Read Samoan Old Version Bible – O LE TUSI PAIA IEREMIA, 20 Bible Online

IEREMIA, 20 - Samoan Old Version Bible – O LE TUSI PAIA bible

IEREMIA, 20

¹Ua faalogologo Pasura, le atalii o Imere, le faitaulaga, o le matai sili ia i le fale o Ieova, ua vavalo Ieremia i ia upu.

²Ona taia lea o le perofeta o Ieremia e Pasura, ma ua tuuina o ia i laau faamau, sa i le faitotoa aupitoaluga o Peniamina, e lata ane i le fale o Ieova.

³Ua oo i le taeao, ona aumaia lea e Pasura o Ieremia nai laau faamau. Ona fai atu lea o Ieremia ia te ia, Ua le ta‘ua lou igoa e Ieova o Pasura, a o Makoru-misapipa.

⁴Auā o loo faapea ona fetalai mai o Ieova, Faauta, ou te faia oe ma mata‘u ia te oe, ma au uo uma; e oti i latou i le pelu a ē ita mai ia te i latou, e iloa foi e ou mata; ou te tuuina atu foi Iuta uma i le lima o le tupu o Papelonia, e tāfea foi i latou e ia i Papelonia, ma fasia i latou i le pelu.

⁵Ou te tuuina atu foi le oloa uma o lenei aai, ma mea uma o i ai sa tautigaina ai, ma oloa tāua uma o i ai, ma oa uma a tupu o Iuta ou te tuuina atu lava i lima o e ita mai ia te i latou, latou te vetea, ma avea, ma la‘u atu ai i Papelonia.

⁶A o oe, Pasura e, ma lou ‘au aiga uma, e ō outou i le tafeaga; e oo foi oe i Papelonia, e te oti ai lava, e tanumia foi oe i lea mea, o oe ma au uo uma, o i latou na e vavalo i ai mea pepelo.

⁷Ieova e, ua e faaoleole ia te au, ona faaoleoleina lea o a‘u; ua sili ona e malosi ia te au, ma ua e manumalo; ua fai a‘u ma mea e tapisa ai i aso uma, ua tauemu mai ia te au tagata uma.

⁸Auā a ou tautala atu, ua ou alaga, ua ou valaau, o le saua ma le faatafunaga; auā ua avea le afioga a Ieova ma mea e faalumaina ai a‘u, ma tauemua i aso uma.

⁹Ona ou fai atu lea, Ou te le ta‘uta‘uina o ia, ma ou le toe tautala i lona suafa. A o lo‘u loto e peiseai o se afi mumū sa i ai, ua punitia i o‘u ivi, ua lailoa a‘u i onosai, ua ou le mafaia lava.

¹⁰Auā ua ou faalogo i le faaleaga mai a le toatele, ua siomia a‘u i le mata‘u, ua fai ane i latou, Ina outou ta‘uta‘uina atu o ia, matou te ta‘uta‘uina atu foi o ia. O tagata uma o a‘u uo o lamalama mai pea ia te au, ua faapea, Atonu e faaoleoleina o ia, ma tatou manumalo ia te ia, ma tatou taui ma sui ia te ia.

¹¹A ua ia te au Ieova e pei o le toa e matautia; o le mea lea e tausuai ai e o tuliloa mai ia te au, e le manumalo i latou; e matuā faamaina i latou; auā e le manuia i latou; e le faagalogaloina lo latou masiasi e faavavau.

¹²Ieova o ‘au e, o lē tofotofo i e ua amiotonu, o lē silasila i manatu ma loto, ia ou iloa lau taui ma sui ia te i latou; auā ua ou faaalia la‘u finauga ia te oe.

¹³Ina pepese ia ia Ioeva, ia outou vivii atu ia Ieova; auā ua laveaiina e ia ia ola le ua mativa ai lima o e amio leaga.

¹⁴Ia faafanoina le aso na fanau mai ai a‘u; aua le faamanuiaina le aso na fanauina ai a‘u e lo‘u tinā.

¹⁵Ia faafanoina le tagata na avatu le tala i lo‘u tamā, na faapea atu, Ua fanau ia te oe le tama tane; ua matuā faafiafia ia te ia.

¹⁶Ia avea lea tagata e pei o aai na faaumatia e Ieova, ma ua le salamo ai o ia; ia faalogo foi e ia i le alaga i le taeao, ma le vāvāō i le tutonu o le la;

¹⁷auā na le fasiotia a‘u ina o i le manava; po ua avea lo‘u tinā ma tuugamau ia te au, ma lona manava e to pea e faavavau.

¹⁸Se a le mea na ou sau ai mai le manava e iloa ai le tiga ma le faanoanoa, e mavae ai foi o‘u aso ma le mā?