Read Samoan Old Version Bible – O LE TUSI PAIA IEREMIA, 2 Bible Online

IEREMIA, 2 - Samoan Old Version Bible – O LE TUSI PAIA bible

IEREMIA, 2

¹Na oo mai foi le afioga a Ieova ia te au, ua faapea mai,

²Ina alu ia oe, ma e valaau atu i Ierusalema, ia faapea atu i ai, O loo faapea ona fetalai mai o Ieova, Ou te manatua oe, o lou agalelei mai ina o e teine muli, ma lou alofa i ona po sa e faufautane ai, ma lou mulimuli mai ia te au i le vao, o le nuu e le totōina ai ni mea.

³O Isaraelu sa paia o ia mo Ieova, o le faapolopolo o ia o ana mea e tutupu. E agasala i latou uma o e aai ai, e oo lava ia te i latou le leaga, ua fetalai mai ai Ieova.

⁴Le aiga o Iakopo e, ma itu aiga uma o le aiga o Isaraelu, ina faalogologo mai ia outou i le afioga a Ieova.

⁵O loo faapea ona fetalai mai o Ieova, Se a ea se amioletonu na iloa ia te au e o outou tamā, ina ua latou ō mamao ia te au, ma ua latou mulimuli atu i mea faatauvaa, ma ua amio faatauvaa i latou?

⁶Ua le fai ane foi i latou, Po o fea o i ai Ieova, o le na aveina ae i tatou nai le nuu o Aikupito, ma na ta‘ita‘i ia te i tatou i le vao, o le nuu naumati e tele ai lua, o le nuu e lailoa ai tagata, ua i ai foi le ata o le oti, o le nuu foi e le uia e tagata, e leai foi se tagata e mau ai?

⁷Na a‘u faaooina mai foi outou i le fanua lafulemu, ina ia outou aai ai i ona fua ma ana mea lelei; ua outou o mai foi i lo‘u nuu, ona leaga ai lea ia te outou, ma outou faia lo‘u tofi ma mea e inosia.

⁸E lei fai ane faitaulaga, Po o fea o i ai Ieova? e lei iloa foi a‘u e i latou o e a‘oa‘o i le tulafono; o le au leoleo mamoe ua latou foua a‘u, o perofeta foi ua latou vavalo i le igoa o Paala, ma latou mulimuli atu i mea e le aoga.

⁹O le mea lea ou te toe finau ai lava ma outou, ua fetalai mai ai Ieova, ou te finau ma le fanau a outou fanau.

¹⁰Auā ia o atu outou i nuu tu matafaga o Kitimo, ma vaavaai i ai; ma ia outou aauina atu nisi i Kitara, ma ia outou matuā mafaufau, ma vaavaai pe ai se mea e pei o lenei mea.

¹¹Po ua suia ea e se nuu o latou atua, a e le ni atua ia mea? A o lo‘u nuu ua suia lo latou mamalu i le mea e le aoga.

¹²Le lagi e, ina ofo ia i lenei mea, ia gatete lava, ma ia matuā fememeai, ua fetalai mai ai Ieova.

¹³Auā e lua mea leaga ua faia e lo‘u nuu; ua latou tuua a‘u le puna o le vai ola, a ua latou eli mo i latou o vaieli, o vaieli māvaevae e le tali ai ni vai.

¹⁴O le pologa ea Isaraelu? Na fanau ea o ia i le aiga? Se a le mea ua avea ai o ia ma tagata o taua?

¹⁵Ua fetagisi atu ia te ia o leona taanoa, ua leo tetele i latou, ma ua latou faatafunaina lona nuu; ua susunuina foi ona aai, ua leai se nofo ai.

¹⁶O le fanau a Nafi ma Tapenesa, o i latou lava latou te ‘aina lou tumuai.

¹⁷Ua e le faia ea lenei mea ia te oe lava, ina ua e tuua Ieova lou Atua i ona po na ta‘ita‘iina ai oe e ia i le ala?

¹⁸O lenei, se a ea sau mea e fai i le ala o Aikupito, e te inu ai i le vai i Seora? se a foi sau mea e fai i le ala o Asuria, e te inu ai i le vai o le vaitafe?

¹⁹E aoai ia te oe lau lava amio leaga, e faasala foi ia te oe ou liliu ese; o lenei, ia e iloa, ma ia e manatu, auā o le mea leaga ma le oona ina ua e tuua Ieova lou Atua, ma ua e le mata‘u ia te au, ua fetalai mai ai le Alii o Ieova o ‘au.

²⁰Auā talu anamua na ou gauia lau amo, ma ou motusia ou noanoaga; ona e fai mai ai lea, Ou te le auauna atu; i le ua e taoto i luga o mauga maualuluga uma, ma lalo o laau lauolaola uma, ua e mulilua ai.

²¹O a‘u foi na ou totōina oe o le vine Soreka, o le fua e matuā moni lava; ua faapefea foi ona liua o oe ia te au ma lālā leaga o le vine ese?

²²Auā e ui lava ina e fufulu ia te oe i le neteri, ma e avane ai le moli e tele, ua tusia lau agasala i o‘u luma, ua fetalai mai ai le Alii o Ieova.

²³Pe faapefea ona e fai mai, Ou te lei leaga, ou te lei mulimuli atu ia Paala? Ina vaavaai atu ia i lou ala i le vanu, ia iloa le mea na e faia; o le kamela fafine muli e tele vave ua femo‘eai i ona ala,

²⁴o le asini o le vao ua masani ma le vao, o le manao o lona loto ua ia sogisogi ai le matagi; o ai se na te mafaia ona faafoi ia te ia ai lona manao? E le tigaina so latou o e sailiili ia te ia, latou te maua o ia i lona masina.

²⁵Taofi ia ou vae ne‘i le faaseevaeina, ma lou gutu ne‘i fiainu; a ua e fai mai, E le aoga; e leai lava, auā ua ou loto i tane ese, ou te mulimuli foi ia te i latou.

²⁶E pei ona mā o le gaoi ina ua maua o ia, e faapea ona faamaina o le aiga o Isaraelu, o i latou, ma o latou tupu, ma o latou alii, ma o latou ositaulaga, ma o latou perofeta,

²⁷o e fai atu i le laau, O lo‘u tamā oe; ma le maa, Ua e fanaua mai a‘u; auā ua latou u mai ia te au o latou tua, a e le o latou mata; a o ona po o lo latou malaia e fai mai ai i latou, Ia e tulai mai, ma faaola ia te i matou.

²⁸A o ifea ea ou atua na e faia mo oe? Ina tulai ia o i latou, pe a mafaia e i latou ona faaola ia te oe i ona po o lou malaia; auā, Iuta e, o le tau aofai o ou aai o le tau aofai lea o ou atua.

²⁹Se a le mea tou te finau mai ai ia te au? Ua fouvale outou uma ia te au, ua fetalai mai ai Ieova.

³⁰Na ou sasaina a outou fanau, a e le aoga; e lei talia e i latou le aoaiga; ua faaumatia o outou perofeta i la outou lava pelu, e pei o le leona na te faaumatia.

³¹Le tupulaga e, ina mafaufau ia outou i le afioga a Ieova. Ua avea ea a‘u ma vao ia Isaraelu? po o se nuu pogisa? Se a foi le mea ua fai mai ai lo‘u nuu. Ua sa‘oloto i matou, matou te le toe o atu ia te oe?

³²Pe mafai ea e le taupou ona galo o ana teuga? pe galo ea i le faatoanofotane o ona fusi? A o lo‘u nuu e le masino aso ua galo ai a‘u ia te i latou.

³³Se a le mea ua e sauniuni ai lau amio e sailiili ina ia manaomia ai oe? O le a foi ua e a‘oa‘o atu ai ou ala i fafine amio leaga.

³⁴Ua iloa i ou lava pito ofu le toto o le ola o e matitiva e le sala; e le o le matuā saili na ou iloa ai, a ua i ai i ia mea uma.

³⁵A ua e fai mai, E moni, e liliueseina lona toasa ia te au, auā ou te lei agasala. Faauta, ou te faamasino ia te oe, ina ua e faapea, Ou te lei sala.

³⁶Se a le mea e te fealuai soo ai e liliu ai lou ala? E masiasi foi oe ona o Aikupito, e pei ona e masiasi ona o Asuria.

³⁷E te alu atu foi nai lea mea, ma ou lima i luga o lou ulu; auā ua faaleaogaina e Ieova o ou faatuatuaga, e te le manuia ai lava.