Read Samoan Old Version Bible – O LE TUSI PAIA IEREMIA, 11 Bible Online

IEREMIA, 11 - Samoan Old Version Bible – O LE TUSI PAIA bible

IEREMIA, 11

¹O le afioga na oo mai ia Ieremia mai ia Ieova, ua faapea mai,

²Ina faalogologo mai ia outou i upu o lenei feagaiga, ma ia outou fai atu ai i tagata o Iuta, ma e o nonofo i Ierusalema;

³ma ia e fai atu ia te i latou, O loo faapea ona fetalai mai o Ieova le Atua o Isaraelu, Ia malaia le tagata o le na te le faalogo i upu o lenei feagaiga,

⁴na ou poloai atu ai i o outou tamā i le aso na ou au mai ai i latou mai le nuu o Aikupito, mai le ogāumu e tunu ai uamea, ua faapea atu, Ina faalogo mai ia i lo‘u leo, ma ia outou faia ia mea, e tusa ma mea uma ua ou poloai atu ai ia te outou; na fai ai lea o outou mo‘u nuu, e fai foi a‘u mo outou Atua;

⁵ina ia ou faataunuuina le tautoga, na ou tauto ai i o outou tamā, e foai atu ia te i latou le nuu ua tafe ai le suāsusu ma le meli, e pei ona fai i le aso nei. Ona ou tali atu ai lea, ua faapea atu, Ieova e, ina fai ia o lea.

⁶Ona fetalai mai ai lea o Ieova ia te au, Ina tala‘i atu ia nei upu uma i aai o Iuta, ma ala o Ierusalema, ia faapea atu, Ia outou faalogo i upu o lenei feagaiga, ma ia outou faia.

⁷Auā na ou matuā fai atu i o outou tamā i le aso na ou aveina ae ai i latou mai le nuu o Aikupito, ua oo lava i le aso nei, ua ou ala fai atu lava, ua faapea atu. Ina faalogo mai ia i lo‘u leo.

⁸A ua latou le faalogo mai, ua le uai mai foi o latou taliga, a ua latou taitasi ma savali e tusa ma le finau vale o latou loto leaga; o lea ua ou faaoo ai i luga ia te i latou o upu uma o lenei feagaiga na ou poloai atu ai ia latou faia; a ua latou le faia lava.

⁹Ona fetalai mai lea o Ieova ia te au, Ua iloa le fouvale i tagata o Iuta, ma e o nonofo i Ierusalema.

¹⁰Ua latou liliu atu i amio leaga a o latou tamā anamua, o e na le mafafai ona faalogo i a‘u upu; ma ua latou mulimuli atu i atua ese e auauna ia te i latou; ua solia e le aiga o Isaraelu ma le aiga o Iuta la‘u feagaiga na a‘u osia ma o latou tamā.

¹¹O le mea lea, o loo faapea ona fetalai mai ai o Ieova, Faauta, ou te faaoo le malaia ia te i latou, latou te le mafaia ona sao ai; e ui lava ina latou alalaga mai ia te au, ou te le faalogo lava ia te i latou.

¹²Ona o ai lea o aai o Iuta ma e o nonofo i Ierusalema, ma latou alalaga i atua na latou faamu i ai mea manogi; a e latou te le faaola lava ia te i latou i ona po o lo latou malaia.

¹³Auā Iuta e, o le tau aofai o ou aai o le tau aofai lea o ou atua; ua outou faatuina foi fata faitaulaga mo le mea e masiasi ai, o fata faitaulaga lava e faamu ai mea manogi ia Paala, e faatatau i le tau aofai o ala i Ierusalema.

¹⁴O oe na foi, aua e te faatoga mai mo lenei nuu, aua foi e te faia se auega, po o se faatoga mo i latou; auā ou te le faalogo ia te i latou i ona po latou te valaau mai ai ia te au ona o lo latou malaia.

¹⁵O a mea e fai e la‘u pele i lo‘u fale, a o faia e ia amio leaga e tele? ua mavae foi le tufaaga paia ia te oe; a ē fai mea leaga, ona e fiafia ai lea.

¹⁶Na faaigoa oe e Ieova, O le olive lauolaola, e matagofie, e lalelei ona fua; o le taalili tele lava ua faamuina ai ona lau i le afi, ua gauia ona la.

¹⁷Auā o Ieova o ‘au, o le na totōina oe, ua fetalai mai e ia le malaia o le a oo ia te oe, ona o le amio leaga a le aiga o Isaraelu ma le aiga o Iuta, na latou faia ia te i latou lava e faaonoono ia te au i lo latou faamu mea manogi ia Paala.

¹⁸Ua faailoa mai e Ieova ia te au ina ia ou iloa; ona e faaalia mai ai lea ia te au o a latou amioga.

¹⁹A o a‘u, ua pei o se tamai mamoe lata ua ta‘ita‘iina ia fasia; na ou le iloa foi ua mafaufau e i latou i ni togafiti e leaga ai a‘u, ua faapea, Se‘i tatou faaumatia le laau ma ona fua, ma tatou vavaeeseina o ia ai le nuu o tagata ola, ina ia le toe manatua lava lona igoa.

²⁰A o oe, Ieova o ‘au, o le faamasino amiotonu, o le tofotofo i le manatu ma le loto, e iloa e a‘u lau taui ma sui ia te i latou; auā ua ou faaalia la‘u finauga ia te oe.

²¹O le mea lea, o loo faapea ona fetalai mai ai o Ieova i tagata o Anatota, o e sailiili e fasioti ia te oe, ua faapea, Aua e te vavalo mai i le suafa o Ieova, ina ne‘i oti oe i o matou lima.

²²O le mea lea o loo faapea ona fetalai mai ai o Ieova o ‘au, Faauta, ou te taui atu ia te i latou; e oti taulelea i le pelu; e oti foi o latou atalii ma o latou afafine i le oge.

²³E leai ni o latou e totoe; auā ou te faaoo le malaia i tagata o Anatota, o le tausaga lava e tauia ai i latou.