Read Samoan Old Version Bible – O LE TUSI PAIA IEREMIA, 10 Bible Online

IEREMIA, 10 - Samoan Old Version Bible – O LE TUSI PAIA bible

IEREMIA, 10

¹Ina faalogologo mai ia i le afioga ua fetalaia mai e Ieova ia te outou le aiga o Isaraelu;

²o loo faapea ona fetalai mai o Ieova, Aua ne‘i a‘oa‘o outou i tu a nuu ese, aua foi ne‘i matatau i faailoga i le lagi; auā ua matatau i ai nuu ese.

³Auā ua faatauvaa lava tu a nuu ese; auā ua ta e se tasi le laau i le vao, o le galuega a lima o le tufuga e fai i le mătau.

⁴Ua latou faamatagofieina i ario ma auro, ma latou faamauina ai i fao ma samala, ina ia le gaoioi.

⁵E pei o le pama ua togitogi faamamanuina ia mea; latou te le tautala foi; e tauave i latou, auā latou te le mafai ona savavali. Aua tou te fefefe ia te i latou; auā latou te le mafai ona agaleaga mai, e le mafai foi ona agalelei mai.

⁶E leai lava sē tusa ma oe, Ieova e; e sili lava oe, ma lou suafa e sili lea ona malosi.

⁷O ai ea se le mata‘u ia te oe, le Tupu o nuu e? Auā e ono lea ia te oe; auā e leai sē tusa ma oe i e popoto uma i nuu, ma o latou malo uma.

⁸A e peitai ua valelea i latou uma, o vale lava; o le ogālaau o ia lava le aoai atu i mea faatauvaa.

⁹Ua aumaia mai Tasesa le ario ua faasalafalafaina, ma le auro mai Upasa, o le galuega a le tufuga, o le galuega foi a lima o le tufuga fai mea uamea; o le ie uli ma le pāuli ua oofu ai; o galuega a e popoto ia mea uma lava.

¹⁰A o Ieova o le Atua moni ia, o ia lava le Atua soifua, ma le Tupu e faavavau; o lona toasa e gatete ai le lalolagi, e le lavā foi e nuu ona tali o lona toatamai.

¹¹Ia faapea ona outou fai atu ia te i latou, O atua na le faia le lagi ma le lalolagi, e fano i latou i le lalolagi ma lalo foi o lena lagi.

¹²Na faia e ia le lalolagi i lona mana, na faatumauina e ia le atu laulau i lona poto, na fofolaina foi e ia le lagi i lona faautauta.

¹³Ua tŭlei mai lona siufofoga, ona tele ai lea o le vai i le lagi; e avae foi e ia o le ausa mai tuluiga o le lalolagi; e faia e ia le uila atoa ma le ua, e aumaia foi e ia le matagi mai ana mea e teu ai oloa.

¹⁴Ua taitasi ma valea tagata uma e leai so latou poto; ua taitasi ma faamaina foi tufuga fai mea uamea ona o le tupua ua ta; auā o le mea pepelo lana tupua uamea, e leai foi se mānava ia te i latou.

¹⁵E faatauvaa ia mea, o le galuega e tauemua; e fano lava i latou i ona po e tauia ai i latou.

¹⁶E le pei o ia mea le tofi o Iakopo; auā o ia lava na faia mea uma; o Isaraelu foi o le tootoo lea o lona tofi; o Ieova o ‘au o lona suafa lea.

¹⁷Ina faapotopotoina ia o au mea mai le nuu, o oe na lē nofo i le ‘olo.

¹⁸Auā o loo faapea ona fetalai mai o Ieova, Faauta, o ona po nei lava, ou te sasau ai i le maata e o nonofo i le nuu, ma ou siosio ia te i latou ina ia maua i latou.

¹⁹Oi talofa ia te au i lo‘u manua; e matuā leaga lo‘u manua; o a‘u foi, na ou faapea ane, E moni, o le puapuaga lava lenei, a e ou te faatoatoa pea i ai.

²⁰Ua faatafunaina lo‘u fale ie, ua motusia a‘u maea uma, ua o ese la‘u fanau ia te au, o i latou foi ua leai; e leai foi se tasi na te toe toina lo‘u fale ie, ma avae o‘u ie puipui.

²¹Auā ua valelea le au leoleo mamoe, ma latou le saili ia Ieova; o le mea lea e le manuia ai i latou, e faataapeapeaina foi ia latou lafu mamoe uma.

²²O le logo o le tala, faauta, ua oo mai, o le vāvāō tele foi mai le nuu i le itu i matu, e faia foi aai o Iuta ma mea e faatafunaina, o le mea e fale ai luko.

²³Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.

²⁴Ieova e, ia e aoai mai ia te au, tau lava ina faia ma le faatatau; a e aua ma lou toasa, ina ne‘i e faatoaitiitia o a‘u.

²⁵Ia e sasaaina atu lou toasa i luga o atu nuu ua le iloa oe, i luga foi o aiga ua le valaau atu i lou suafa; auā ua latou ‘aina Iakopo, ua latou ‘aina lava o ia, ma ua faaumatia o ia, ma le mea sa nofo ai o ia ua latou faatafunaina.