Read Samoan Old Version Bible – O LE TUSI PAIA IEREMIA, 13 Bible Online

IEREMIA, 13 - Samoan Old Version Bible – O LE TUSI PAIA bible

IEREMIA, 13

¹Ua faapea ona fetalai mai o Ieova ia te au, Alu ia, ia e fai mo oe le fusi lino, ma fusi a‘i lou sulugatiti, aua foi e te tuu i le vai.

²Ona ou maua lea o le fusi e tusa ma le afioga a Ieova, ma ou fusi a‘i lo‘u sulugatiti.

³Ona foi faalua mai ai lea o le afioga a Ieova ia te au, ua faapea mai,

⁴Ia e ave le fusi ua e maua o i ai i lou sulugatiti, ma e tulai, ma alu i Eufirate, ma nanā ai i lea mea i se mea māvae o le papa.

⁵Ona ou alu ai lea, ma nanā ai i Eufirate, e pei ona fetalai mai ai o Ieova ia te au.

⁶Ua mavae aso e tele, ona faapea mai ai lea o Ieova ia te au, Ina tulai ia, alu i Eufirate, ma au mai ai le fusi na ou fai atu ai ia te oe e nanā i lea mea.

⁷Ona a‘u alu ai lea i Eufirate, ma a‘u eli, ma avae nai lea mea le fusi na ou nanā ai; faauta foi, ua leaga le fusi, ua le aoga i se mea e tasi.

⁸Ona tulei mai lea o le afioga a Ieova ia te au, ua faapea mai.

⁹Ua faapea ona fetalai mai o Ieova, E faapena ona ou faaleagaina le faamaualuga o Iuta, ma le faamaualuga tele o Ierusalema.

¹⁰O lenei nuu amio leaga, ua le mafafai i latou ona faalogo mai i a‘u upu, ua savavali ma le loto finau vale, ma mulimuli atu i atua ese, e auauna ma ifo ia te i latou, e avea lava i latou e pei o lenei fusi, e le aoga i se mea e tasi.

¹¹Auā e pei ona pipii le fusi i le sulugatiti o le tagata, sa faapea ona a‘u faapipii ia te au o le aiga uma o Isaraelu, ma le aiga uma o Iuta, o loo fetalai mai ai Ieova; ina ia fai i latou mo‘u nuu, ia fai foi ma igoa, ma viiga, ma matagofie; a ua latou le faalogo mai.

¹²O le upu foi lenei e te fai atu ai ia te i latou, O loo faapea ona fetalai mai o Ieova le Atua o Isaraelu, E faatutumuina fagu uma i le uaina; latou te fai mai foi ia te oe, E le ua matou matuā iloa ea e faatutumuina fagu uma i le uaina?

¹³Ona e fai atu lea ia te i latou, o loo faapea ona fetalai mai o Ieova, Faauta, ou te faatutumuina i le onaga o i latou uma o e nonofo i lenei nuu, o tupu o e nonofo i le nofoālii o Tavita, atoa ma faitaulaga, ma perofeta, ma i latou uma o e nonofo i Ierusalema.

¹⁴Ou te faafeto‘ai i latou, o le tasi i le tasi, o tamā foi atoa ma fanau, o loo fetalai mai ai Ieova; ou te le faapelepele ia te i latou, pe faasaoina, pe alofa atu, a e faaumatia i latou.

¹⁵Ia outou faalogologo mai, ma uai mai o outou taliga; aua tou te faamaualuga, auā ua fetalai mai Ieova.

¹⁶Ia avatu le viiga ia Ieova lo outou Atua, manū o lei faapouliuligia e ia, manū o lei tausuai o outou vae i luga o mauga pouliuli, ma outou faatalitali i le malamalama, a ua liua lea e ia ma ata o le oti, ua fai ma pogisa tele.

¹⁷A e afai tou te le faalogo mai, ona tagi ai lea o lo‘u loto i mea lilo ona o lo outou faamaualuga, ma ou matuā tagi lava, e tafe ifo liomata i o‘u mata, auā ua tāfea le lafu mamoe a Ieova.

¹⁸Ia fai atu i le tupu ma le sa‘o tamaitai, Ia oulua faamaulalo, ia nofo i lalo auā e pauu ifo o oulua palealii matagofie i o oulua ao.

¹⁹Ua punitia aai o i le itu i toga, e le tatalaina e se tasi; ua tāfea Iuta uma, ua tāfea atoa uma lava.

²⁰Ia e tepa ae, ma vaavaai atu i e ua o mai mai le itu i matu, Po o ifea le lafu mamoe na avatu ia te oe, o au mamoe matagofie?

²¹Pe se a ea lau na e te fai atu ai pe a tauia oe e ia? Auā na e a‘oa‘o atu ia te i latou e fai ma alii sili e pule ia te oe. E le maua ea oe e le tiga e pei o le fafine a fanau?

²²Afai foi e te fai ifo i lou loto, Pe se a le mea ua oo mai ai ia te au ia mea? O le tele o lau agasala ua susueina ae ai ou pito ofu, ma faasaunoa ai i ou mulivae.

²³E mafai ea ona liua e le Aitiope o lona pa‘u, pe liua e le nameri ona ila? A mafai lea, ona mafai foi lea ona amio lelei o outou ua masani i amio leaga.

²⁴Ou te faataapeape ia te i latou e pei o aputi o saito ua lelea i le matagi mai le vao.

²⁵O lou tofi lenei, o le tofi mai ia te au ua fuatia mo oe, o loo fetalai mai ai Ieova; auā ua e faagalogalo ia te au, a ua e faatuatua i le mea pepelo.

²⁶O a‘u lava, ou te susueina ae ou pito ofu i luga i ou mata, ina ia iloa ai lou mā.

²⁷Ua ou iloa au muliluaga, ma au tagi faasolofanua, ma le leaga o lou talitane, ma au mea faasoesa i luga o mauga i le vao. Ierusalema e, talofa ia te oe; e le faamamāina ea oe seia afea?