o le mea manogi lelei, o le taulaga e fai i le afi ia Ieova; e pei ona poloai mai ai o Ieova ia Mose.

²²Ua ia au mai foi lona lua o mamoe poa, o le mamoe poa o le tofiga, ua faaee foi e Arona ma ona atalii o latou lima i le ulu o le mamoe poa.

²³Ua ia fasia foi, ona ave ai lea e Mose nisi ona toto, ma tuu ai i le tumutumu o le taliga taumatau o Arona, ma le lima matua o lona lima taumatau, ma le vae matua o lona vae taumatau.

²⁴Ua ia au mai foi atalii o Arona; ua tuuina atu e Mose nisi o le toto i le tumutumu o latou taliga taumatau, ma lima matua o latou lima taumatau, ma vae matua o latou vae taumatau; ua sausau foi e Mose le toto i luga o le fata faitaulaga ua soo ai.

²⁵Ua ia ave foi ga‘o, ma le i‘u, ma le ga‘o alo uma, ma le ga‘o punipū i luga o le finagalo, ma fatuga‘o e lua, ma ga‘o o i ai, ma le ālagālima taumatau.

²⁶Ua ia ave le potoi areto e le faafefeteina e tasi, ma le potoi areto ua uuina e tasi, ma le faapāpā e tasi nai le ato areto e le faafefeteina ua i luma o Ieova, ma tuu ai i luga o ga‘o, ma luga o le ālagālima taumatau.

²⁷Ua ia faaee ia mea uma i alofilima o Arona ma alofilima o ona atalii, ma na luluina ai, e fai ma taulaga lulu i luma o Ieova.

²⁸Ona aveeseina ai lea e Mose nai o latou lima, ma susunu ai i le fata faitaulaga, i luga o le taulaga mu, o le taulaga o le tofi lea, o le mea manogi lelei, o le taulaga e fai i le afi ia Ieova.

²⁹Ua ave foi e Mose le fatafata, ma na luluina ai, o le taulaga lulu i luma o Ieova; o le tufaaga lea e fai mā Mose i le mamoe poa o le tofi; e pei ona poloai mai ai o Ieova ia Mose.

³⁰Ua ave foi e Mose nisi uu e faauu ai, ma nisi o le toto sa i luga o le fata faitaulaga, ma sausau ai i luga o Arona ma ona ofu, i luga foi o ona atalii ma o latou ofu faatasi ma ia; ua ia faapaiaina ai foi Arona ma ona ofu, o ona atalii foi ma o latou ofu faatasi ma ia.

³¹Ua fai atu foi Mose ia Arona ma ona atalii, Ina tunu ia tufaaga o le manu i le faitotoa o le fale fetafai o le faapotopotoga, ma outou aai ai i lea mea, atoa ma le areto o i le ato o le taulaga o le tofi; e pei ona ou poloai atu, ua faapea atu, E ‘aina lava ia e Arona ma ona atalii.

³²O mea foi e totoe i tufaaga ma areto, tou te sunua lea i le afi.

³³Tou te le ulufafo lava i le faitotoa o le fale fetafai o le faapotopotoga i ona po e fitu, seia atoa po o le tofia o outou; auā o po lava e fitu na te fai ai le tofia o outou.

³⁴E pei ona faia e ia i le aso nei, ua faapea lava ona poloai mai ai o Ieova ona fai, e fai se togiola mo outou.

³⁵Tou te nonofo ai i le faitotoa o le fale fetafai o le faapotopotoga i le ao ma le po i aso e fitu, ma tausiusi i le sauniga a Ieova ina ne‘i oti outou; auā ua faapea lava ona poloai mai ai ia te au.

³⁶Ona faia lava lea e Arona ma ona atalii mea uma lava na poloai mai ai Ieova ia Mose.