Read Samoan Old Version Bible – O LE TUSI PAIA IEREMIA, 16 Bible Online

IEREMIA, 16 - Samoan Old Version Bible – O LE TUSI PAIA bible

IEREMIA, 16

¹Na oo mai le afioga a Ieova ia te au, ua faapea mai,

²Aua e te fai avā, aua ne‘i i ai foi ia te oe o atalii po o afafine i lenei mea.

³Auā ua faapea ona fetalai mai o Ieova i atalii ma afafine ua fananau i lenei mea, ma o latou tinā o e na fananau mai ai i latou, ma o latou tamā ua fanaua i latou i lenei nuu;

⁴e oti i latou i ma‘i e oti ai; e leai ni e taufaitagitu‘i ia te i latou; e le tanumia foi i latou; e avea i latou ma otaota i luga o le laueleele; e faaumatia i latou i le pelu, ma le oge, e fai foi o latou tino ua oti ma mea e ‘ai mā manu felelei ma manu e tataa.

⁵Auā ua faapea ona fetalai mai o Ieova, Aua e te ulufale i le fale o i ai le auega, aua foi e te alu e tagitu‘i ai, aua foi e te faanoanoa ia te i latou; auā ua ou aveeseina lo‘u manuia i lenei nuu, o le alofa lava, ma le alofa mutimutivale, o loo fetalai mai ai Ieova.

⁶E oti alii atoa ma tagata nuu i lenei nuu; e le tanumia i latou, e le taufaitagitu‘i nisi ona o i latou, e le selei foi o latou tino, e le sele mamā foi o latou ulu ona o i latou;

⁷e le tofitofia mea e ‘ai o le faanoanoa ona o i latou e fai ma faamafanafana ia te i latou ona o le ua oti; latou te le avatu ia te i latou le ipu o le faamafanafanaga latou te inu ai ona o latou tamā, po o latou tinā.

⁸E te le ulufale foi i le fale e fai ai le tausamiga, e le nonofo ma i latou e ‘ai ai ma inu ai.

⁹Auā ua faapea ona fetalai mai o Ieova o ‘au, le Atua o Isaraelu, Faauta, ou te faaiuina le leo fiafia, ma le leo olioli, o le leo o le faatoafaiavā, ma le leo o le faatoanofotane ai lenei mea i o outou luma, a o ola mai outou.

¹⁰A uma ona ē faaali atu i lenei nuu ia upu uma, ua latou fai mai ia te oe, Se a le mea ua fai mai ai Ieova ia te i matou lenei malaia uma e tele? pe se a ea sa matou amioletonu? pe se a foi sa matou agasala ua matou agasala atu ai ia Ieova lo matou Atua?

¹¹Ona e faapea atu ai lea ia te i latou, Auā ua lafoaiina a‘u e o outou tamā, o loo fai mai ai Ieova, a ua latou mulimuli atu i atua ese, ma auauna i ai, ma ifo atu ia te i latou, a ua lafoaiina a‘u, ma ua le anaana i latou i la‘u tulafono.

¹²A o outou, ua faia e outou amio leaga e sili i o outou tamā; faauta foi, ua taitasi le tagata ma savali i le finau vale o lona loto leaga, ua le faalogo mai ia te au.

¹³O lea ou te tutuli ai ia te outou ai lenei nuu i le nuu ua outou le iloa; o outou po o outou tamā; tou te auauna foi i lea mea i atua ese i le ao ma le po; auā ou te le alofa ia te outou.

¹⁴A e ui i lea faauta, e oo mai ai ona po, o loo fetalai mai ai Ieova, e le toe fai ane ai tagata, O loo soifua Ieova, o le na aveina ae le fanauga a Isaraelu nai le nuu o Aikupito;

¹⁵a e faapea, O loo soifua Ieova, o le na aveina ae le fanauga a Isaraelu nai le nuu i le itu i matu, ma nuu uma na ia tulia ai i latou; auā ou te faafoisia mai i latou i lo latou laueleele, na a‘u foaiina atu ai i o latou tamā.

¹⁶Faauta, ou te aauina atu tagata fai faiva e toatele, o loo fetalai mai ai Ieova, latou te fai faiva ia te i latou; e mulimuli ane ou te aauina atu tagata tuli manu e toatele, latou te tutuli ia te i latou mai atu mauga uma, ma mauga uma, ma mavaevae o papa.

¹⁷Auā ua ou vaai i o latou ala uma; e le lilo i latou i o‘u luma, e le natia foi la latou amioletonu ia te au.

¹⁸A e muamua ona ou taui faaluaina atu la latou amioletonu, ma la latou agasala; auā ua latou faaleagaina lo‘u nuu, ua latou faatumuina lo‘u tofi i tino o a latou mea leaga, ma a latou mea e inosia.

¹⁹Ieova e, o lo‘u malosi ma lo‘u ‘olo, o lo‘u malu foi i le aso o le puapuaga, e o mai ia te oe nuu mai tuluiga o le lalolagi, ma latou fai mai, E moni, ua fai ma tofi o matou tamā mea pepelo, ma mea faatauvaa, ma mea e le o i ai se aoga.

²⁰E faia ea e le tagata o atua mo ia, a e le ni atua i latou?

²¹O le mea lea, faauta, ou te faailoa atu ai ia te i latou, e atu tasi lava, ou te faailoa atu ia te i latou lo‘u lima ma lo‘u malosi; latou te iloa ai o Ieova o lo‘u igoa lea.