Read Samoan Old Version Bible – O LE TUSI PAIA IEREMIA, 14 Bible Online

IEREMIA, 14 - Samoan Old Version Bible – O LE TUSI PAIA bible

IEREMIA, 14

¹O le afioga a Ieova na oo mai ia Ieremia ona o le la mala.

²Ua faanoanoa Iuta, ma ua faavaivai ona faitotoa; ua faavauvau i latou ua punou i le eleele, ma ua alu ae le alaga o Ierusalema.

³Ua aauina atu e o latou alii o latou tagata i le vai; ua latou o atu i vaieli, ua le maua ni vai; ua latou toe foi mai ma a latou ipu e le iio; ua mamā i latou ma masiasi, ua latou ufiufi foi i o latou ulu.

⁴Ua mamā i latou o e gālue fanua, ua ufiufi i o latou ulu ona o le laueleele ua mavaevae, auā ua leai se ua i le nuu.

⁵O le aila lava ua fanau ia i le vao, ma ua tuua lana tama, auā ua leai se vao mua.

⁶O asini foi o le vao ua tutū i mauga tula, na latou sogisogi i le matagi e pei o luko; ua avea o latou mata, auā e leai ni vao iti.

⁷Ieova e, e ui lava ina ua molimau a matou agasala ia te i matou, ia e faia lava ona o lou suafa; auā ua tele lo matou liliu ese; ua matou agasala ia te oe.

⁸Le faamoemoega o Isaraelu e, o lē faaola ia te ia i ona po o le puapuaga, se a le mea ua avea ai oe e pei o le tagata ese i le nuu, e pei o le tagata alu malaga foi ua afe ane e moe i le po?

⁹Se a le mea ua avea ai oe e pei o le tagata ua segia lona mauli, e pei o le toa e le mafaia ona faaola? a o oe, Ieova e, ua e ia te i matou lava, ua ta‘ua i matou i lou suafa; aua e te tuua i matou.

¹⁰O loo faapea ona fetalai mai o Ieova i lenei nuu, Ua fia feoai naua i latou, ua latou le taofia o latou vae, o le mea lea e le fiafia ai Ieova ia te i latou; e manatua nei e ia o a latou amio leaga, ma tauia a latou agasala.

¹¹Ona faapea mai ai lea o Ieova ia te au, Aua le tatalo mo lenei nuu ina ia lelei ai i latou.

¹²E ui ina latou anapopogi, ou te le faalogo i lo latou alaga; e ui ina latou osia taulaga mu ma taulaga i mea e ‘ai, ou te le talia; a ou te faaumatia i latou i le pelu, ma le oge, ma le faamai.

¹³Ona ou faapea atu ai lea, Aue! le Alii e Ieova, faauta, ua fai mai perofeta ia te i latou, Tou te le iloa e pelu, e le oo foi le oge ia te outou, a ou te tuuina atu ia te outou le manuia faamaoni i lenei mea.

¹⁴Ona fetalai mai lea o Ieova ia te au, O loo vavalo mai perofeta i mea pepelo i lo‘u igoa; ua ou le aauina atu i latou, ma ou le poloai atu ia te i latou, ma a‘u le tautala atu ia te i latou; ua latou vavalo ia te outou le faaaliga pepelo, ma le faataulāitu, ma le mea faatauvaa, ma le pepelo o latou loto.

¹⁵O le mea lea o loo faapea ona fetalai mai ai o Ieova i perofeta ua vavalo i lo‘u igoa, a o a‘u ua ou le aauina atu i latou; a ua latou fai ane, E le oo mai le pelu ma le oge i lenei nuu; o le pelu ma le oge e faaumatia ai ia lava perofeta.

¹⁶A o le nuu ua latou vavalo i ai, e lafoaiina i latou i ala o Ierusalema ona o le oge ma le pelu; e leai se na te tanua i latou, o i latou, atoa ma a latou avā, ma o latou atalii, ma o latou afafine; ou te sasaaina atu foi a latou amio leaga i luga ia te i latou.

¹⁷O le upu nei e te fai atu ai ia te i latou, Ia tafe ifo loimata i o‘u mata i le po atoa ma le ao, aua le mapu; auā ua tu‘imomoia le tama teine taupou a lo‘u nuu i le tu‘imomomo e tele, o le manua e matuā leaga lava.

¹⁸Afai ou te alu atu i le vao, faauta foi, o e ua fāsia i le pelu; a e afai ou te alu i le aai, faauta foi, o e ua vaivai i le oge; auā o perofeta atoa ma faitaulaga, ua latou feoai i le nuu ua latou le iloa.

¹⁹Ua e matuā lafoaiina ea Iuta? Ua inosia ea Siona i lou finagalo? Se a le mea ua e sasaina ai i matou, ua leai foi se togafiti e malolo ai i matou? Na matou faatalitali i le manuia, a e leai se lelei na maua; na faatalitali foi i ona po e faamaloloina ai, faauta foi, o le mata‘u.

²⁰Ieova e, ua matou iloa la matou amio leaga, ma le amioletonu a o matou tamā; auā ua matou agasala ia te oe.

²¹Aua e te ‘ino‘ino mai ia te i matou, auā o lou suafa; aua e te faainosia le nofoālii o lou mamalu; ia e manatua, aua le tatalaina la tatou feagaiga ma oe.

²²Pe ai se tasi o mea faatauvaa o i nuu ese e mafaia ona faatotōina ifo o le ua? pe mafaia ea e le lagi ona tuuina mai o timuga? E le o oe ea lea, Ieova e, lo matou Atua? O le mea lea matou te faatalitali ai ia te oe; auā o oe lava ua e faia ia mea uma.