Read Samoan Old Version Bible – O LE TUSI PAIA IEREMIA, 19 Bible Online

IEREMIA, 19 - Samoan Old Version Bible – O LE TUSI PAIA bible

IEREMIA, 19

¹Ua faapea ona fetalai mai o Ieova, Alu ia, ia e saili se fagu omea a le fai ipu omea, tou te o foi ma nisi toeaina o le nuu, ma nisi toeaina o le au faitaulaga;

²ma ia alu atu i le vanu o le atalii o Hinoma, i le mea e ui ai i le faitotoa o le fai ipu omea, ma ia e tala‘i atu i lea mea o upu ou te fai atu ai ia te oe.

³Ia e faapea atu, O outou tupu o Iuta, ma e o nonofo i Ierusalema, ia outou faalogologo mai i le afioga a Ieova; o loo faapea ona fetalai mai o Ieova o ‘au, le Atua o Isaraelu, Faauta, ou te faaoo mai le malaia i lenei mea, e taitasi uma o e faalogologo ai ma taalili ai ona taliga.

⁴Aua ua latou tuua a‘u, ua latou liua foi lenei mea, ma ua latou faamu ai mea manogi i atua ese na latou le iloa, o i latou, po o latou tamā, po o tupu o Iuta; ma ua latou faatumuina lenei mea i le toto o e le sala.

⁵Ua faia e i latou o mea maualuluga a Paala e susunu ai a latou fanau i le afi e fai ma taulaga mu ia Paala; o le mea na ou le poloai atu ai, pe fai atu ai, ou te lei manatu foi i ai.

⁶O le mea lea faauta, o le a oo mai ai ona po, o loo fetalai mai ai Ieova, e le toe igoa ai lea mea o Tofeta, po o le vanu o le atalii o Hinoma, a o le vanu o le fasi.

⁷Ou te faaleaogaina le pule a Iuta ma Ierusalema i lenei mea; ou te tuuina foi i latou ia fāsia i le pelu i luma o e ita ia i latou, ma lima o e sailiili ia i latou ia oti; ou te tuuina atu foi o latou tino ua oti e fai ma mea e ‘ai a manu felelei ma manu e tataa.

⁸Ou te fai foi lenei aai ma faatafunaga, ma mea e uisa ai; o i latou uma e ui ane ai e taitasi ma ofo ma uisa i ona mala uma.

⁹Ou te fagaina i latou i tino o latou atalii ma tino o latou afafine, e taitasi foi o i latou ma ‘ai i le tino o le tasi ina ua siosioina, ma tigaina e faatigateleina ai i latou e i latou ua ita mai, ma e ua saili ia i latou ia oti.

¹⁰Ona e nutililii ai lea o le fagu i luma o tagata latou te o ma oe,

¹¹ma e fai atu ia te i latou, O loo faapea ona fetalai mai o Ieova o ‘au, E faapea lava ona ou nutililii i lenei nuu ma lenei aai, e pei ona nutililii e se tasi le ipu a le fai ipu omea, e le mafai ona toe faia; e tanumia foi i latou i Tofeta seia le toe ai se mea e tanu ai.

¹²E faapea ona ou faia i lenei nuu, ma e o nonofo ai, o loo fetalai mai ai Ieova, ma ou faia lenei aai ia pei o Tofeta;

¹³e avea foi fale o Ierusalema, ma maota o tupu o Iuta, e pei o le mea e ta‘ua o Tofeta, ua leaga ia auā ua latou faamu mea manogi i luga o latou fale uma i ‘au uma o le lagi, ma ua latou liligi atu taulaga i mea e inu i atua ese.

¹⁴Ona sau ai lea o Ieremia mai Tofeta na auina atu ai o ia e Ieova e vavalo ai; na tu o ia i le lotoā o le fale o Ieova, ma ua fai atu i le nuu uma.

¹⁵Ua faapea ona fetalai mai o Ieova o ‘au, le Atua o Isaraelu, Faauta, ou te faaoo mai i lenei aai, ma ona faoa aai uma le malaia uma na ou fai atu ai; auā ua latou faamaaa o latou ua, ina ia latou le faalogologo ai i a‘u upu.